Mateo 22 - Dios Rimashca Shimicunami

Cazamento bodamanta yuyachishpa parlashcami

¹ Jesusca yuyachij parlocunallahuantajmi, ashtahuan cashna nishpa cutichirca:

² “Jahua pachamanta mandacunca, shuj jatun mandaj paipaj churita cazarachicushpa bodata ruraj shinami.

³ Chai mandajca bodaman cayashcacunata pushamuchunmi, paipajta rurajcunata cacharca. Ashtahuanpish paicunaca mana shamushun nircacunachu.

⁴ Mana shamushun nijpimi, jatun mandajca paipajta ruraj shujtajcunata, cashna nishpa cutin cacharca. Cayashcacunamanca cashna nigrichij: “Micuicunataca ñami allichishca. Huagracunatapish, huira animalcunatapish ñami huañuchichini. Tucuimi ña allichishca, bodaman shamuichij nishpa pushamugrichij” nircami.

⁵ Ashtahuanpish chai cayashcacunaca, mana uyashpami: Shujca paipaj chagra ruraiman, caishujca paipaj c'atunaman rirca.

⁶ Maijancunaca cachashca servijcunata japishpa, macashpami huañuchircacuna.

⁷ Chaita jatun mandaj uyashpaca p'iñarishpami, chai huañuchijcunata huañuchichun, paicunapaj pueblotapish rupachichun, paipaj soldadocunata cacharca.

⁸ Chaimi paipajta rurajcunataca cashna nirca: “Bodaca ña allichishcatajmi. Ashtahuanpish cayashcacunallatajmi bodaman shamunapajca mana cashcacunata ricuchincuna.

⁹ Paicuna mana shamujpica, cunanca jatun ñan llujshincunaman rishpa, mashna ricurijcunata bodaman cayamugrichij” nircami.

¹⁰ Chaimi paipajta rurajcuna ñancunaman rishpaca, tucui ricurijcunatami, allicunatapish, mana allicunatapish tandachimujpi shamujcunaca boda huasipi jundarcacuna.

¹¹ Cayashcacunata jatun mandaj ricunaman yaicushpaca, bodaman rina churanahuan mana caj shuj runatami ricurca.

¹² Paitaca: “Amigo, ¿ima shinataj bodaman shamuna churanahuan mana cashpapish, caimanca yaicumurcangui?” nijpi, paica imata mana ni tucurcachu.

¹³ Jatun mandajca, paipajta rurajcunataca cai runataca: “Chaquita, maquita huatashpa, canlla amsaman shitaichij. Chaipica jatunta huacana, quirucuna canirinapishmi canga”.

¹⁴ Cayashcacunaca achcacunami ashtahuanpish agllashcacunaca ashallami” nircami.

Tributomanta tapushcami

¹⁵ Chai q'uipami fariseocuna rishpaca, Jesús ima mana allita nijpica, juchachingapaj nishpa parlanacushpaca,

¹⁶ paicunapaj yachacujcunataca, Herodespura caj maijancunandij cashna nichun cacharcacuna: –Yachachij, canca imatapish ima shina cashcatataj yachachijmi cangui. Diosta ima shina cazunatapish chaitataj yachachijmi cangui. Pita mana manchashpa paicunapi alli ricuringa raicullaca mana yachachijchu cangui.

¹⁷ Chaimantami caita tapushun ninchij: Cesarman tributota cunaca mandashcapi nishca shinaca ¿allichu canga, imashi? ¿Canca ima ninguitaj?– nishpami tapurcacuna.

¹⁸ Jesusca, paicuna millai shunguhuan nicujta yachashpami, cashna nirca: –Mishqui shimi jayaj shungucuna, ¿ima nishpataj ñucataca umashun nicunguichij?

¹⁹ Tributopaj cullquita ricuchichij– nijpica, shuj denario cullquitami ricuchircacuna.

²⁰ Chaimi Jesusca: –¿Pipaj ñahuitaj, pipaj shutitaj?– nishpa tapujpi,

²¹ paicunaca: –Cesarpajmi– nijpi Jesusca: –Cesarpajtaca paiman cuichij, Diospajtaca Diosman cuichij– nircami.

²² Chaita uyashpaca mancharinacushpa rircallacunami.

Huañushcacuna causarinamanta tapushcami

²³ Chai punllallatajmi, huañushcacunaca mana causaringachu nij saduceocuna Jesusta tapunaman shamushpaca:

²⁴ –Yachachij, maijan manaraj huahuata charishpa huañujpica, chai viuda huarmihuanca huañujpaj huauqui cazarashpa, huauquipaj randi huahuacunata charichun nishpami Moisesca yachachishca.

²⁵ Chaipi nishca shinallatajmi ñucanchijpurapica, canchis huauquindij tiyarca. Punta huauquimi cazararca. Paica huahuacunata manaraj charishpami huañurca. Chai viuda huarmihuanca q'uipa huauquimi cazararca.

²⁶ Q'uipa huauquipish, chaipaj cati huauquipish canchis huauquindijtajmi mana huahuacunata charishpa huañurcacuna.

²⁷ Tucuicunapaj q'uipaca, chai viuda huarmipish huañurcami.

²⁸ Chai huarmica huañushcacuna causarimui punllapica, chai canchishuantaj cazarashca cashcamantaca ¿maijanpajshi canga?– nircacunami.

²⁹ Chaimi Jesusca: –Cancunaca Quillcachishcacunatapish mana yachashcamanta, Diosca tucuita rurai tucuj cashcatapish mana entendishcamantami pandaricunguichij.

³⁰ Huañushcacuna causari punllapica, mana cazarangacunachu, cazarachinapish mana tiyangachu. Ashtahuanpish paicunaca, jahua pachapi caj Diospaj angelcuna shinami cangacuna.

³¹ Huañushcacuna causarinamanta Dios ima nishcataca ¿manachu rezarcanguichij? Paica cashnami nirca:

³² “Ñucaca Abrahampaj Dios, Isaacpaj Dios, Jacobpaj Diosmi cani” nircami. Chaimanta Diosca mana huañushcacunapaj Dioschu, ashtahuanpish causajcunapaj Diosmi– nircami.

³³ Jesús yachachishcata uyashpaca gentecunaca achcatami mancharircacuna.

Mandashcacunamantaca maijantaj ashtahuan yalli alli nishcami

³⁴ Jesús cutichishpaca saduceocunata upallachishcata uyashpami fariseocunaca tandanacurcacuna.

³⁵ Fariseocunapuramanta Mandashca ima nisha nishcata shuj yachachijmi, Jesusta pandachingapaj cashna nishpa tapurca:

³⁶ –Yachachij, Mandashcacunamantaca ¿maijantaj ashtahuan yalli alli?– nijpimi,

³⁷ Jesusca: –“Cambaj Mandaj Taita Diosta tucui shunguhuan, tucui almahuan, tucui yuyaihuan c'uyangui” ninmi.

³⁸ Cai mandashcami tucuimanta ashtahuan yalli allica.

³⁹ Q'uipa mandashcapipish: “Can quiquinta shinallataj shujtajcunatapish c'uyangui” ninmi.

⁴⁰ Mandashcacunapipish, profetacuna huillashcacunapipish cai ishqui mandashcacunami tucuimanta yalli alli– nircami.

¿Cristoca pipaj churitaj?

⁴¹ Tandanacushca fariseocunatami Jesusca:

⁴² –Cristomantaca ¿imatataj yuyanguichij? ¿Pipaj Churitaj canga?– nishpa tapujpi, paicunaca: –Davidmantami– nircacunami.

⁴³ Chaimi Jesusca: –Shinashpaca ¿ima nishpataj Davidca, Diospaj Espíritu yuyaita cujpi Cristotaca, Mandajmi nishpa cashna nirca?:

⁴⁴ “Jatun Diosca, ñucata Mandajtaca: Canta p'iñajcunata cambaj chaqui sarunapi churangacama, ñuca alli ladoman tiyarilla” nircami.

⁴⁵ Davidllataj ñucata Mandaj nijpica ¿ima shinataj Cristoca paipaj churica cangari?– nijpica,

⁴⁶ pi mana imata ni tucurcacunachu. Chai punllamanta pi mana ashtahuan imata tapurcacunachu.