Marcos 2 - Dios Rimashca Shimicunami

Mana cuyurij runata Jesús alliyachishcami

¹ Tauca punllacuna q'uipami Jesusca cutinllataj Capernaunman tigrarca. Huasiman Jesús chayancami tucuicuna yachaj chayashpa,

² ñapish achcacuna jundarishpa, huasi pungucama maipi mana shayaripajta tandanacurcacuna. Chaipi Jesusca Taita Diospaj Shimita huillacujpica,

³ mana cuyurij shuj runatami chuscu runacuna huandushpa apamurcacuna.

⁴ Chai tucuicuna huasi ucupi junda cajpimi, Jesuspajman mana yaicui tucushpa pai yachachicun huasi jahua c'atata anchuchishpa, huandumushcallapitaj ungushcataca uriyachircacuna.

⁵ Jesusca paicuna crishcata ricushpami, mana cuyurij runataca: –Huahua, cambaj juchacunaca perdonashcami– nirca.

⁶ Chaipica mandashcacunata quillcaj maijancunami tiyacurcacuna. Paicunapaj shungullapimi:

⁷ “¿Ima nishpataj caica chashna ninchu imamí? Caica Taita Diosta p'iñashpamari c'amicun. Pipish juchacunataca mana perdonai tucunchu, Taita Diosllami perdonai tucun” nishpami yuyacurcacuna.

⁸ Jesusca paicunapaj shungullapi chashna yuyacujta yachashpami: –¿Ima nishpataj cancunapaj shungupica millaita yuyacunguichij?

⁹ ¿Mana cuyurij runataca: “Cambaj juchacunataca perdonashcami” ninachu, mana cashpaca: “Jatari, canta huandumushcata aparishpa rilla” ninachu, imata ninataj ashtahuan jahualla canga?

¹⁰ Runa Aichayujca cai pachapi causajcunapaj juchacunata perdonangapaj cashcataca cunanmi ricuchisha– nishpaca, mana cuyurij runataca:

¹¹ –Cantaca cashnami nini: Jatari, canta huandumushcata apashpa, cambaj huasiman ri– nircami.

¹² Chaimi paica, jatarishcahuan huandumushcata apashpa, tucuicunapaj ñaupajmanta llujshishpa rijpi, tucuicuna mancharinacushpaca: –Chashna alliyachijtaca manataj ricushcanchijchu– nishpami, Taita Diosta jatunyachircacuna.

Leví runata Jesús cayashcami

¹³ Chai q'uipa Jesusca, cutinllataj Galilea cucha uriman tigrashpaca, tucui paipajman shamujcunatami yachachirca.

¹⁴ Jesús chaimanta rishpaca, tributocunata japinapi, Alfeopaj churi Leví tiyacujta ricushpami: –Ñucata cati– nijpi, Mateoca jatarishcahuan Jesusta catircalla.

¹⁵ Achcacuna Jesusta catishcamantami cashna tucurca. Jesusca Levipaj huasipi mezapi micushpa tiyacujpica, impuestota japijcunapish, juchayujcunapish achcacuna chayashpami, Jesusndij paipaj yachacujcunandij mezapi tandalla tiyarircacuna.

¹⁶ Mandashcacunata quillcajcunapish fariseocunapish Jesustaca impuestota japijcunahuan, juchayujcunahuan micucujta ricushpami yachacujcunataca: –¿Ima nishpataj caica, impuestota japijcunahuanpish, juchayujcunahuanpish micucunchu, ubyacunchu imamí?– nircacuna.

¹⁷ Chaimi Jesusca: –Mana ungushcacunaca jambijtaca mana mashcanchu, ungushcacunallami mashcancuna. Ñucaca cashcata rurajcunataca mana cayaj shamurcanichu. Ashtahuanpish juchayujcunatami cayaj shamurcani– nirca.

Ayunanamanta tapushcami

¹⁸ Bautizaj Juanpaj yachacujcunapish, fariseocunapaj yachacujcunapish ayunacujta ricujcuna Jesuspajman rishpaca: –Juanpaj yachacujcuna, fariseocunapaj yachacujcunapish ayunancunami. ¿Ima nishpataj cambaj yachacujcunaca mana ayunancuna?– nishpa tapurcacuna.

¹⁹ Chaimi Jesusca: –Bodaman cayashcacunaca noviohuan cashpaca ¿ayunangachari? Novio paicunahuan cajpica ¡maitataj ayunangacunari!

²⁰ Ashtahuanpish noviota paicunapajmanta quichuna punlla chayamungami. Chaipimi ayunangacuna.

²¹ Pipish mauca churanataca, mushuj linsohuanca mana llachapanchu. Mushujhuan llachapajpica, uchillayashpa mauca churanataca ashtahuanmi lliquin.

²² Mushuj vinotapish mauca capachucunapica pi mana churanchu. Chashna rurajpica, chai mauca capachu tugyajpi, vinopish capachupish chingarinmanmi. Ashtahuanpish mushuj vinotaca, mushuj capachucunapimi churana– nircami.

Yachacujcunaca samana punllapimi trigo caspata c'utsashca

²³ Samana punllapi chagra chaupita Jesús ricujpimi, paipaj yachacujcuna caticushpaca, trigo caspata c'utsanata callarircacuna.

²⁴ Chaimi fariseocunaca: –Riqui, ¿ima nishpataj samana punllapi ama rurangui nishcata ruracuncuna?– nijpi,

²⁵ Jesusca: –Davidpish paihuan cajcunapish yaricaihuan cashpa, imata rurashcataca ¿manachu rezashcanguichijllapish?

²⁶ Abiatar cura, curacunata mandaj cai punllacunami, Davidca Taita Diospaj huasiman yaicushpa, Taita Diosman cushca tandata micurca. Paihuan cajcunamanpish cararcami. Chai tandataca mana pipish micunallachu carca, curacunallami micuna carca– nircami.

²⁷ Jesusca cashnapishmi nirca: –Samana punllataca runapaj allipajmi rurarca, runataca mana samana punllapaj allipajchu rurarca.

²⁸ Chaimantami Runa Aichayujca, samana punllatapish Mandaj– nircami.