NEHEMÍAS 4 - Dios Rimashca Shimicunami

Israelcunaca p'iñajcuna llaquichishun nicujpipish pircacushcataca mana saquishcacunachu

¹ Jerusalén muyundij pircata ñucanchij cutin pircacushcata Sanbalat yachashpami, yallitaj p'iñarishpa ñucanchij judiocunata chanzata rurashpa,

² paipuracunapaj, Samaria soldadocunapaj ñaupajpi cashna nirca: “Cai mana valij judiocunaca ¿imatashi ruracuncuna? Sacrificiocunata Diosman cuchun saquingami yuyancunachu. Chai jatun pircataca ¿shuj punllallapi tucuchinatachu yuyancuna? ¿Rumicuna rupashpa allpa montonlla saquirishcataca cutin causachinatachu yuyancuna?” nircami.

³ Sanbalathuan caj amonitapuramanta caj Tobiaspish: “Paicuna muyundijta pircashcataca shuj zorra huichiyashpallapish urmachinallamari” nircami.

⁴ “Ñucanchij Taita Dioslla, uyahuayari. Ñucanchijca paicuna p'iñashpa yanganchishcacunamari canchij. Paicuna p'iñashpa c'amishcaca paicunapaj jahuallamantaj tigrachun. Paicunataca paicunata p'iñajcunapaj maquipi churahuayari.

⁵ Muyundijta pircajcunata paicuna c'amishcamantaca, paicuna millaita rurashcataca ama perdonaichu. Paicuna juchallishcata quillcashcatapish cambaj ñaupajmantaca ama anchuchipaichu” nishpami mañarcani.

⁶ Tucuicuna tucui munaihuan trabajacushcamantaca pircataca muyundijta tucui tucuchishpami, altomanca chaupicama pircarcanchij.

⁷ Jerusalén muyundij pircataca, pircana cashcataca pircashpa, allichina cashcata allichishpa ña tucuchigrishcata yachashpami Sanbalatpish, Tobiaspish, arabecunapish, amonitacunapish, Asdodpi causajcunapish yallitaj p'iñarircacuna.

⁸ Chaimi tucuicuna shuj shinalla tucushpa, Jerusalenpi cajcunata llaquichinata yuyarircacuna.

⁹ Chaita yachashpami ñucanchij Taita Diosta mañarcanchij. Paicuna chashna ruranata yuyarishcamantami tutapish punllapish cuidachun cuidajcunata churarcanchij.

¹⁰ Judacunaca: “Cai pircacunataca, caipi chaipi urmachishca maita mana allichipaj cashcamanta, ñucanchijca shaicushpamari mana ashtahuan allichi tucunchij” nircacunami.

¹¹ Ñucanchijta p'iñajcunaca: “Paicunapajman yaicushpa paicunata huañuchishpa llujshimungacama manapishchari pi ricunga. Chashna rurashpaca paicuna ruracushcataca saquichishunllami” nircacunami.

¹² Ñucanchijta p'iñajcunahuan causaj judiocunaca cashnami nijcuna carca: Tucui ñucanchijta p'iñajcunamari cancunataca llapigrin nishpami, chunga cutin huillacurcalla.

¹³ Chaimi ñucaca cada familia tandanacushcata pircata manaraj altota pircashcacunapi, maipi manaraj pircashcacunapi paicunapaj espadacunahuan, lanzacunahuan, arcocunahuan cuidachun churarcani.

¹⁴ Chashna mana rurai tucunchijchu nicujta ricushpami, ñucaca jatuncunatapish, mandajcunatapish, tucui chaipi cajcunatapish: “Ama manchaichijchu. Tucuita rurai tucuj, manchana, Jatun Diosta yuyarichij. Tucui caishujcunamanta, cancunapaj churicunamanta, cancunapaj ushushicunamanta, cancunapaj huarmicunamanta, cancunapaj huasicunamanta macanacuichij” nircanimi.

¹⁵ Ñucanchijta p'iñajcunaca paicuna ñucanchijta llaquichingapaj yuyarinacushcata ñucanchij yachaj chayashcatami paicunapish yachaj chayarcacuna. Taita Diospish paicuna yuyarinacushcata yangapi churashcatapishmi paicunaca yachaj chayarcacuna. Chaimi ñucanchijca maillapi pircacushcaman tucuicuna tigrarcanchij.

¹⁶ Chai punllamanta pachami ñucapajta rurajcunaca chaupica pircacurcacuna, chaupica lanzacunahuan, escudocunahuan, arcocunahuan, fierro churanacunata churashca macanacunalla chapacurcacuna. Tucui Judacunataca mandajcunami paicunapaj huashapi cuidacurcacuna.

¹⁷ Chai pircata pircacuipica pasachijcunapish, aparijcunapish, shuj maquihuanca trabajacurcacunami, shuj maquihuanca espadata aisashcacunami carca.

¹⁸ Pircajcunaca tucuicunami quiquin espadata chumbillinapi huarcuchishcacuna pircacurcacuna. Trompetapi tocajca ñuca c'uchupimi carca.

¹⁹ Chaipimi jatuncunatapish, mandajcunatapish, tucui chaipi cajcunatapish: “Cai ñucanchij allichicun pircacunaca yallitaj achca cashcamanta caishuj chaishuj caru carupimi trabajacunchij.

²⁰ Chashna cajpipish trompetapi tocashca uyarijpica, cancuna maipi trabajacushpapish tucuicuna ñucanchijhuan tandanacunguichij. Ñucanchij Taita Diosmi ñucanchijmantaca macanacunga” nircanimi.

²¹ Chashnami ñucanchijca, inti llujshinca trabajai callarishpaca, chishi luzerocuna ricuringacama trabajarcanchij. Ñucanchijmanta chaupica lanzacuna aisashcami chapacurcacuna.

²² Tucuicunatami ñucaca: “Tucuicunami cancunapajta rurajcunandij tutacunaca, cai Jerusalenpi saquirina canguichij. Chashnami tutacunaca cuidashpa, punllacunaca trabajashpa alli cashun” nircanimi.

²³ Ñucapish, ñucahuan cajcunapish, ñucahuan caj q'uipa huiñaicunapish, ñucahuan caj cuidajcunapish churanacunataca dormingapajpish mana llujshichircanchijchu. Armangapajllami llujshichircanchij.