MIQUEAS 3 - Dios Rimashca Shimicunami

Israelcunata pushajcunata llaquichishcamanta

¹ Cashnami nircani: Cunanca Jacobpaj huahua huahua israelcunata mandajcunapish, pushajcunapish caita alli uyahuaichij. Imatapish cashcata ruranata yachanaca ¿manachu cancunapaj imatagari?

² Ashtahuanpish alli ruranataca p'iñashpami, millaitaraj ruranguichij. Tullumantaca caratapish, aichatapish anchuchishpami saquinguichij.

³ Shinallataj caipi causajcunatapish micurcanguichijmi. Paicunapaj aicha caratapish anchuchircanguichijmi. Paicunapaj tullucunatapish mangapi churashpa yanuna tullucunata shinami ñututa p'aquircanguichij. Paicunaca yanunapaj mangapi tiyacuj aicha shinami carcacuna.

⁴ Chashna yallitaj millaita rurashpa causashcamantaca, cancuna llaquipi cashpa Mandaj Diosta caparicujpipish, paica manataj cutichingachu. Ashtahuanpish chai llaqui punllapica, paipaj ñahuitaca shujtajmanmi churanga.

⁵ Ñuca agllashcacunata pandachingapaj, Dios ima nishcata huillajcunami canchij nijcunataca Mandaj Diosca cashnami nin: “Paicunaca micunata sajsajta carajcunataca mana huañuchishunchu, mana imata carajcunallatami huañuchishun nishpami llullashpa huillancuna.

⁶ Chashna llullashpa huillashcaca tutami tucunga. Adivinashpa huillashcapish amsami tucunga. Chai huillajcuna huillagrijpica, inti achijyachicujpipish ñapish punllaca amsayangallami.

⁷ Chashna tucujpimi, Dios ima nishcata huillajcunami canchij nijcunaca pingai tucungacuna. Adivinocunapish musparingacunami. Paicunaca Taita Dios mana imata cutichijpimi, tucuicuna shimita huichcangacuna” ninmi.

⁸ Ashtahuanpish ñucaca, Mandaj Diospaj Espirituhuan jundami cani. Paimi cashcata ruranatapish, fuerzatapish curca. Chaimantami Jacobpaj huahua huahua israelcuna mana cazushpa millaita rurashcamantaca, ñahui ñahui rimasha.

⁹ Cunanca Jacobpaj huahua huahua israelcunata mandajcunapish, pushajcunapish caillata alli uyahuaichij: Cancunaca cashcata ruranataca mana munanguichijchu, allita ruranatapish mana ruranguichijchu.

¹⁰ Sióntaca yahuarhuanmi shayachinguichij. Jerusalentaca quichushcacunallahuanmi sumajyachinguichij.

¹¹ Paicunata mandajcunaca camarita japishpallami, millaita rurajcunataca mana imata nincuna. Curacunapish cullquiraicullami imatapish yachachincuna. Dios ima nishcata huillajcunapish cullquiraicullami huillancuna. Chai jahuamari paicunaca: “Mandaj Diosca ñucanchijhuanmari. Ima llaquipish mana tiyangachu” nishpa, Mandaj Diospi shunguta churancuna.

¹² Cancuna chashna rurashcamantaca, Sión urcuca tarpuna allpata shina yapushcami canga. Jerusalén puebloca, rumi montonllami tucunga. Diospaj huasi tiyana urcupish q'uihua jundashca sachallami saquiringa.