Marcos 4 - Dios Rimashca Shimicunami

Tarpujmanta yuyachij parlomi

¹ Jesusca cutinmi cucha c'uchupi yachachi callarirca. Chaimanca achcacuna pai yachachishcata uyangapaj tandanacumujpimi, Jesusca cuchapi caj barcoman huichiyashpa tiyarirca. Chaipi tandanacushcacunaca cucha uripimi uyacurcacuna.

² Chaipimi yuyachij parlocunahuan achcata yachachicushpaca, cashna nishpa yachachirca:

³ “Uyaichij, tarpuj runami tarpunaman llujshirca.

⁴ Tarpunaman rishpa muyuta shitacujpica, asha muyuca ñanpimi urmarca. Chaitaca pajarocuna shamushpami micurca.

⁵ Asha muyuca rumilla allpapimi urmarca. Chaipica mana achca allpa tiyanpi urmashcamantami utca huiñarca.

⁶ Ashtahuanpish inti llujshishpa rupachijpica, jahualla sapi cashcamanta chaquirircallami.

⁷ Asha muyuca, casha chaupipi urmashpa huiñashpapish, cashacunapish huiñajpi augarishpa mana huiñai tucushpami mana granorca.

⁸ Ashtahuanpish alli allpapi urmaj muyuca alli granotami p'ucurca. Shuj muyullamantami maijanca quimsa chungata, maijanca sujta chungata, maijanca patsajcama granorca” nircami.

⁹ Shinallataj: “Maijanpish uyanapaj rinrinta charijca uyaichigari” nircapishmi.

Yuyachij parlocunata imapaj parlashcami

¹⁰ Chunga ishqui yachacujcunahuan tandalla cajcunaca, Jesús pailla saquirijpimi, yuyachij parlocuna imata nisha nishcata tapurcacuna.

¹¹ Chaimi cashna nirca: “Taita Dios mandagrin pi mana yachashca pacalla cajtaca, paimari cancunamanca yachachishca. Ashtahuanpish shujtajcunamanca yuyachij parlocunallahuanmi imatapish yachachicuni.

¹² Paicunaca ricushpapish mana ricushca shinami tucun. Uyashpapish mana uyashca shinallatajmi tucun. Chaimantami Taita Diosmanpish mana cutirincuna, paicunapaj juchacunata perdonashca canatapish mana chasquincuna” nircami.

Tarpujmanta parlashcata Jesús entendichishcami

¹³ Jesusca cashnami nirca: “Tarpujmanta yuyachishpa parlashcatapish mana entendishpaca ¿ima shinataj shujtaj yuyachij parlocunatacarin entendinguichigari?

¹⁴ Tarpuj runa shinaca, Taita Diospaj Shimita huillajmi.

¹⁵ Lluchu ñan shinaca Taita Diospaj Shimita uyajcunami. Uyashca q'uipaca paipaj shungupi Taita Diospaj Shimita tarpushcataca Satanás shamushpami cungachin.

¹⁶ Rumilla allpapi tarpushca shinaca, alli huillaita uyashcahuan cushicushpa chasquijcunami.

¹⁷ Ashtahuanpish paipi sapi mana ucujta cajpimi llaqui japijpi, alli huillaita caticushcamanta llaquichina yuyailla llaquichijpica, ñitcarishpa manarajpish unipi ña saquirinlla.

¹⁸ Cashalla allpapi tarpushca shinaca, huillashca Shimita uyajcunami.

¹⁹ Ashtahuanpish cai pachapi ima shinalla rurajcuna rurashca shina charijyana yuyaicunahuan umarinami. Shinallataj shujtajcuna charishcata munanacunami. Huillashca Shimitaca chai yuyaicuna tapajpimi, paicunapaj causaipica imata mana granon.

²⁰ Ashtahuanpish alli allpapi tarpushca shinaca, Taita Diospaj Shimita huillashcata uyashpa alli granota p'ucujmi. Chaica shuj muyullamanta quimsa chungata, sujta chungata, patsajta granojmi” nircami.

Ima pacashcapish mana pacallachu

²¹ Jesusca cashnapishmi nirca: “Luztaca cajón ucupi, cama ucupi churangapajca mana japichinchu. Ashtahuanpish lámpara tiyanapi churangapajmi japichin.

²² Ima mana pacalla canapajchu. Tucuimi ricuchishca canapaj. Tucuicunapaj ñaupajpi ricurinatajmi.

²³ Maijanpish uyanapaj rinrinta charijca uyaichigari” nircami.

²⁴ Cashnapishmi nirca: “Imata uyashcataca yuyaipi chariranguichij. Shujtajcunapaj allita rurajpica, ima shina rurashca shinallatajmi cancunamanca cunga. Cai nishcata yachajcunamancarin ashtahuan yallitami cunga.

²⁵ Uyashcata charirajmanca ashtahuanmi cunga. Mana charirajmanca pai ashalla charishcatapish quichungami” nircami.

Tarpushca huiñacujhuan yuyachishpa parlashcami

²⁶ Jesusca cashnapishmi nirca: “Taita Dios mandagrinca, shuj runa paipaj allpapi muyuta tarpuj shinami.

²⁷ Allpayujca tarpushpaca tutaca dorminmi, punllaca jatarinmi. Chashna cajpipish tarpushcaca tutapish punllapish huiñashpa catinllami. Allpayujca ima shina huiñajtaca mana yachanchu.

²⁸ Allpapica muyuca huiñanllami: Puntaca alcacermi tucun, chai q'uipaca caspami tucun. Chai caspapimi granoca jundarin.

²⁹ Ña grano p'ucujpica, tandana punlla chayancami cuchuncuna” nircami.

Mostaza muyumanta yuyachishpa parlashcami

³⁰ Jesusca cashnapishmi nirca: “Taita Dios mandagrintaca ¿Imahuantaj ch'imbapurashun? Mana cashpaca ¿maijan yuyachij parlohuantaj ch'imbapurashun?

³¹ Chaica mostaza muyuta tarpushca shinami. Mostazaca, cai pachapi tiyaj tucui muyucunamanta yalli uchijllami.

³² Ashtahuanpish tarpujpi huiñashpaca, huertapi tiyaj tucui yuracunata yalli jatunmi. Chashna jatun yura cajpimi, pajarocuna shamushpa ramacunapica tazinta rurashpa chai ucupi causancuna” nircami.

Yuyachij parlocunallahuantaj Jesús huillashcami

³³ Uyashpa entendinalla, cai shina yuyachij achca parlocunallahuanmi Taita Diospaj Shimimantaca yachachirca.

³⁴ Yuyachij parlocuna illajllaca mana parlarcachu. Chai parlocuna imata nisha nishcataca paipaj yachacujcunallamanmi alli huillarca.

Huairandij tamyata Jesús jarcashcami

³⁵ Chai punlla ña chishiyashpa tutayacujpica Jesusca paipaj yachacujcunataca: –Cai cucha ch'imbanijman jacuchij– nircami.

³⁶ Chai tucuicunataca Jesusca cayacamachij nircami. Jesustaca pai tiyacushca barcollapitajmi apashpa rircacuna. Shujtaj barcocunapish catircacunami.

³⁷ Chaipi ricujpica huairandij tamya ñapish yacuta caiman chaiman cuyuchijpimi, yacuca barcopi jundai callarirca.

³⁸ Jesusca, chai barcopica huashamanmi dormicurca. Yachacujcunaca: –¡Yachachij! ñamari chingarigrinchij ¿manachu ñucanchijtaca llaquihuangui?– nishpami rijchachircacuna.

³⁹ Jesús jatarishpaca, huairatapish yacutapish: –¡Casijlla cai!– nircami. Chashna nincami huairapish, yacupish casijlla tucurca.

⁴⁰ Chaipimi Jesusca: –¿Ima nishpataj mancharinguichij? ¿Manaraj crijcuna shinamari cringuichij?– nijpi,

⁴¹ jatunta mancharinacushpami, caishuj chaishuj: –Caica pitagari, huairapish mama cuchapish paitaca cazunllamari– ninacurcacuna.