Mateo 19 - Dios Rimashca Shimicunami

Manataj shitanacunachu nishpa Jesús yachachishcami

¹ Chashna yachachishca q'uipami Jesusca Galilea llajtamantaca Jordán yacu ch'imbanij Judeapi caj llajtacunaman rirca.

² Jesús chaiman ricujpica achcacuna catishpa ricujpimi, ungushca cajcunata alliyachirca.

³ Chaipimi fariseocunaca Jesús mana allita nijpica juchachishun nishpa c'uchuyashpaca: –Cusaca, paipaj huarmita ¿imapi mana alli cajpica shitanalla ninchu?– nircacuna.

⁴ Chaimi Jesusca: –Diosca callaripi tucuita ruracushpaca, “Shuj c'ari shuj huarmillata rurashcataca” ¿manachu rezashcanguichij? nishpaca,

⁵ cashnapishmi nirca: “Chaimanta c'arica, yaya mamata saquishpa, paipaj huarmihuan tandanacushpa, ishquindijmanta shuj aichallami tucunga” nircami.

⁶ Chaimanta ña mana ishquichu, shuj aichallami. Dios tandachishcataca, ni pi amataj ch'icanyachichun– nircami.

⁷ Chaimi fariseocunaca: –¿Ima nishpataj Moisesca, huarmita shitashcata ricuchij quillcata cushpaca shitanallami nishpa mandarca?– nircacuna.

⁸ Shina nijpi Jesusca: –Cancunaca rumi shungucuna cajpimi, Moisesca cancunapaj huarmicunata shitachun saquirca. Ashtahuanpish callaripica, mana chashnachu carca.

⁹ Ñucaca cashnami nini: Maijanpish paipaj huarmita manapish huainayajpi shitashpa shujtajhuan cazarajca, huainayanmi. Shinallataj cusa shitashca huarmihuan cazarajpish huainayanmi– nircami.

¹⁰ Chaimi paipaj yachacujcunaca: –C'arica paipaj huarmita manataj shitana cajpica, mana cazaranami alli canman– nircacuna.

¹¹ Chaimi Jesusca: –Mana cazaranataca mana tucuicuna chasqui tucunchu. Ashtahuanpish Dios chaita cushcacunallami chasqui tucuncuna.

¹² Maijancunaca mamapaj huijsamantatajmi capashca shina huacharincuna. Maijancunaca runacuna capashca cashcamantami mana cazarai tucuncuna. Maijancunaca jahua pachapi caj Diospajllata rurangapajmi chashna tucuncuna. Maijanpish chashna cai tucunata charishpaca chashna rurachunlla– nircami.

Huahuacunapaj umapi maquita Jesús churashcami

¹³ Chaimanca huaquin huahuacunatami, paicunapaj jahuapi maquita churashpa Diosta mañachun, Jesuspajman pushamurcacuna. Ashtahuanpish yachacujcunaca sinchita rimashpami jarcarcacuna.

¹⁴ Chaimi Jesusca: –Huahuacuna ñucapajman shamuchun saquichij, ama jarcaichijchu. Cai huahuacuna shina tucujcunatami jahua pacha Diosca mandacun– nircami.

¹⁵ Jesusca huahuacunapaj jahuapi maquita churashca q'uipaca, chaimanta rircallami.

Achcata charij moso Jesusta tapushcami

¹⁶ Chaimanta Jesús ricujpimi, achcata charij moso c'uchuyashpaca: –Yachachij canca allimari cangui. Huiñai causaita charingapajca ¿ima allitataj rurana cani?– nijpimi,

¹⁷ Jesusca: –¿Ima nishpataj ñucataca alli ningui? Allica pi mana tiyanchu, shujllami tiyan, chaica Diosmi. Ashtahuanpish huiñai causaiyuj canaman yaicungapajca, Dios mandashcacunata cazui– nircami.

¹⁸ Chaimi chai mosoca: –¿Chaicunaca maijanllatagari?– nijpi, Jesusca: –Ama huañuchingui, ama huainayangui, ama shuhuangui, ama llullashpa huillangui.

¹⁹ Cambaj yaya mamata alli ningui. Shujtajcunatapish can quiquinta shinallataj c'uyangui ninmi– nircami.

²⁰ Shina nijpi chai mosoca: –Tucui caicunataca, huahuamanta pachami ruracuni. ¿Ima shujtajtaj illan?– nirca.

²¹ Chaimi Jesusca: –Diospaj ñaupajpi tucuita pajtachij cashca ricuringapajca, can imalla charishcacunata tucui c'atushpa, huajchacunaman cugri. Jahua pachapimi, achcata charingui. Chai q'uipa ñucata catingui tigramugri– nircami.

²² Chai moso uyashpaca, achcata charij cashcamantaca llaquirishpa rircallami.

²³ Chaimi Jesusca, paipaj yachacujcunataca: –Jahua pachamanta mandacujpica, achcata charijca mana jahualla yaicui tucungachu. Chaica chashnatajmi canga.

²⁴ Cutin cashnami nini: Shuj camellorajmi auja rinrintaca jahualla pasan. Dios mandacujpi shuj charij chaiman yaicunaca, chaitapish yalli sinchimari– nircami.

²⁵ Jesuspaj yachacujcunaca, achcata mancharinacushpami: –Shinashpaca ¿pitaj quishpiri tucungari?– nircacuna.

²⁶ Jesús paicunata chaparashpaca: –Gentecunapajca caica sinchitajmari, ashtahuanpish Diospajca imapish jahuallami– nirca.

²⁷ Chaimi Pedroca: –Ñucanchij tucuita saquishpa, quiquinta catishcamantaca ¿imatataj charishun?– nishpa tapurca.

²⁸ Chaimi Jesusca: –Dios tucuita mushujyachi punllapimi, Runa Aichayujca paipaj sumaj jatun tiyanapi tiyaringa. Cancunapish ñucata catishcamantaca, chaipimi chunga ishqui jatun tiyanacunapi tiyarishpa chunga ishqui Israel aillucuna imalla rurashcata paicunaman ricuchinguichij. Chaica chashnatajmi canga.

²⁹ Maijanpish paipaj huasita, huauquicunata, panicunata, yaya mamata, huarmita, huahuacunata, allpacunata saquishpa ñucata catishcamantaca, patsaj cutinhuan yallitami japinga. Huiñai causaitami chasquinga.

³⁰ Ashtahuanpish cunan puntapi cajcunaca, achcacunami huashayachishca cangacuna. Cunan huashaman cajcunaca, puntapi churashcami cangacuna.