Mateo 8 - Dios Rimashca Shimicunami

Leprahuan caj runata Jesús alliyachishcami

¹ Jesús chai tucuita yachachishpa urcumanta uriyacujpica, paitaca achcacunami caticurcacuna.

² Chaipica leprahuan caj shuj runa c'uchuyashpami, Jesuspaj ñaupajpi cungurishpaca: –Amito, ñucata alliyachisha ninguipishchari– nijpi,

³ Jesusca maquita chutashpa tuparishpaca: –Ari, alliyachisha ninimi, nishpaca alliyashcami cangui– nircami. Chashna nincami, lepraca chingarirca.

⁴ Chaimi Jesusca: –Riqui, canta pi alliyachishcata pajta piman huillanguiman. Curaman ricuchigri. Can alliyashcamantaca Moisés mandashca shina ofrendata cugri. Chashna rurajpimi curacunaca can alliyashca cashcata yachangacuna– nircami.

Patsaj soldadocunata mandajpajta rurajta Jesús alliyachishcami

⁵ Capernaumman Jesús ña yaicugrijpica, patsaj soldadocunata mandaj paipajman c'uchuyashpaca:

⁶ –Amito, ñucapajta ruraj huambrami mana cuyurijta ruraj ungüi japijpi achca nanaihuan huasipi llaquita apacun, paita alliyachihuai– nishpa rogajpi,

⁷ Jesusca: –Ñuca rishpa alliyachishallami– nirca.

⁸ Shina nijpimi patsaj soldadocunata mandajca: –Amito ñucaca quiquin ñuca huasipi yaicuipajca manamari canichu. Caimanta quiquin alliyai nijpica, ñucapajta rurajca alliyangallami.

⁹ Ñucapish mandajpaj ucupimi cani. Chashnallataj soldadocunata mandajmi cani. Maijanta: “Ri” nijpica, rinllami. Shujtajta: “Shamui” nijpipish, shamunllami. Shinallataj ñucapajta rurajta: “Caita rurai” nijpipish, chaita ruranllami– nircami.

¹⁰ Chaita uyashpa Jesusca mancharishpami, paita caticujcunataca: –Pai shina yallitaj crijtaca, israelcunapurapipish manataj ricushcanichu. Chaica chashnatajmi.

¹¹ Cancunaman huillanimi: Inti llujshinmanta, inti huashicunmantapish achcacuna shamushpami, jahua pachamanta mandacunpica Abrahamhuan, Isaachuan, Jacobhuan tiyaringacuna.

¹² Ashtahuanpish Taita Dios mandacujpi chaipi cana cashcacunarajmi, amsapi canllaman shitashca cangacuna. Chaipica huacangacunami, nanaihuanpish quirucunata caniringacunami– nircami.

¹³ Chashna nishpaca Jesusca patsaj soldadocunata mandajtaca: –Rilla, can crishca shinallataj rurashca cachun– nincami, huambraca alliyashca carca.

Jesusca Pedropaj suedrata alliyachishcami

¹⁴ Chai q'uipami Jesusca, Pedropaj huasiman rishpa Pedropaj suedra fiebrehuan camapi ancha siricujta ricurca.

¹⁵ Ungushcapaj maquipi Jesús tuparijpica, fiebreca anchurcallami. Alliyashpa jatarishpaca tucuicunamanmi cararca.

Achca ungushcacunata Jesús alliyachishcami

¹⁶ Ña tutayacuitaca, supai japishca achcacunatami Jesuspajman pushamurcacuna. Paica rimashcallahuanmi supaicunataca llujshichirca. Tucui ungushcacunatapish alliyachircami.

¹⁷ Profeta Isaías: “Paillatajmi ñucanchij ungüicunata, nanaicunata aparca” nishpa huillashca pajtachunmi chashna rurarca.

Jesusta catishun nishcacunami

¹⁸ Jesusca paipaj muyundijpi achcacuna cajta ricushpami, paipaj yachacujcunataca cai cuchata ch'imbashunchij nishpa mandarca.

¹⁹ Chaimi mandashcata quillcaj c'uchuyashpaca: –Yachachij, maiman rijpipish canhuanmi risha– nijpimi,

²⁰ Jesusca: –Zorracunapish causanapaj jutcuta, pajarocunapish tazinta charincunami. Ashtahuanpish Runa Aichayujca, saunashpa dorminallatapish mana charinchu– nirca.

²¹ Paipaj yachacujcunamanta shujca: –Amito, ñuca yayataraj pambamugrisha– nircami.

²² Shina nijpi Jesusca: –Canca cunantaj ñucata catilla. Huañushcacunataca huañushcacunallataj pambacuchun saquilla– nircami.

Jesusca huairandij tamyata casilla cai nishcami

²³ Barcoman Jesús yaicujpica, paipaj yachacujcunapish catishpami yaicurcacuna.

²⁴ Ña cuchata ricujpica, huairandij tamyandij yallitaj jatarishpami, chai cucha yacu jahuata jatarishpa barcota tapagrirca. Jesusca dormicurcallami.

²⁵ Paipaj yachacujcuna c'uchuyashpaca: –¡Amito, chingarigrinchijca quishpichihuai!– nishpami rijchachircacuna.

²⁶ Chaimi Jesusca: –¿Ima nishpataj mancharinguichij? Cancunaca ashallata crijcunami canguichij– nishpa jatarishpaca, huairatapish, yacutapish casilla tucui nishpa sinchita rimajpica chashna tucurcallami.

²⁷ Chaipi cajcunaca mancharinacushpami: –Cai runaca pitagari, huairapish yacupish paitaca cazunllamari– ninacurcacuna.

Supai japishca gadareno runacunami

²⁸ Cuchata ch'imbashpaca, gadarenocunapaj llajtamanmi Jesusca chayarca. Chaipica supai japishca ishqui runacunami panteonmanta llujshishpa, Jesusta tupanaman shamurcacuna. Chaicunaca yallitaj millaicuna cajpimi, pi mana chai ñantaca ri tucurcacuna.

²⁹ Paicunaca: –Taita Diospaj Churi Jesús, ¿ñucanchijtaca imatataj ruragringuiyari? ¿Manaraj punlla pajtajpichu, llaquichingapaj caimanca shamurcangui?– nishpami caparircacuna.

³⁰ Paicunamanta asha carullapimi canlla cuchicuna puricurcacuna.

³¹ Chaimi supaicunaca: –Cai runamanta ñucanchijta llujshichishpaca, chai canlla cuchicunapi yaicuchun saquihuai– nircacuna.

³² Shina nijpi Jesusca: –Richij– nircami. Supaicuna llujshishpaca, chai canlla c'uchicunamanmi yaicugrircacuna. Canlla cuchicunaca, c'aca quinrita singushpami cuchaman huashicushpa yacupi chingarircacuna.

³³ Michijcunaca achcata mancharishpa puebloman callpashpa rishpami tucui imalla tucushcata, supai japishcacunapish ima shinalla tucushcata parlarcacuna.

³⁴ Chaimi chai pueblopi tucui causajcuna, Jesusta tupanaman llujshircacuna. Paita ricushpaca, ñucanchij llajtamantaca ripailla nishpami rogarcacuna.