Mateo 17 - Dios Rimashca Shimicunami

Jesusca shujtajyarishcami

¹ Sujta punlla q'uipami Jesusca, Pedrota, Jacobota, Jacobopaj huauqui Juantapish paicunallata pushashpa, shuj jatun urcuman rirca.

² Chaipimi Jesusca paicunapaj ñaupajpi shujtajyarirca. Paipaj ñahuipish inti shina lamyacujmi tucurca. Paipaj churanacunapish, luz shina yurajllami tucurca.

³ Chaipica Moisespish, Eliaspish Jesushuan parlanacucujmi ricurirca.

⁴ Chaita ricushpami Pedroca, Jesustaca: “Amito, ñucanchij caipi canaca allimari cashca. Can munajpica, quimsa chugllacunata rurashun: Shujtaca cambaj, caishujtaca Moisespaj, chaishujtaca Eliaspaj” nircami.

⁵ Pedro chashna rimacujpirajmi, paicunapaj jahuaman achijnicuj p'uyu shamushpa taparca. Chai p'uyumantaca: “Caimi, ñuca c'uyashca Churi. Paipimi cushicuni. Paita uyaichij” nishpa rimashcami uyarirca.

⁶ Chaita uyashpami yachacujcunaca achcata mancharishpa cungurishpa urisinga sirirircacuna.

⁷ Jesús paicunapajman c'uchuyashpaca, maquihuan tuparishpami: “Jatarichij, ama manchaichijchu” nirca.

⁸ Paicuna huichilla ricushpaca, pi shujtajtaca mana ricurcacunachu, Jesuslla chaipi cajtami ricurcacuna.

⁹ Chai urcumanta uriyamucushpami, Jesusca paihuan rij yachacujcunataca: –Runa Aichayuj huañushcacunapaj chaupimanta causaringacama, muscuipi shina ricushcataca, pajta piman huillanguichijman– nishpa mandarca.

¹⁰ Chaipimi Jesuspaj yachacujcunaca: –¿Ima nishpataj mandashcata quillcajcunaca, Eliasrajmi shamunga nincuna?– nishpa tapujpi,

¹¹ Jesusca: –Ari, chaica chashnami. Eliasraj punta shamushpami, paica tucuita allichinga.

¹² Ashtahuanpish cancunamanca cashnami nini: Eliasca ñami shamurca. Ashtahuanpish paitaca mana rijsishpami, paicuna munashcata rurarcacuna. Runa Aichayujpish paicunapaj maquipi llaquita apangatajmi– nircami.

¹³ Yachacujcunaca, Bautizaj Juanmanta rimacushcatami entendircacuna.

Uraticu huambrata Jesús alliyachishcami

¹⁴ Gentecuna maipi canman Jesús paipaj yachacujcunandij chayamujpica, shuj runami paita ricushpa paipaj ñaupajman c'uchuyashpa cungurishpaca, cashna nirca:

¹⁵ –Amito, ñuca huahuata llaquihuayari. Uraticu tucushpami yallitaj llaquita apacun. Ninapipish, yacupipish achca cutinmi urman.

¹⁶ Cambaj yachacujcunapajmanpish apamurcanimi, paicunaca mana alliyachi tucurcacunachu– nircami.

¹⁷ Jesús cutichishpaca: –¡Huahua huahuami mana crij millaicuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? Chai huambrata caiman pushamuichij– nircami.

¹⁸ Supaita Jesús sinchita rimajpi chai supai chai huambramanta llujshijpica, chai pachamantami huambraca alliyashca saquirirca.

¹⁹ Yachacujcuna Jesuspajman c'uchuyashpaca: –¿Ima nishpataj ñucanchijca mana llujshichi tucushca cashun?– nishpami, paillata tapurcacuna.

²⁰ Jesusca paicunataca: –Cancunaca ashallata crijcuna cashcamantami mana llujshichi tucushcanguichij. Cashnatajmi nini: Uchilla mostaza muyu shinallatapish crinata charishpaca, cai urcutapish: “Caimanta chaiman ri” nijpica, rinmanmi. Imapish mana sinchi canmanchu.

²¹ Chai shina supaicunaca mana llujshinllachu, Diosta mañashpa ayunajllapimi llujshincuna– nircami.

Caihuanca ishqui cutin pai huañuna cashcata Jesús huillashcami

²² Jesusca paipaj yachacujcunandij, Galileapi cashpami cashna nirca: “Runa Aichayujtaca runacunapaj maquipi churajpi,

²³ huañuchingacunami. Ashtahuanpish quimsa punllapica causaringallami” nijpimi, paicunaca achcata llaquirircacuna.

Diospaj huasipaj impuestota cushcami

²⁴ Capernaumman paicuna chayajpimi, ishqui dracma cullquita japijcuna Pedropajman c'uchuyashpaca: –Cancunapaj Yachachijca Diospaj huasipajca ¿ishqui dracma cullquitaca manachu cunata yachan?– nijpi,

²⁵ Pedroca: –Ari– nirca. Huasiman Pedro yaicugrijpica Jesusrajmi: –¿Imatataj yuyangui, Simón? Cai pachapi jatun mandajcunaca ¿maijancunamantataj tributocunata, impuestocunataca japincuna? ¿Paicunapaj llajtapi causajcunamantachu, mana cashpaca shujtaj llajtamanta shamushcacunapajtachu japincuna?– nirca.

²⁶ Shina nijpi Pedroca: –Shujtaj llajtamanta shamushcacunapajtami japincuna– nijpi, Jesusca: –Shinashpaca, quiquin llajtapi causajcunaca mana cunachu.

²⁷ Shina cajpipish cullquita japijcunata ama p'iñachingapaj, cuchaman rishpa, chalhua japina ipita cuchapi shitashpa, punta llujshij chalhuata japishpa, shimita pascashpaca shuj cullquitami japingui. Chaitaca ñucamanta, canmantapish cugringui– nircami.