NEHEMÍAS 13 - Dios Rimashca Shimicunami

Nehemiasca israelcuna Diospajlla causachun allichishcami

¹ Chai punllallatajmi Moisespaj libropi rezashpa tucuicunaman uyachirca. Chaipi rezacushpaca: “Amonitacunapish, moabitacunapish, Diospajlla tandanacushcapica amataj tandanacunaman shamuchun” nishpa quillcashcatami japircacuna.

² Paicunaca israelcunataca micunahuan yacuhuan tupangapajca mana llujshircacunachu. Ashtahuanpish Balaamman cullquita cushpami: Israelcunaca llaqui tucushca alli canman ni nirca. Chashna llaqui tucuchun nijpipish, ñucanchij Taita Diosmi Balaamtaca allicunata cuchun nichirca. Chaimanta paicunahuanca amataj tandanacunguichij nishcami carca.

³ Chashna mandashca cashcata uyashpami, mana israelcuna israelcunahuan tandanacushcataca llujshichishpa cacharca.

⁴ Manaraj chashna llujshichishpa cachajpica, ñucanchij Diospaj huasipi imalla tiyashcacunata ricuj Eliasib curaca Tobiashuanmi huasi ucupura tucushca carca.

⁵ Chashna cashpami Diospaj huasi canllapi caj ucutaca Tobías causanata rurashca carca. Chai ucupica levitacunaman, cantajcunaman, pungupi cuidajcunaman, curacunaman paicunaman cuna cashcata cushcacunata, inciensota, Diospaj huasipi imalla ruranacunata, chungamanta shujta cushca granocunata, vinota, aceitetami ñaupamanca huaquichijcuna carca.

⁶ Tucui chaicuna tucucui punllacunaca ñucaca mana Jerusalenpichu carcani. Babilonia llajtata jatun mandaj Artajerjes quimsa chunga ishqui huatacunata mandacujpimi, pai maipi canman cutinllataj rircani. Chaipi asha punllacunata cashpami, cutinllataj jatun mandajtaca: “Jerusalenman cutin tigrashpa ringapaj cachahuai” nircani.

⁷ Shina nijpimi jatun mandajca: “Rilla” nijpi Jerusaleman shamushpaca, Eliasib curaca Tobiasta llaquishpa Diospaj huasi canllapi caj huasitaca Tobías causanata rurashpa mana allita rurashcata yachaj chayarcani.

⁸ Chaimi nanarishpa, yallitaj llaquirishpaca chai huasi ucupi Tobiaspaj imalla tiyashcacunataca canllaman llujshichishpa shitarcani.

⁹ Chai causacushca ucucunataca tucuitami p'ichachun mandarcani. Diospaj huasipi imalla rurana cashcacunataca, Diosman cushcacunatapish, inciensotapish, cutinllatajmi chai ucucunallapitaj churachircani.

¹⁰ Levitacunaman cuna cashcacunatapish mana cushcamanta, levitacunapish, cantajcunapish, Diospaj huasipi paicuna imalla rurana cashcata saquishpa paicunapaj quiquin allpaman tigrashca cashcatami japircani.

¹¹ Chaimi mandajcunataca: Diospaj huasica ¿ima nishpataj shitashca saquirishcari? nishpa sinchita rimarcani. Chai q'uipaca curacunatapish, levitacunatapish tandachishpami paicuna maipi cashcallapitaj cutin churarcani.

¹² Chaimi Judacunaca granota, vinota, aceiteta chungamanta shujta cungapaj huaquichina huasi ucuman apamurcacuna.

¹³ Chaipi mayordomocuna cachunca Selemías curata, quillcaj Sadocta, levitacunamanta Pedaiastami churarcani. Paicunata ayudaj cachunca Mataniaspaj nieto Zacurpaj churi Hanantami churarcani. Paicunatami imatapish chaitataj pajtachij cashcata ricushpa paicuna chaupishpa cujcuna cachun churarcani.

¹⁴ Taita Dioslla, canta c'uyashpa cambajta rurangapaj cambaj huasipi imallata rurashcataca ama cungarishpa ñucata yuyaripangui.

¹⁵ Chai punllacunallatajmi, Judá llajtapi maijancunaca uvata sarunapi uvata sarucujta ricurcani. Huayungacunata ashtacujtapish, burrocunaman vinocunata, uvacunata, higocunata, ima shujtajcunatapish apachishpa samana punllapi Jerusalenman apamushpa c'atucujta ricushpami sinchita rimarcani.

¹⁶ Tiro llajtamanta Jerusalenpi causajcunapish, chalhuacunata, ima shujtajcunata apamushpami, Jerusalenpi causaj judiocunaman samana punllapi c'aturcacuna.

¹⁷ Chaita ricushpami, judiocunata mandajcunataca: –¿Cancunaca samana punllata yangata rurashpami yallitaj millaita ruracunguichij? nishpa sinchita rimarcani.

¹⁸ Cancunapaj ñaupa yayacunapish chashnallataj millaita rurashpami, ñucanchij Diostaca ñucanchijtapish, tucui cai llajtapi causajcunatapish tucui cai llaquicunata ñucanchij jahuaman cachun p'iñachircacuna. ¿Cancunapish chashnallatajmi samana punllata yanganchishpa israelcunata Mandaj Dios llaquichichun p'iñachicunguichij?– nircanimi.

¹⁹ Chaimantami Jerusalén pungucunataca samana punlla callaringapaj tutayacuita huichcashpaca cayandij chishi samana punlla tucuringacama ama pascachun nircani. Samana punllapi cargacunata pi ama yaicuchichunca ñucapajta rurajcunatami Jerusalén pungucunapi cuidachun churarcani.

²⁰ Chaimi Jerusalenpi c'atushpa purijcunaca huaquincunaca shuj cutin, huaquincunaca ishqui cutin Jerusalén canllaman pacarircacuna.

²¹ Chaimi paicunataca: ¿Ima nishpataj cai pirca huashapi pacarinaman shamunguichij? “Cutinllataj shamujpica sirijta aisashpami anchuchisha” nircanimi. Chaimanta pachami samana punllapica ña mana shamurcacuna.

²² Chaimi levitacunataca: “Samana punllata ama mapayachingapaj, cancunaraj chuyayashpa Jerusalenman yaicuna pungucunapi samana punllapi cuidaichij” nircani. Ñuca Dioslla, caicunata rurashcamantapish ñucataca yuyaripangui. Canca ima shina llaquij cashca shinallataj ñucata llaquihuai.

²³ Chai punllacunallatajmi, maijan judiocunataca Asdod huarmicunata, Amonita huarmicunata, Moab huarmicunata paicunapaj huarmi cachun japishcacuna cashcata ricurcani.

²⁴ Paicunapaj huahuacunamanta chaupica judiocunapaj rimaita mana yachashcamantami, Asdodcunapaj rimaipi yalli rimarcacuna. Chashnami paicunaca cada quiquin llajta rimashca shina rimarcacuna.

²⁵ Chaimi paicunahuanca yallitaj p'iñarishpa: Mana allicunami canguichij nishpa maijan paicunataca huajtashpa ajchamanta c'utsashpa paicunataca: “Ñucanchij ushushicunataca mana israelcunapaj churicunamanca manataj cushunchu. Paicunapaj ushushicunatapish ñucanchij churicunapaj huarmi cachunca manataj japishunchu. Ñucanchijpish paicunapaj ushushicunataca ñucanchij huarmicuna cachunca manataj japishunchu” nishpami ari nichircani.

²⁶ “Israel llajtata jatun mandaj Salomonca, shujtaj llajtacunata jatun mandajcunata ashtahuan yalli alli mandajmi cashca. Taita Dios c'uyashpa churashcamantami, paica israelcunata alli mandaj tucushca. Chashna cajpipish, mana Israel huarmicunami paitaca juchallichirca.

²⁷ Cancunapish chashnallataj yallitaj millai juchata rurashpa Diosta p'iñachichunca mana saquishunchu. Maitataj mana Israel huarmicunata ñucanchij huarmicuna cachun japishpa Taita Diosta p'iñachishunyari” nircanimi.

²⁸ Joiadapaj churicunamanta shujmi, horonitapura caj Sanbalatpaj yerno carca. Joiadaca, curacunata mandaj Eliasibpaj churimi carca. Chaimantami Sanbalatpaj yernotaca ñuca c'uchumanta anchuchircani.

²⁹ Ñuca Dioslla, curacunapish levitacunapish mana allitamari rurashcacuna. Paicuna imata ruranata ari nishcatapish yangatami rurancuna. Paicuna chashna rurashcamanta llaquichinataca ama saquichu.

³⁰ Mana israelcunata tucui israelcunamanta anchuchishpa chuyayachishpami, curacunatapish, levitacunatapish paicuna imata rurana cashcallapitaj mirga mirgapi chaupishpa churarcani.

³¹ Diosman cuna yantata maijanlla ima horalla apamunatapish, punta p'ucushca granota apamuna cashcatapishmi mandarcani. Ñuca Dioslla, ñucapaj allita ruranatapish ama cungaripangui.