MIQUEAS 1 - Dios Rimashca Shimicunami

Samariamantapish Jerusalenmantapish huacashcamanta

¹ Judá llajtataca, jatun mandaj Jotampish, Acazpish, Ezequiaspishmi mandarca. Chai punllacunallatajmi Mandaj Diosca, Moreset pueblomanta caj Miqueastaca Samaria pueblotapish, Jerusalén pueblotapish imata rurana cashcata ricuchishpa huillachirca.

² Tucui cai pachapi causajcunapish, caipi imalla tiyajcunapish caita alli uyahuaichij. Mandaj Jatun Diosca, paipajlla huasimanta cancunata llaquichina cashcataca ricuchishca cachun.

³ Riquichij, Mandaj Diosca pai causacun huasimanta uriyashpaca, cai llajtapi tiyaj urcucuna jahuatami purishpa shamunga.

⁴ Cai urcucunaca, pai purijpica yacuyangami. Pugru pambacunapish chaupirishpami, ninapi cera yacuyaj shina, urita callpacuj yacu shina callpanga.

⁵ Israelcuna mana cazushpa millaita rurashcamantami, chashnaca tucunga. Jacobpaj huahuacunaca, ¿ima millaitataj rurashcari? Samaria pueblopimari chashna rurancuna. Judá llajtapi causajcuna, rurashcalla dioscunata adorana altarcunaca ¿maipitagari? ¡Jerusalenpimari!

⁶ “Chashna millaita rurachishcamantaca, Samaria pueblotaca rumi montonllatami saquisha, uvata tarpuna allpatami rurasha. Pircashca rumicunatapish pugru pambaman caita chaita shitashpami, callari rumicunatapish tucuita llujshichisha.

⁷ Paicunapaj rurashcalla dioscunatapish p'aquishpa, ñutushami. Imalla japishcacunatapish ninapimi tucuita rupachisha. Chashnami paicunapaj dioscunataca tucuita chingachisha. Huainayaj huarmicunamantami imacunatapish japircacuna. Chai, japishcacunaca huainayaj huarmicunapajllamantajmi tigranga” nircami.

⁸ Chai tucui llaquicunamantaca, llaquinayajtami huacasha. Shinallataj churanapish illajlla lluchullami purisha. Chacalcuna shinapish, avestruzcuna shinapishmi llaquinayajta huacasha.

⁹ Samaria pueblopi causajcunapaj carachaca, manchanayajta nanachijmari. Chai ungüica Judá llajtacamami chayarca, ñuca llajtapuracuna causacun Jerusalén pueblomanpishmi chayarca.

¹⁰ Chai llaquicunataca, Gat pueblopi causajcunamanca ama huillanguichijchu, ama huacanguichijchu. Chai tucui llaquihuan huañucushpaca, Bet-le-afra llajtapi tiyaj ñutu allpapi singuringuichijlla.

¹¹ Safir pueblopi causajcunalla, pinganayaj lluchulla ñaupashpa richijlla. Zaanán pueblopi causajcunaca manamari llujshincunachu. Bet-esel pueblopi causajcunaca llaqui tucushpa huacacushpaca, ña mana ayudangachu.

¹² Marot pueblopi causajcunaca alli causanallatami yallitaj munarcacuna. Chaimantami Mandaj Diosca, Jerusalén pueblocama llaquicunataca cachashca carca.

¹³ Laquis pueblopi causajcunalla, cancunapish Israel llajtapi causajcuna shinallatajmi Diosta c'ariyarcanguichij. Siónpi causajcunatapish Diosta c'ariyanataca, cancunami callarichircanguichij. Chaimanta cunanca cancunapaj carretacunataca, alli callpaj caballocunapi huatachishpa aisachichijlla.

¹⁴ Chaimanta cancunaca, Moreset-gat pueblopi causajcunamanca, camaricunatami cuna canguichij. Aczib puebloca, Israel llajtata jatun mandajcunata umajmi tucunga.

¹⁵ Maresa pueblopi causajcunalla, cancuna causacun pueblotaca shujtajcunami japingacuna. Paicuna shamujpica alli nishca israelcunaca, Adulam pueblopimi miticugringacuna.

¹⁶ Judá llajtalla, cambaj c'uyashca huahuacunamantaca uma ajchata ruturiyari. Águila shina lluchulla uma tucuyari. Canpi causajcunataca, shujtaj llajtamanmi prezu apangacuna.