Marcos 5 - Dios Rimashca Shimicunami

Supai japishca gadareno runami

¹ Ña chai cuchata ch'imbashpaca, gadarenocunapaj llajtamanmi chayarcacuna.

² Barcomanta Jesús llujshincami, mapa espíritu japishca shuj runaca Jesusta tupanaman shamurca. Paica panteonmantami llujshishpa shamurca.

³ Paica panteonllapimi causaj carca. Cadenacunahuanpish paitaca pi mana huatai tucurcacunachu.

⁴ Tauca cutinmi grillo nishca fierrohuan canichishpa, cadenacunahuanpish huatajcuna carca. Ashtahuanpish cadenacunata, canichishca fierrotapish ñutushpa shitajlla cajpimi, pi mana huatashpa churai tucurcacuna.

⁵ Chai runaca punllapish tutapish urcucunata, panteoncunatami caparirishpa, paillataj rumicunahuan chugririshpa puricujlla carca.

⁶ Jesustaca carumanta ricushcahuan callpashpa shamushpa paipaj ñaupajpi cungurishpaca,

⁷ shinchita caparishpami: –Jahua pachapi caj Taita Diospaj Churi Jesús ¿imatataj nij shamungui? Taita Diospaj shutipimi rogani. ¡Ñucataca ama llaquichipaichu!– nirca.

⁸ “Mapa espíritu, cai runamanta llujshi” nicujpimi chashnaca nirca.

⁹ Chai runataca Jesusca: –¿Ima shutitaj cangui?– nishpa tapujpica: –Achcacuna cashcamanta, Legión shutimi cani– nircami.

¹⁰ Cai llajtamantaca ama llujshichishpa cachahuaichu nishpami achcata rogarirca.

¹¹ Chai urcu c'uchullapimi, canlla cuchicuna puricurcacuna.

¹² Chaimi supaicunaca: –Chai cuchicunaman yaicungapaj richun saquihuai– nircacuna.

¹³ Paicuna rogarijpica Jesusca richun saquircallami. Chai mapa espiritucunaca, llujshishcahuan c'uchicunapimi yaicugrircacuna. C'uchicunaca ishqui huaranga shinami carca. Chai canlla cuchicunaca, c'aca quinrita singushpami cuchaman huashicushpa yacupi chingarircacuna.

¹⁴ Cuchicunata michijcunaca achcata mancharishpa pueblocunaman llajtacunaman callpashpa rishpami tucui imalla tucushcata huillarcacuna. Chaita uyajcunaca ima tucushcata ricungapajmi shamurcacuna.

¹⁵ Paicuna Jesuspajman chayashpaca, legión nishca supaicunata llujshichishca runataca, sano yuyaiyuj, churanacunatapish churarishca tiyacujta ricushpaca, achcatami mancharircacuna.

¹⁶ Chai runamanta supaicunata llujshichishcatapish, supaicunaca cuchicunaman yaicujpi cuchicuna imalla tucushcatapish ricujcunami tucuita parlarcacuna.

¹⁷ Chaita uyashpami, ricunaman shamujcunaca ñucanchij llajtamantaca llujshishpa ripai nircacuna.

¹⁸ Barcopi Jesús yaicugrijpimi, supai japishca cashca runaca, ñucatapish canhuan pushahuai nishpa rogarirca.

¹⁹ Ashtahuanpish Jesusca chai runata mana pushasha nishpami: –Cambaj huasiman rilla. Jatun Dios canta achcata c'uyashpa alliyachishcata cambaj familiacunaman tucuita parlagri– nirca.

²⁰ Pai rishpaca Decápolis llajtacunapimi Taita Dios paita c'uyashpa imallata rurashcata parlarca. Chaita huillajpica, tucuicunami mancharircacuna.

Jairopaj ushushimanta yahuar cacharirishca huarmimanta

²¹ Jesusca barcopi rishpaca chaishuj lado cucha urillamantajmi cutin tigrarca. Achcacuna shamushpa paipaj muyundijta shayarijpimi, chai cucha urillapitaj Jesusca saquirijpi,

²² sinagogapi pushaj Jairo shuti runa shamurca. Ña Jesusta ricushpaca, paipaj chaquiman cumurishpami:

²³ –Ñuca ushushimi ñalla huañugrin. Pai causachun paipaj jahuapi maquita churashpa alliyachinaman jacupai– nishpa achcata rogarca.

²⁴ Chai runahuan Jesús ricujpica, achcacunami llapirinacushpa caticurcacuna.

²⁵ Chaicunapurapica chunga ishqui huatata yahuar cacharirijpi llaquita apacuj shuj huarmipishmi carca.

²⁶ Paica jambij doctorcunapajman rishpapish manataj alliyashpami, tucui charishcacunallata tucuchishpa ashtahuan anchayacushcalla carca.

²⁷ Jesusmanta parlanacujta uyashpaca, chai tucuicunapaj chaupita rishpami huashamanta Jesuspaj churana puntapi tuparirca.

²⁸ Paica: Churana puntapi tuparishpalla alliyanata yuyacushcamantami,

²⁹ churana puntapi tuparinca yahuar cachariricushcaca chaquirircalla. Paipaj cuerpotaca llaquichicuj ungüimanta ña alliyachishcatami yacharca.

³⁰ Chai q'uipami Jesusca, paipaj alliyachina poder paimanta llujshishcata yachashpa tucuicunapajman tigrarishpaca: –¿Pitaj ñuca churanapi tuparinchu imamí?– nishpa tapujpi,

³¹ paipaj yachacujcunaca: –Cai tucui caticujcuna tandarinacushpa llapirinacucujta ricushca jahuachu: “¿Pitaj ñuca churanapi tuparinchu imamí?” nishpa tapungui– nircacuna.

³² Ashtahuanpish maijan tuparishcata ricungapajmi, paipaj muyundijpi cajcunata ricucurca.

³³ Chai huarmica paipi imalla tucushcata yachashcamanta, manchaihuan chujchushpa Jesuspajman shamushpami paipaj ñaupajpi cungurishpa cumurishpaca, ima shina tucushcata tucuita huillarca.

³⁴ Chaimi Jesusca: –Huahua, canca crishcamantami alliyachishca cangui. Sumajta causagrilla, cunanca alliyashcami saquiringui– nirca.

³⁵ Jesús rimacujpirajmi, sinagogapi pushajpaj huasimanta maijancuna shamushpaca: –Cambaj ushushica ñami huañun. Yachachijtaca ama ashtahuan p'iñachichu saquilla– nircacuna.

³⁶ Chaita Jesús uyashpami, sinagogapi pushajtaca: –Ama manchaichu, crinallami cangui– nirca.

³⁷ Chaimanta rishpaca pita mana pushasha nishpami, Pedrota, Jacobota, Jacobopaj huauqui Juanllata pushashpa rirca.

³⁸ Sinagogapi pushajpaj huasiman Jesús chayashpaca, achcata llaquirishpa yallitaj huacashpa bullacujtami ricurca.

³⁹ Huasiman yaicushpaca: –¿Imamantataj yallitaj bullashpa huacacunguichij? Huambraca mana huañushcachu, ashtahuanpish dormicunllami– nircami.

⁴⁰ Chaipi cajcunaca asircacunami. Jesusca chaipi cajcunataca tucuicunata canllaman llujshichishpami, chai huambrapaj yayandij mamandij, paihuan rijcunandijlla huambra maipi cashcaman yaicurcacuna.

⁴¹ Chaipica huambrapaj maquimanta japishpami: –¡Talita cumi!– nirca. (Chashna nishcaca: “Huambra, cantami jatari nini” nisha ninmi).

⁴² Jesús chashna nincami, chunga ishqui huatata charij huambraca, jatarishcahuan purirca. Chaita ricujcunaca yallitajmi mancharircacuna.

⁴³ Chai q'uipaca Jesusca caitaca pajta piman huillanguichijman nishpaca huambramanca micunata caraichij nishpami mandarca.