MIQUEAS 5 - Dios Rimashca Shimicunami

Taita Diosca Belenmantami shuj quishpichijta cachasha nishcami

¹ Jerusalenpi causaj alli macanacunata yachajcunalla, cancunapaj llajtataca muyundijta pircaichigari. Ñucanchij llajtata quichujcunamari muyundijta shayacuncuna. Paicunami Israel llajtapaj jueztaca, varahuan quijaduspi chugrichingacuna.

² Ashtahuanpish Efrata llajtapi caj Belén pueblolla, Judá llajtapi tiyaj familiacunapurapica, canllami tucuimanta yallitaj uchilla pueblo cangui. Chashna cajpipish, canmantami Israel llajtata Mandajca llujshinga. Paica ñaupa yayacunamantami llujshinga ninmi.

³ Ashtahuanpish shuj huarmi chichushpa huachangacamallami paicunallata saquinga. Shinallataj saquirij paipaj huauquicunaca ñaupa yaya Israelpaj churicunahuanmi tigrangacuna.

⁴ Chai Mandajca, Mandaj Diospaj tucuita rurai tucuj sumaj cashcahuanmi, pai agllashcacunataca michinga. Chaipica paicunaca sumaj causaitami charingacuna. Mandaj Dios jatunyachishca cashpami, chai mandajca tucui cai pachata mandanga.

⁵ Paimi ñucanchijmanca sumaj causaita cunga. Asiria llajta runacuna ñucanchij llajtata quichushpa, mandana huasicunatapish urmachijpica canchis michijcunata, pusaj mandajcunatami paicunata llaquichinamanca cachashun.

⁶ Paicunami Nimrodpaj Asiria llajtapi causajcunataca, espadacunahuan huañuchingacuna. Chashnami ñucanchij llajtata quichushpa mishacuj Asiria llajta runacunamantaca quishpichinga.

⁷ Jacobpaj huahua huahuacunamanta saquirishcacunaca achca llajtacunapica, Mandaj Dios cachashca shulla shinapish, q'uihuapi urmashca tamya shinapishmi cangacuna. Shullaca, huañujlla aichayuj runacuna cachachunca mana shuyanchu.

⁸ Shinallataj Jacobpaj huahua huahuacunaca achca llajtacuna, achca pueblocuna chaupipica sacha animalcunapaj chaupipi caj p'iña león shinami canga. Canlla ovejacunapaj chaupiman malta león yaicushca shinapishmi canga. Paicunata japishpa sarushpa micucujpipish, mana pi quishpichi tucungachu.

⁹ Cambaj maquihuanmi canta p'iñajcunataca llaquichingui. Canta mana ricunachijcunaca tucuicunami chingaringacuna.

¹⁰ Mandaj Diosca cashnami nin: “Chai punllacunapica cambaj caballocunataca huañuchishami. Carretacunatapish chingachishami.

¹¹ Shinallataj cambaj llajtapi tiyaj pueblocunatapishmi chingachichisha. Cambaj jatun torrecunatapish tucuitami urmachisha.

¹² Shinallataj canmantaca brujiyanatapish chingachishami. Chaimantami brujocunaca ña mana tiyanga.

¹³ Imacunaman rijchaj rurashcalla dioscunatapish, cancunapaj chaupillatapitajmi ñutushpa chingachichisha. Chashna rurajpimi cancunaca chai rurashcalla dioscunataca, ña mana ashtahuan cunguringuichij.

¹⁴ Asera diosman rijchaj dioscunatapish cancunapaj chaupillapitajmi p'aquishpa shitasha. Cancuna causacun pueblocunatapish chingachishami.

¹⁵ Ñucata mana cazuj llajtacunataca, ñuca p'iñarishpaca llaquichishatajmi” ninmi.