Mateo 24 - Dios Rimashca Shimicunami

Diospaj huasitaca urmachingacunami nishcami

¹ Diospaj huasimanta Jesús llujshishpa ña rigrijpimi, paipaj yachacujcunaca Diospaj huasi ima shinalla rurashca cashcata ricuchingapaj c'uchuyarcacuna.

² Chaimi Jesusca: –Ari shinatajmari. ¿Caita ricushpachu mancharinguichij? Caipica shuj rumillapish pircashca mana saquiringachu, tucuimi urmachishca canga. Chashnatajmi canga– nirca.

Cai shina causai tucurinata ricuchij llaquicunami

³ Olivocuna tiyan urcupi Jesús tiyacujpimi, yachacujcunaca: –Huillahuayari can huillacushcaca ¿ima punllataj chashna tucungari? Can cutin shamunapajpish, cai shina causai tucurinapajpish ¿ima ricunata ricushpataj tucui chaicuna pajtamucushcataca yachashun?– nishpami, paillata tapungapaj c'uchuyarcacuna.

⁴ Chaimi Jesusca: –Cancunata pi ama umachun yuyaihuan canguichij.

⁵ Achcacunami ñuca shutipi shamushpaca: “Ñucami Cristo cani” nishpa, achcacunata umangacuna.

⁶ Jatun macanacuicunami tiyan, shujtaj llajtacunapipish ñami macanacugrin ninacujtami uyanguichij. Cancunaca ama pandaringuichij yuyaihuan canguichij. Tucui caicunaca pajtanatajmi. Chashna tucucujpipish, cai shina causaica manaraj tucuringachu.

⁷ Mama llajtaca caishuj mama llajtahuan macanacungacunami, shinallataj jatun mandajcunapurapish macanacungacunami. Huañuchij millai ungüicuna, yaricaicuna, ch'ican ch'ican llajtacunapi pamba chujchushpa allpa t'imburicunapishmi tiyanga.

⁸ Cai tucui llaquicunaca, nanai callaricuj shinallami canga.

⁹ Chai punllacunapica cancunataca llaquichichun prezuchingacunami, huañuchingacunami. Ñucata caticushcamantaca tucuicunami p'iñangacuna.

¹⁰ Chaipica achcacunami ñucata caticushcamanta saquirishpa huañuchijcunaman caishuj chaishuj japichingacuna, caishujmanta chaishujmantapishmi p'iñanacungacuna.

¹¹ Llulla profetacunapish achcacuna shamushpami, achcacunata umangacuna.

¹² Millai yallitaj mirajpica, achcacunapaj c'uyaimi chiriyanga.

¹³ Ashtahuanpish tucuringacama catijllami quishpiringa.

¹⁴ Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai q'uipami cai shina causaica tucuringa.

¹⁵ Chingachij millai runa Diospaj jucha illaj huasipi cajta ricushpaca, profeta Daniel chashna canata huillashcami pajtacunga. (Maijanpish rezajca entendichun).

¹⁶ Chaipica, Judeapi causajcunaca urcucunapi miticugrichun.

¹⁷ Huasi jahuapi cajpish, ima charishcata apanaman ama yaicuchun.

¹⁸ Shinallataj chagrapi cajpish, churanata apanaman ama tigrachun.

¹⁹ Chichu huarmicunapish, chuchucuj huahuayujcunapish chai punllacunapica ¡aij imachari tucunga!

²⁰ Cancuna miticushpa rina punllaca, tamya punllacunapi, samana punllapipish amalla cachun Diosta mañaichij.

²¹ Chai punllacunaca jatun llaquimi canga. Cai pacha callarimanta cunancama chashna llaquica mana tiyashcachu, cutinpish manataj tiyangachu.

²² Chai llaqui punllacunata Dios mana utca tucuchijpica, pi mana causanmanchu. Ashtahuanpish Diosca pai agllashcacunata c'uyashcamantami, chai llaqui punllacunataca utca tucuchinga.

²³ Chai punllacunapi maijanpish cancunata: “Riquichij, Cristoca caipimari, mana cashpaca chaipimari” nijpipish, amataj cringuichijchu.

²⁴ Chai punllacunaca: “Ñucami Cristo cani” nishpa llullajcunapish, profetami canchij nishpa llullajcunapish tiyangami. Chai llullajcunaca jatun ricuchinacunata, milagrocunata rurashpami, umangacuna. Dios agllashcacunatapish crichi tucushpaca crichingacunami.

²⁵ Ñucaca ñaupamanmi imalla tucuna cashcataca ña huillani.

²⁶ Chaimanta maijanpish cancunamanca: “Riquichij, Quishpichijca shitashca pambapimi” nijpipish, ama ringuichijchu. Mana cashpaca: “Riquichij, huasi ucupimi” nijpipish, ama cringuichijchu.

²⁷ Ashtahuanpish Runa Aichayuj shamushpaca, inti llujshin ladomanta relampa achij nishpa inti huashicun ladoman achijyachij shinami shamunga.

²⁸ Maipimi huañushcacuna siricun, chaipimi ullahuangacunaca tandanacungacuna– nircami

Runa Aichayuj ima shina tigramunami

²⁹ Chai jatun llaqui punllacuna ña tucurijpica, intica amsayangami, lunapish mana achijyachingachu. Luzerocunapish jahua pachamanta urmangacunami, jahua pachapi jatun mana cuyuripajcunapish cuyuringami.

³⁰ Chaipimi jahua pachapi, Runa Aichayuj shamucujta ricuchij señal ricurijpi tucui cai pacha aillucunaca, Runa Aichayujca jahua pachamanta p'uyupi tucuita rurai tucuj cashcahuan, achijnicuj sumaj shamucujta ricushpa huacangacuna.

³¹ Paipaj angelcunatami cachanga. Paicunami trompetapi sinchita tocashcahuan, cai pachapi tiyaj tucui llajtacunamantaca Runa Aichayujpaj agllashcacunataca uramanta janajmanta tucuicunata tandachingacuna.

³² Higo yura ima shina cajta ricushpa yuyarichigari: Higo yurapi caj ramacuna verdeyashpa p'angacuna huiñashpa, jundarijpimi, usia punllacuna ña chayamucushcata yachanguichij.

³³ Chashnallatajmi cai ñuca huillashcacuna pajtacujta ricushpaca, Runa Aichayuj shamunaca pungullapi cashcata cancunaca yachanguichij.

³⁴ Cunan punllacunapi causacujcunaca, cai huillashcacuna pajtangacama manaraj huañungacunachu. Chashnatajmi canga.

³⁵ Jahua pachapish, cai pachapish tucuringami. Ashtahuanpish ñuca huillashca shimicunaca manataj tucuringachu.

³⁶ Ima punlla ima hora shamunataca pi mana yachanchu. Jahua pachapi caj angelcunapish mana yachancunachu, ñuca Yayallami yachan.

³⁷ Noé causai punllacuna ima shinami carca, chashnallatajmi Runa Aichayuj shamunapajpish canga.

³⁸ Yacu juilluta Dios cachanapajpish allita micushpa, ubyashpa, cazarashpa, cazarachishpami causarcacuna. Huambuj huasiman Noé yaicungacamami, chashnallataj catircacuna.

³⁹ Paicunaca yacu juillu shamushpa, tucuicunata chingachingacama mana entendircacunachu. Runa Aichayuj shamunapajpish chashnallatajmi canga.

⁴⁰ Chai punllapica, ishqui runacunami chagrapi canga: Shujca apashca, caishujca saquishcami canga.

⁴¹ Ishqui huarmicunami shuj molinopi cutacunga: Shujca apashca, caishujca saquishcami canga.

⁴² Cancunata Mandaj ima hora shamunata mana yachashcamanta, chaparacuichij.

⁴³ Ashtahuanpish caita yuyarichij: Ima hora shuhua shamunata huasiyuj yaya yachashpaca, chaparashpami paipaj huasiman yaicuchunca mana saquinman.

⁴⁴ Runa Aichayujpish mana yuyashca horaspi shamuna cashcamanta, cancunapish allichirishca chaparaichij.

Allita rurajpish, mana allita rurajpish servijcunami

⁴⁵ ¿Maijanshi ima rurana cashcata chaitataj ruraj servijca canga? Amo paipaj huasipi cajcunaman carana horaspitaj carachun saquijpi, chashnataj ruraj servijmari alli runaca.

⁴⁶ Chashna ruracujpi paipaj amo shamushpaca paipajta rurajtaca cushichingami.

⁴⁷ Paipaj tucui charishcacunata ricuj cachunpishmi chai amoca churanga. Chashnatajmi canga.

⁴⁸ Mana alli millai servijca: “Ñuca amoca manaraj shamungachu” nishpa paipaj shungullapi yuyashpami,

⁴⁹ amopajta ruraj caishujcunata macashpa, machajcunahuan micushpa, ubyashpami puri callaringa.

⁵⁰ Chashna puricujpimi chai servijpaj amoca, pai mana yuyashca punllapi, mana yuyashca horaspi tigramunga.

⁵¹ Chaipimi paipajta rurajtaca jatunta llaquichishca cachun, mishqui shimi jayaj shungucunahuan churanga. Chaipica jatunta huacana, quirucuna canirinami canga.