MIQUEAS 4 - Dios Rimashca Shimicunami

Mandaj Dios tucuita mandana punllamanta

¹ Tucuri punllacunapica cashnami tucunga: Mandaj Diospaj huasi tiyacun urcuca tucui urcucunamanta yalli jahuamanmi canga. Tucuicunapaj uma shina cashcamantami, tucui pueblocunamanta chaiman tandanacunga.

² Achca llajtacunamanta tandanacushpami cashna ningacuna: “Mandaj Dios causacun urcuman huichiyashunchij. Jacobpaj Diospaj huasiman yaicushunchij. Chaipica alli ñanta purinatami yachachinga. Chashna yachachijpica, alli ñanpimi purishun” ningacunami. Sionmantaca mandashcacunami llujshinga. Jerusalenmantaca Mandaj Dios huillashca shimicunami llujshinga.

³ Shinallataj Mandaj Diosca achcacunamanmi, paicuna imalla rurashcata ricuchinga. Manchanayaj jatun tucushca llajtacunatapish, carucunapi causajcunatapish allichingami. Chai punllapica espadacunataca tacashpami, azadonta rurangacuna. Lanzacunatapish hocestami ruranga. Chai punllapica shuj llajtahuan, caishuj llajtahuan jatun macanacuipish mana tiyangachu. Macanacunata yachanapish mana tiyangachu.

⁴ Chaipica pi mana manchachingachu. Quiquin uva yura ucupi, quiquin higo yura ucupi tiyarishpami samaringacuna. Caitaca tucuita Mandaj Diosllatajmi huillashca.

⁵ Shujtajcuna, paicunapaj quiquin dioscunallata cazushpa causacujpipish, ñucanchijca ñucanchijta Mandaj Taita Diosllatami huiñai huiñaita cazushpa causashun.

Mandaj Diosca israelcunataca tigrachimushami nishcamanta

⁶ Mandaj Diosca cashnami nin: “Chai punllapica ñucaca patojotapish, chingarishpa puricujtapish, ñucallataj llaquichishcatapish tandachishami.

⁷ Chashnami patojoca, ñucapajlla saquiringa. Chingarishcacunata tandachishpami, jatun llajtata rurasha. Chai punllamantapacha Mandaj Diosmi paicunataca, Sión urcupi huiñaita mandacungalla.

⁸ Canlla ovejacuna shayana jatun torrella, canca Siónpi causajcunata pacajmari cangui. Punta mandashca shinallatajmi, canca Jerusalenpi causajcunataca cutin mandangui” ninmi.

⁹ ¿Ima nishpataj cunanca huachana nanaihuan capariricuj huarmi shina capariricunguichigari? ¿Manachu jatun mandajta charinguichij? ¿Cancunata cunajcunachu huañurca imatagari?

¹⁰ Siónpi causajcunalla, huachana nanaihuan capariricuj huarmi shina caparirishpa huacaichigari. Cancunaca cai pueblomanta llujshishpaca, urcupimi causanguichij. Chaimantaca Babiloniacamami chayanguichij. Chaipimi quishpiringuichij. Chaipimi Mandaj Diosca, cancunata p'iñajcunapaj maquimanta quishpichinga.

¹¹ Ashtahuanpish cunanca achca llajtacunamantamari canta llaquichingapajca tandanacushcacuna. Paicunaca: “Sión pueblo yanga tucushcata ñucanchij ñahuihuantaj ricushun ninchijca” nincunami.

¹² Chashna nijcunaca Mandaj Dios imata yuyacushcatapish, imallata cunashcatapish manamari yacharcacunachu. Chashna millaicuna cashcamantami, gavillacunata erapi tandachij shina tandachirca.

¹³ Siónpi causajcunalla, millaita rurajcunataca jatarishpa trillaichigari. Cancunataca fierro gachuta shinapish, bronce sillucunata shinapishmi rurasha. Chaicunahuanmi achca runacunata mirga mirgata ruranguichij. Chaimantaca paicuna imalla quichushcacunatapish, imalla charishcacunatapishmi tucui cai pachata Mandaj Jatun Diosman cunguichij.