Mateo 21 - Dios Rimashca Shimicunami

Jerusalenman Jesús yaicushcami

¹ Jerusalenman chayagricushpaca, Olivocuna tiyan urcu chaquipi caj Betfageman chayashpaca Jesusca ishqui yachacujcunata cachashpaca,

² cashnami nirca: “Chai ch'imbanij uchilla llajtaman richij. Chaiman chayaihuanmi, shuj mama burro huatashca, huahua burrondij cajta japinguichij. Chaicunata cacharishpa pushamuichij.

³ Cacharicujpi pi imata nijpica: Mandaj Jesusmi pushaj cacharca, ñallami saquij cachanga ninguichij” nircami.

⁴ Tucui caicunaca, profeta cashna huillashcami pajtarca:

⁵ “Sionpi causajcunamanca: Cancunapaj jatun Mandajca, manso shungumi. Burropi tiyarishcami cancunapajman shamucun. Aparij burropaj huahua burropi tiyarishcami shamucun nichij” nishcami carca.

⁶ Yachacujcuna rishpaca, Jesús mandashca shinami rurarcacuna.

⁷ Mama burrota huahuandij pushamushpami, paicunapaj churanacunata burrocunapaj jahuapi churajpi, Jesusca tiyarirca.

⁸ Achca gentecunami paicunapaj churanacunata Jesús ricun ñanpi mantarcacuna. Shinallataj shujtajcunaca yura ramacunata p'itishpami, ñanpi mantarcacuna.

⁹ Chai tucui ñaupashpa catishpa ricujcunaca: –¡Hosanna Davidpaj Churi! ¡Jatun Diospaj shutipi shamucujtami alli ninchij! ¡Hosanna cantaca jahua pachapipish alli nishca cachun!– nishpami caparircacuna.

¹⁰ Jerusalenman Jesús yaicujpica, tucui chai pueblopi cajcunami: –¿Pitaj caica?– nishpa,

¹¹ tapunacucujpimi: –Caica, Galileapi caj Nazaretmanta profeta Jesusmi– nircacuna.

Diospaj huasipi c'atujcunata Jesús llujshichishpa cachashcami

¹² Diospaj huasiman Jesús yaicushpaca, c'atucujcunata, randicujcunatapish tucuicunatami llujshichishpa cacharca. Cullquita cambiajcunapaj mezacunatapish, palomacunata c'atujcuna tiyarinacunatapish t'angashpa pambaman shitashpaca,

¹³ Jesusca: “Dios Quillcachishcapica: “Ñuca huasica, ñucata mañana huasimi canga” ninmi. Ashtahuanpish cancunaca shuhuacunapaj jutcutamari rurashcanguichij” nircami.

¹⁴ Diospaj huasipi Jesús cajpimi, mana ricujcunapish, chulla chaqui illajllacunapish paipajman c'uchuyamujpi alliyachirca.

¹⁵ Curacunata mandajcunapish, mandashcacunata quillcajcunapish milagrocunata Jesús ruracujta ricushpa, huambracunapish: “¡Hosanna Davidpaj Churi!” nishpa Diospaj huasipi caparicujta uyashpami p'iñarishpa,

¹⁶ Jesustaca: –¿Caicuna imata nicujtaca uyanguichu?– nijpi, Jesusca: –Ari uyanitajmari: “Uchilla huahuacunahuan, chuchucuj huahuacunahuanmi alli nichisha” nishcataca quillcachishcapica ¿manatajchu rezashcanguichij?– nircami.

¹⁷ Jesusca Jerusalenmantaca paita p'iñajcunapajmanta anchushpa rishpaca Betaniamanmi rirca. Chaipimi saquirirca.

Mana p'ucuj higo yurata Jesús chaquichishcami

¹⁸ Cayandij tutamanta Jerusalenman tigracushpa yaricachishpami Jesusca,

¹⁹ higo yura ñan c'uchullapi cajta ricushpa c'uchuyarca. Ashtahuanpish chai yuraca, imata mana p'ucushca p'angacunalla cajta ricushpami: –¡Cunanmantaca canpica amataj p'ucuchun!– nijpica higo yuraca chaquircallami.

²⁰ Yachacujcuna chaita ricushpaca, mancharinacushpami: –¿Ima nishpataj higo yuraca can rimanca chaquirinchu imamí?– nircacuna.

²¹ Chaimi Jesusca: –Mana caita chaita yuyashpa crishpaca, cai higo yurata chaquichishca shinallaca mana ruranguichijmanchu. Ashtahuanpish cai urcuta: “¡Caimanta anchushpa, mama cucha yacupi siririgri”! nijpica chashna tucunmanllami. Chaica chashnatajmi canga.

²² Tucui imatapish crishpa Diosta mañashpaca, chasquinguichijmi– nircami.

Jesusca mandajmi

²³ Diospaj huasiman chayashpa Jesús chaipi yachachicujpimi, curacunata mandajcunapish, israelcunapaj cunaj yuyajcunapish, c'uchuyashpaca: –¿Pi mandajpitaj chashna rurangui? ¿Pitaj chashna rurachun cantaca mandarca?– nishpami tapurcacuna.

²⁴ Chaimi Jesusca: –Ñucapish cancunata, shuj tapunata tapusha. Chaita cutichijpica, pi mandajpi caicunata ruracushcataca ñucapish huillashami.

²⁵ Bautizaj Juan bautizachunca ¿Dioschu, runacunachu pitaj cachashca canga?– nishpa tapujpimi paicunapura parlanacushpaca, cashna ninacurca: –Juantaca Dios cachashcami nijpica: “Shinashpaca ¿ima nishpataj pai huillashcataca mana crircanguichij?” ningami.

²⁶ Runacunallami Juantaca cacharca ninatapish mana ni tucunchijchu nircacunami. Tucuicuna Juantaca profeta cashcata ninacucushcamanta paicunata manchashcamantami imata mana ni– tucurcacuna.

²⁷ Paicunaca: –Mana yachanchijchu– nishpa cutichijpimi Jesusca: –Ñucapish pi mandajpi chashna rurashcataca mana huillanichu– nirca.

Ishqui churicunamanta yuyachishpa parlashcami

²⁸ Caita parlajpica ¿imatataj yuyanguichijman? Shuj runami ishqui churita charirca. Punta churitaca: “Huahua, cunan punllaca ñuca chagrapi uvasta pallagri” nircami.

²⁹ Chaimi paica: “¡Mana rishachu!” nirca. Ashtahuanpish shina nishca cashpapish, alli yuyarishpaca rircallami.

³⁰ Shinallataj q'uipa churitapish, chashnallatajmi nirca. Paica: “Ari Yayitu, rishami” nishpapish, mana rircachu.

³¹ Chai ishquimantaca ¿maijantaj paipaj yaya munashcata rurarca?– nijpi, paicunaca: –Punta churiyari– nircacunami. Chaimi Jesusca: –Impuestota japijcuna, huainayashpa causajcunarajmi, jahua pachamanta Dios mandacujpica paicunaraj punta yaicungacuna. Chaica chashnatajmi canga.

³² Juanca cashcata ruraj tucunapaj ñanmanta yachachingapajmi cancunapajmanca shamurca. Pai yachachishcataca mana crircanguichijchu. Ashtahuanpish impuestota japijcuna, huainayashpa causaj huarmicunarajmi crircacuna. Cancunaca chaita ricushpapish Juanca allitami huillacun nishpa mana yuyaita japircanguichijchu. Chaimi mana cutirishpa mana crircanguichij.

Millai chagrajcunamanta yuyachishpa parlashcami

³³ Shujtaj yuyachij parlotapish uyaichij: Shuj runami tiyarca. Chai runaca paipaj allpapi uvascunata tarpushpami, chaitaca muyundijta pircashpa, uvascunata capingapaj shuj jutcuta, chapangapaj shuj torretapish rurarca. Chaimantaca shujtaj chagrajcunaman arrendachishpami caru llajtaman rirca.

³⁴ Uvascunata tandana punllacuna pajtajpica, paipaj cana cashcata chasquimuchunmi paipajta rurajcunata chagrajcunapajman cacharca.

³⁵ Ashtahuanpish chagrajcunaca amopajta rurajcuna chayajpica, shujtaca macashpa, caishujtaca huañuchishpa, shujtajtaca rumicunahuanmi shitarcacuna.

³⁶ Chagrayujca cutinmi paipajta ruraj shujtajcunata ñaupata yalli achcacunata cacharca. Paicunatapish ñaupaman cachashcacunata shinallatajmi llaquichircacuna.

³⁷ Tucui chaicunapaj q'uipaca chagrayujca: “Ñuca churitaca cazungami” nishpami, paipaj churita cacharca.

³⁸ Chai churi chayajpi paita ricushpaca, chagrajcunaca: “Caimari paipaj churi cai tucuitaca paimari japinga. Pai japinataca ñucanchij japingapaj shamuichij huañuchishunchij” nircacunami.

³⁹ Chaipi paita japishpami uvas chagramanta llujshichishpa canllaman paitaca huañuchircacuna.

⁴⁰ Chashna rurajcunataca chagrayuj amo shamushpaca ¿imatashi ruranga?– nircami.

⁴¹ Chaimi paicunaca: –Chashna millaicunataca, mana llaquishpami huañuchinga. Uvas chagratapish p'ucunca chaupishpa cuj shujtaj chagrajcunamanmi arrendachinga– nircacunami.

⁴² Chaimi Jesusca: –“Huasita shayachijcuna yanganchishpa shitashca rumillatajmi, callaripi churana rumi tucushca. Chaitaca Jatun Diosllatajmi chashna rurashca. Chaita ricushpaca mancharishpami cushicunchij” nishpa quillcachishcataca ¿manatajchu rezarcanguichij?

⁴³ Chaimanta cashnami nini: Dios mandacunpi cancuna cana cashcata quichushpami, paipaj granota p'ucujcunaman cunga.

⁴⁴ Maijanpish cai rumi jahuapi urmashpaca, p'aquiringami. Ashtahuanpish maijanpaj jahuapi cai rumi urmashpacarin ñutungami– nircami.

⁴⁵ Chai yuyachij parlocunata uyashpami, curacunata mandajcuna, fariseocunapish paicunallatataj rimacushcata entendishpa,

⁴⁶ Jesusta ima shina japinata yuyarishpapish, gentecuna profetami nicushcamanta mancharcacuna.