Mateo 3 - Dios Rimashca Shimicunami

Bautizaj Juan huillashcami

¹ Chai punllacunallatajmi, Bautizaj Juanca Judeapi caj shitashca pambapi huillashpa ricurishpaca,

² “mana alli ruracushcata saquishpa cutirichij. Jahua pachamanta mandanamari ña c'uchuyamushca” nishpa huillarca.

³ Profeta Isaías huillashpaca, Juanmantami cashna nishca: “Shitashca pambapi caparijca: “¡Jatun Diospaj ñanta allichichij. Cancunapaj ñancunatapish allichichij!” ningami” nishcami.

⁴ Juanca, camello millma churanata churarishca, carahuan chumbillirishcami carca. Pai micunaca langostacuna, sacha chuspipaj mishquimi carca.

⁵ Juanpajmanca Jerusalenmanta, tucui Judeamanta, Jordán yacu c'uchulla tucui llajtacunamantapishmi shamurcacuna.

⁶ Paicunapaj juchacunata huillajpimi, Juanca Jordán yacupi bautizarca.

⁷ Achca fariseocunapish, saduceocunapish bautizachun nishpa shamujta Juan ricushpaca, cashnami nirca: “¡Culebrapaj huahua huahuacuna! Taita Dios p'iñarishpa llaquichina punllamanta quishpirisha nichunca ¿pitaj huillarca?

⁸ Millaita ruracushcata saquishpa cutirishcata ricuchingapajca, allita rurashca p'ucushca granota ricuchichij.

⁹ Cancunapaj ucu yuyaillapi: “Ñucanchijca Abrahamtami yayata charinchij nishpa” ama nirichijchu. Cashnami nini: Taita Diosca, cai rumicunatapish, Abrahampaj huahua huahuacuna cachun rurai tucunmi.

¹⁰ Ashtahuancarin hachatamari ña yuracuna sapipi churashca. Mana p'ucuj yuracunataca tucuitami p'itishpa ninapi shitanga.

¹¹ Mana allita ruracushcata saquishpa cutirijpi, yacupi bautizajllami ñucaca cani. Chaica chashnatajmi. Ashtahuanpish ñucapaj q'uipa shamujmi Espiritupi, ninapi bautizanga. Paica ñucata yalli tucuita rurai tucujmi. Chaimantami paipaj pargatellatapish mana pascaipaj cani.

¹² Granota chuyanapaj palaca ñami paipaj maquipi. Paipaj trigotaca huaquichinapimi churanga. Ujshataca manataj huañuj ninapimi rupachinga” nircami.

Jesusta bautizashcami

¹³ Jesusca Galileamantami, Jordanpi Juan cajpi pai bautizachun nishpa shamurca.

¹⁴ Chaipimi Juanca mana bautizasha nishpa: –Ñucamari can bautizashca cana cani. ¿Maitataj canca ñucataca bautizai ninguiyari?– nijpi,

¹⁵ Jesusca: –Shina cajpipish cunanca chaitaca saquishpa bautizaillari. Chashna rurashpami, Taita Dios mandashcataca tucuita pajtachishun– nijpimi Juanca bautizarca.

¹⁶ Jesusca ña paita bautizajpi yacumanta llujshishcahuanmi, jahua pacha pascarijpi Taita Diospaj Espirituca paloma shina shamushpa paipaj jahuapi tiyarijta ricurca.

¹⁷ Jahua pachamantaca: “Caimi ñuca c'uyashca Churi. Paipimi cushicuni” nishpa rimashcami uyarirca.