Mateo 13 - Dios Rimashca Shimicunami

Tarpujmanta yuyachij parlomi

¹ Chai punllallatajmi Jesusca huasimanta llujshishpaca, cucha uripi tiyarirca.

² Chaipica achca gentecuna paipajman c'uchuyamujpimi barcoman yaicushpa tiyarirca. Tucui gentecunaca, cucha uripimi carca.

³ Chaipimi Jesusca, achca yuyachij parlocunahuan parlashpa cashna nirca: “Tarpuj runami tarpunaman llujshirca.

⁴ Tarpunaman rishpa muyuta shitacujpica, asha muyuca ñanpimi urmarca. Chaitaca pajarocuna shamushpami micurca.

⁵ Asha muyuca, rumilla allpapimi urmarca. Chaipica mana achca allpa tiyanpi urmashcamantami utca huiñarca. Allpa mana ucujta cashcamantami chashna huiñarca.

⁶ Ashtahuanpish inti llujshishpa rupachijpica, jahualla sapi cashcamanta chaquirircallami.

⁷ Asha muyuca, casha chaupipimi urmarca. Cashacunapish huiñajpi augarishpa mana huiñai tucurcachu.

⁸ Ashtahuanpish alli allpapi urmaj muyuca, alli granotami p'ucurca. Shuj muyullamantami maijanca patsajta, maijanca sujta chungata, maijanca quimsa chungata granorca.

⁹ Maijanpish uyanapaj rinrinta charijca uyaichigari” nircami.

Yuyachij parlocunata imapaj parlashcami

¹⁰ Ña parlashca q'uipami, yachacujcuna paipajman c'uchuyamushpaca: –¿Ima nishpataj canta uyajcunamanca yuyachij parlocunallahuan rimanguiyari?– nircacuna.

¹¹ Shina nijpi Jesusca: –Taita Dios mandagrin, pi mana yachashca pacalla cajtaca, cancunamanmi ricuchishca. Ashtahuanpish paicunamanca, chaitaca mana ricuchishcachu.

¹² Pacalla cajta maijanpish yachajmanca ashtahuan cujpi ashtahuanmi yachanga. Ashtahuanpish mana yachajtaca, pai ashalla yachashcatapish quichungami.

¹³ Chaimantami yuyachij parlocunallahuan yachachini: Paicunaca ricushpapish mana ricuncunachu, uyashpapish mana uyashca shina tucushpami mana entendincuna.

¹⁴ Profeta Isaías cashna nishca shinallatajmi paicunaca tucun: “Uyaitapish uyanguichijmi, manataj entendinguichijchu. Ricuitapish ricunguichijmi manataj ricunguichijchu.

¹⁵ Cai llajtapi causajcunapaj shunguca rumiyashcami. Paicunapaj rinrinca tapashca shinami. Paicunapaj ñahuicunapish huichcashca shinami tucushca. Chaimanta uyashpapish mana uyashca shina tucuchun. Paicunapaj shungutapish ama cutirichun mana entendijta ruragri. Paicuna chashna tucujpimi, ñucaca mana alliyachisha” nircami. Chaimi pajtashca.

¹⁶ Ashtahuanpish cancunapaj ñahuica ricuj cashcamanta, cancunapaj rinrinca uyaj cashcamanta cushichishcami canguichij.

¹⁷ Profetacunapish, cashcata rurajcunapish cancuna ricucuntaca ricunaihuan cashpapish, mana ricurcacunachu. Cancuna uyacuntaca uyanaihuan cashpapish, mana uyarcacunachu. Chaica chashnatajmi– nircami.

Tarpujmanta parlashcata Jesús entendichishcami

¹⁸ “Uyaichij, tarpujmanta yuyachij parlota ñuca parlashcaca cashnami:

¹⁹ Lluchu ñanpi urmashca muyuca cashnami: Taita Dios mandagrinmanta huillashcata uyashpapish, mana entendijpica, paipaj shungupi tarpushcata, diablo shamushpa anchuchina cashcatami nisha nin.

²⁰ Rumilla allpapi tarpushca shinaca, alli huillaita uyashcahuan cushicushpa chasquijcunami.

²¹ Ashtahuanpish paipi sapi mana ucujta cajpimi llaqui japijpi, alli huillaita caticushcamanta llaquichina yuyailla llaquichijpica, ñitcarishpa manarajpish unipi ña saquirinlla.

²² Cashalla allpapi tarpushca shinaca, Diospaj Shimita huillashcata uyashpapish cai pachapi ima shinalla rurajcuna rurashca shina charijyana yuyaicunahuan umarishpami, huillashca Shimitaca chai yuyaicuna tapajpi, paicunapaj causaipica imata mana granon.

²³ Ashtahuanpish alli allpapi tarpushca shinaca, Diospaj Shimita huillashcata uyashpa, entendishpa alli granota p'ucujmi. Chaica shuj muyullamantami patsajta, sujta chungata, quimsa chungata granoj” nircami.

Trigomanta cizañamanta yuyachishpa parlashcami

²⁴ Cai yuyachij parlotapishmi Jesusca, cashna nishpa parlarca: “Jahua pachamanta mandacujpica, shuj runa paipaj allpapi alli muyuta tarpuj shinami canga.

²⁵ Tarpushca q'uipa tucuicuna dormicujpica, chagrayujta p'iñaj shamushpami, trigo tarpushcapi cizañata tarpushpa rirca.

²⁶ Trigo huiñashpa espigamujpica, cizañapish ricurircami.

²⁷ Chagrayujpajta rurajcuna ricushpa chagrayujpajman shamushpaca: “Amito, cambaj allpapica alli muyutamari tarpuchircangui. ¿Imamantachari cizañapishmari huiñashca?” nircacunami.

²⁸ Chaimi amoca: “Ñucata p'iñajmi chashna rurashca” nijpimi, paipajta rurajcunaca: “¿Chaitaca anchuchigrishunchu?” nircacuna.

²⁹ Shina nijpi amoca: “Cizañata anchuchicushpaca, ñataj trigotaraj anchuchinguichijman saquichijlla.

³⁰ Tandana punllacama ishquindijtaj huiñachun saquichijlla. Tandana punllapimi tandajcunataca: Cizañataraj tandashpa huataichij rupachingapaj. Trigotaca ñuca huasipi huaquichichij” nircami” nishpami parlarca.

Mostaza muyumanta yuyachishpa parlashcami

³¹ Cai yuyachij parlohuanpishmi, cashna nishpa parlarca: “Jahua pachamanta mandacujpica, mostaza muyuta shuj runa japishpa, paipaj allpapi tarpushca shinami tucunga.

³² Mostazaca, tucui muyucunamanta yalli uchijlla cashpapish, huiñashpaca huertapi tiyaj tucui yuracunata yalli jatunmi. Chashna jatun yura cajpimi, pajarocuna shamushpa, ramacunapica tazinta rurashpa chai ucupi causancuna” nircami.

Levaduramanta yuyachishpa parlashcami

³³ Shujtaj yuyachij parlohuanca: “Jahua pachamanta mandacujpica, shuj huarmi quimsa taza cutapi levadurahuan chapujpi, tucuita p'unguillichij shinami canga” nircami.

Yuyachij parlocunallahuantaj Jesús huillashcami

³⁴ Jesusca tucui caicunataca, yuyachij parlocunallahuanmi chaipi cajcunamanca parlarca. Yuyachij parlocuna illajllaca, mana parlarcachu.

³⁵ Paicunata chashna yachachishpaca: “Cai pacha callarimanta pacalla cajtaca yuyachij parlocunallahuanmi ñuca shimihuantaj parlasha” nishpa profeta huillashca pajtachunmi Jesusca chashna yachachirca.

Cizañamanta parlashcata Jesús entendichishcami

³⁶ Chaipi tucui cajcunata minchacamachij nishca q'uipami, Jesusca huasiman yaicurca. Chaipimi paipaj yachacujcuna paipajman c'uchuyashpaca: –Chagrapi cizaña huiñashcamanta yuyachij parlo imata nisha nishcata huillahuai– nircacuna.

³⁷ Jesús cutichishpaca: –Alli muyuta tarpujca, Runa Aichayujmi.

³⁸ Tarpuna allpaca, cai pachapi causajcunami. Alli muyu shinaca, Dios mandacujpi chaipi caj huahuacunami. Cizaña shinaca, diablopaj huahuacunami.

³⁹ Cizañata tarpujca p'iñaj diablomi. Tandanaca cai shina causai punllacuna tucurinami, tandajcunaca angelcunami.

⁴⁰ Cizañata p'itishpa rupachij shinami cai shina causai tucuri punllapipish canga.

⁴¹ Runa Aichayujca pai mandacui punllacunapi ñitcachishpalla causajcunata, millaita rurachijcunataca paipaj angelcunata cachashpa tandachichishpami,

⁴² nina rupacun hornopi shitanga. Chaipica jatunta huacana, quirucuna canirinami canga.

⁴³ Ashtahuanpish cashcata rurajcunaca, paicunapaj Yaya mandacunpimi inti shina achij nicungacuna. Maijanpish uyanapaj rinrinta charijca uyaichigari.

Pacashca cullquimanta Jesús parlashcami

⁴⁴ Allpapi pacashca cullquita shuj runa japishpaca, cushicushpami chaillapitaj pacashpa saquishpa tucui charishcacunata c'atushpa chai allpataca randin. Jahua pachamanta mandacunca chai shinami.

Sumaj valij perlami

⁴⁵ Jahua pachamanta mandacunca alli perlacunata mashcashpa randishpa, c'atushpa purij runa shinapishmi.

⁴⁶ Tucuimanta yalli alli perlata ricushpaca, paipaj tucui charishcacunata c'atushpami chai perlataca randin.

Linchimanta yuyachishpa parlashcami

⁴⁷ Jahua pachamanta mandacunca linchita mama cuchapi shitajpi, tucui laya chalhuacunata tandamuj shinami.

⁴⁸ Linchipi ña junda cajpica, cucha uriman llujshichishpa tiyarishpami allicunataca canastapi churan, mana allicunataca shitancuna.

⁴⁹ Cai shina causai tucuripipish chashnallatajmi canga. Chaipica angelcuna llujshishpami millaita rurajcunataca, cashcata rurajcunamanta ch'icanyachingacuna.

⁵⁰ Millaicunataca nina rupacun hornopimi shitanga. Chaipica jatunta huacana, quirucuna canirinami canga– nircami.

Mushujtapish maucatapish llujshichij shinami canga nishcami

⁵¹ Chai q'uipami Jesusca: –Cai tucui yachachishcacunataca ¿allichu entendircanguichij?– nijpi paicunaca: –Ari, amito– nircacuna.

⁵² Shina nijpi Jesusca: –Mandashcacunata yachachijcuna, jahua pachamanta mandacujpi yachacuj tucushpaca, shuj huasiyuj yaya paipaj sumaj charinacunata mushujtapish, maucatapish llujshichij shinami cangacuna– nircami.

Jesusca paipaj llajta Nazaretpi huillashcami

⁵³ Yuyachij parlocunata tucui parlashca q'uipaca Jesusca chaimantaca rircallami.

⁵⁴ Paipaj quiquin llajtaman shamushpami, chai llajtapi cajcunapaj sinagogacunapi yachachirca. Pai yachachishcamanta chai llajtapi causajcuna mancharinacushpaca: –¿Caica, maipishi cai shina yachaitaca yachamun? ¿Ima shinashi cai milagrocunatapish ruran?

⁵⁵ ¿Manachu caica carpinteropaj churilla? ¿Manachu paipaj mamapish María? ¿Manachu huauquicunapish Jacobo, José, Simón, Judas?

⁵⁶ ¿Manachu tucui paipaj panicunapish ñucanchij causan llajtallapitaj causancuna? Paica ¿maimantataj cai tucuicunataca llujshichinchu ímami?– ninacurcacunami.

⁵⁷ Paicuna mana crisha nijpimi Jesusca: –Maijan profetatapish shujtaj llajtapica allimi chasquin. Ashtahuanpish quiquin llajtapi cajcuna, quiquin huasipi cajcunaca mana alli nincunachu– nircami.

⁵⁸ Jesusca paita mana crijpimi, paipaj llajtapica mana achca milagrocunata rurarca.