Mateo 7 - Dios Rimashca Shimicunami

Pitapish mana juchachinallachu nishcami

¹ Ama juchachichu. Canpish ama juchachishca cangui.

² Ima shinami shujtajta juchachingui, chashnallatajmi juchachishca cangui. Imahuanmi shujtajta medingui, chai shinallatajmi medishca cangui.

³ Cambaj quiquin ñahuimanta jatun caspita manaraj anchuchishpaca, ¿ima nishpataj cambaj huauquipaj ñahuipi ujsha tiyacujtaraj ricungui?

⁴ Cambaj ñahuimanta jatun caspita manaraj anchuchishpaca ¿ima shinataj: “Cambaj huauquitaca shuyai cambaj ñahuimanta ujshata anchuchisha” ninguiyari?

⁵ ¡Mishqui shimi, jayaj shungu! Cambaj quiquin ñahuimanta jatun caspitaraj anchuchiyari. Chashna cashpamari, cambaj huauquipaj ñahuipi tiyacuj ujshataca alli ricushpa anchuchingui.

⁶ Taita Diospajlla cajtaca, allcucunamanca ama cuichijchu. Ñataj tigrarishpa c'utsa c'utsata ruranman. Cancunapaj perlacunatapish, c'uchicunapaj ñaupajpica ama shitaichijchu. Paicunaca sarungallacunami.

Taita Diosta ima shina mañanami

⁷ Mañaichij, paica cungami. Mashcaichij, japinguichijmi. Huasiyuj nichij, paica pascangami.

⁸ Mañajcunaca tucuicunami chasquin. Mashcajpish japinmi. Huasiyuj nijpipish yaicuchingami.

⁹ ¿Maijan cancunataj cambaj churi tandata mañajpica, rumita cunguichijman?

¹⁰ Chalhuata mañajpipish culebrata cunguichijman.

¹¹ Cancunaca millaicuna cashpapish, cancunapaj huahuacunamanca imatapish allicunata cunatami yachanguichij. Jahua pachapi caj cancunapaj Yayacarin, paita mañajcunamanca ashtahuan yalli allicunatamari cunga.

¹² Shina cajpica, shujtajcuna cancunapaj allita rurachun nishpaca, cancunapish paicunapaj allita ruraichij. Chashnami mandashcacunapipish mandan, profetacuna huillashcapipish huillan.

Quichqui punguta yaicunami

¹³ Quichqui punguta yaicuichij. Chingarinaman pushajca pungupish anchomi, ñanpish yallitaj anchomi. Chaitaca achcacunami yaicuncuna.

¹⁴ Causaiman pushajca pungupish quichquimi, ñanpish quichquimi. Chaitaca ashacunallami chasquincuna.

Grano p'ucujpimi ima yura cashcataca rijsinguichij

¹⁵ Llullashpa yachachijcunamanta huaquichirichij. Paicunaca oveja shina churarishcami cancunapajmanca shamuncuna. Ashtahuanpish paicunapaj shunguca millai atujcuna shinami.

¹⁶ Paicunataca granota p'ucujta ricushpa pi cashcata rijsinguichij. Uvastaca casha yurapichari tandanguichij. Higotapish abrojo cashapichari tandanguichij.

¹⁷ Tucui alli yurapimi, alli grano p'ucun. Mana alli yuraca, mana alli granollatami p'ucun.

¹⁸ Alli yuraca mana alli granotaca, mana p'ucunchu. Mana alli yurapish alli granotaca mana p'ucunchu.

¹⁹ Mana alli granota p'ucuj yurataca, tucuicunatami p'itishpa ninapi shitan.

²⁰ Chaimanta paicunapi p'ucushca granota ricushpa pi cashcata rijsinguichij.

Taita Dios mandacunpica mana tucuicuna yaicungachu

²¹ Ñucata: “¡Mandaj Jesús, Mandaj Jesús!” nijcunaca, Taita Dios mandacunpica mana tucuicuna yaicungacunachu. Ashtahuanpish jahua pacha ñuca Yayapaj munaita rurajcunami, chaimanca yaicungacuna.

²² Chai punllapica achcacunami ñucataca: “Mandaj Jesús, Mandaj Jesús, cambaj shutipimi huillarcanchij, cambaj shutipimi supaicunata llujshichircanchij, cambaj shutipimi achca milagrocunatapish rurarcanchij” ningacunami.

²³ Shina nijpica paicunataca: “Cancunataca nunca mana rijsircanichu. ¡Ñucamanta anchuichij, millaita rurajcuna!” nishami.

Sinchi allpapipish t'iyu allpapipish huasichijcunamanta parlashcami

²⁴ “Maijanpish cai ñuca yachachishcacunata uyashpa chaitataj rurajtaca, yacu rumi jahuapi huasichij alli yuyaiyuj runahuanmi ch'imbapuragrini.

²⁵ Alli yuyaiyuj runa huasichishca q'uipa tamyajpica, achca yacu jatarishpa, achca huaira p'ucushpa chai huasipi huajtarijpica, mana urmarcachu. Chaica ucujta allashpa yacu rumi jahuapi huasichishcamantami mana urmarca.

²⁶ Maijanpish cai ñuca yachachishcacunata uyashpapish mana rurajtaca, t'iyu allpa jahuallapi huasichij yuyai illaj runahuanmi ch'imbapuragrini.

²⁷ Chai huasitaca achca tamya shamushpa, achca yacu jatarishpa, achca huaira p'ucushpa sinchita huajtajpica urmarcallami. Chaipica jatun llaquimi carca” nircami.

²⁸ Cai shimicunata parlashpa Jesús tucuchijpica, paipaj yachachinata yachachishcataca achcatami mancharircacuna.

²⁹ Mandashcata quillcajcuna shinallaca mana yachachircachu. Paica mandaj cashcatataj ricuchishpami yachachirca.