Marcos 12 - Dios Rimashca Shimicunami

Millai chagrajcunamanta yuyachishpa parlashcami

¹ Jesusca, yuyachij parlocunahuan yachachi callarishpaca: Shuj runaca paipaj allpapi uvacunata tarpushpami, chaitaca muyundijta pircashpa, uvacunata capingapaj shuj jutcuta, chapangapaj shuj torretapish rurarca. Chaimantaca shujtaj chagrajcunaman arrendachishpami, caru llajtaman rirca.

² Uvacunata tandana punllacuna pajtajpica, paipaj cana cashcata chasquimuchunmi, shuj servijta chagrajcunapajman cacharca.

³ Ashtahuanpish chagrajcunaca chai servij chayajpica macashpami, imata mana cushpa tigrachishpa cacharcacuna.

⁴ Cutinllataj shujtaj servijta cachajpica, paitapish rumicunahuan umata p'aquishpami, c'amishpa cacharcacuna.

⁵ Cutin shujtaj servijta cachajpipish, paitapish huañuchircacunami. Chai q'uipa shujtaj achcacunata cachajpipish, shujcunataca macarcacunami, caishujcunataca huañuchircacunami.

⁶ Tucui chaicunapaj q'uipaca, chagrayujca shujlla c'uyashca churitami: “Ñuca churitatajca cazungami” nishpa cacharca.

⁷ Chai churi chayajpi paita ricushpacarin chagrajcunaca: “Caimari paipaj churi cai tucuitaca paimari japinga. Pai japinataca ñucanchij japingapaj shamuichij paita huañuchishunchij” nircacunami.

⁸ Paicunaca huañuchishpami, uva chagramanta canllaman llujshichishpa shitarcacuna.

⁹ Chashna rurajcunataca chagrayuj amo shamushpaca ¿imatashi ruranga? Chai chagrajcunataca huañuchishpami, paipaj uva chagratapish shujtajcunaman cunga.

¹⁰ ¿Quillcachishcatapish manachu rezarcanguichij?: “Huasichijcuna yanganchishpa shitashca rumillatajmi, callaripi churana rumi tucushca.

¹¹ Chaitaca Jatun Diosllatajmi chashna rurashca. Chaita ricushpaca mancharishpami cushicunchij ninmi” nircami.

¹² Chai yuyachij parlohuanca paicunallatataj rimacushcata entendishpami, ima shinapish prezu japina yuyailla tucurcacuna. Ashtahuanpish tucui chaipi cajcunata manchashcamantami imata mana nishpa rircallacuna.

Tributomanta tapushcami

¹³ Chai q'uipami maijan fariseocunatapish Herodespura caj maijancunatapish Jesusta imata tapujpi ima mana allita nijpica, juchachishun nishpa tapuchun cacharcacuna.

¹⁴ Paicuna shamushpaca: –Yachachij, canca imatapish ima shina cashcatataj yachachijmi cangui. Taita Diosta ima shina cazunatapish chaitataj yachachijmi cangui. Pita mana manchashpa paicunapi alli ricuringa raicullaca mana yachachijchu cangui. Chaimi caita tapushun ninchij. Cesarman tributota cunaca mandashcapi nishca shinaca ¿allichu canga imashi? ¿Cushunchu, manachu cushun?– nircacunami.

¹⁵ Jesusca paicunataca mishqui shimi jayaj shungucuna cajta yachashpami: –¿Ima nishpataj ñucataca umashun nicunguichij? Shuj denariota ricungapaj apamuichij– nircami.

¹⁶ Paicuna apamujpica: –¿Pipaj ñahuitaj, pipaj shutitaj?– nishpa Jesús tapujpimi: –Cesarpajmi– nircacuna.

¹⁷ Chaimi Jesusca: –Cesarpajtaca paiman cuichij, Taita Diospajtaca Taita Diosman cuichij– nishpa cutichijpimi, paitaca mancharircacuna.

Huañushcacuna causarinamanta tapushcami

¹⁸ Chai q'uipami huañushcacunaca mana causaringachu nij saduceocuna Jesusta tapunaman shamushpaca:

¹⁹ –Yachachij, maijan cashpapish huahuacunata manaraj charishpa huañujpica, huañujpaj huauquillataj chai viuda huarmihuan cazarashpa huauquipaj randi huahuacunata charichun nishpami, Moisesca quillcashca.

²⁰ Canchis huauquindijmi tiyarca: Punta huauquimi cazararca. Paica huahuacunata manaraj charishpami huañurca.

²¹ Chaimantami q'uipa huauquica, chai viuda huarmihuan cazararca. Paipish huahuacunata manaraj charishpami, huañurca. Chaipaj q'uipa huauquipish huahuacunata manaraj charishpallatajmi huañurca.

²² Tucui canchis huauquindijcunatajmi chai viuda huarmihuan cazarashpa huahuacunata manaraj charishpa huañurcacuna. Tucuicunapaj q'uipaca chai viuda huarmipish huañurcami.

²³ Shina cajpica, huañushcacuna causarimui punllapica, chai canchishuantaj cazarashca cashcamantaca ¿maijanpajshi chai huarmica canga?– nircacunami.

²⁴ Chaimi Jesusca: –Cancunaca Quillcachishcacunatapish mana yachashcamanta, Taita Diosca tucuita rurai tucuj cashcatapish mana entendishcamantami pandaricunguichij.

²⁵ Huañushcacuna causari punllapica, mana cazarangacunachu, cazarachinapish mana tiyangachu. Ashtahuanpish paicunaca, jahua pachapi caj Taita Diospaj angelcuna shinami cangacuna.

²⁶ Zarza yura rupacunmanta Taita Dios rimashcata Moisés quillcashcataca ¿manachu rezashcanguichij? Taita Diosca chai yuramantami: “Ñucaca Abrahampaj Taita Dios, Isaacpaj Taita Dios, Jacobpaj Taita Diosmi cani” nishpa huillarca. Chashna nishpaca paica huañushcacuna causarina cashcatami Moisesmanca huillashca.

²⁷ ¡Taita Diosca mana huañushcacunapaj Taita Dioschu, ashtahuanpish causajcunapaj Taita Diosmari! Chaitami cancunaca, mana entendicunguichij– nircami.

Mandashcacunamantaca maijantaj ashtahuan yalli alli nishcami

²⁸ Saduceocunahuan Jesús parlanacushpaca tucuita alli cutichijta uyashpami, mandashcacunata quillcajcunapuramanta shuj runa Jesuspajman c'uchuyashpaca: –Tucui mandashcacunamantaca ¿maijantaj ashtahuan yalli alli?– nijpimi,

²⁹ Jesusca cashna nirca: –“Uyaichij israelcuna tucui mandashcacunamanta ashtahuan yalli allica caimi: Jatun Dios ñucanchij Taita Diosca, Jatun Diosmari. Paica shujllami.

³⁰ Jatun Dios, cambaj Taita Diostaca tucui shunguhuan, tucui almahuan, tucui yuyaihuan, tucui fuerzahuan c'uyangui” ninmi. Cai mandashcami tucuimanta ashtahuan yalli allica.

³¹ Q'uipa mandashcapipish: “Can quiquinta shinallataj shujtajcunatapish c'uyangui” ninmi. Cai mandashcacunamanta ashtahuan yalli allica mana tiyanchu– nircami.

³² Chaita uyashpami mandashcacunata quillcajca: –Yachachij, allitami ningui: Shujlla Taita Diosmi tiyan, shujtajca mana tiyanchu nishpaca, chaica can nishca shinatajmi.

³³ Taita Diostaca tucui shunguhuan, tucui yuyaihuan, tucui almahuan, tucui fuerzahuan c'uyana, quiquinta shinallataj shujtajcunatapish c'uyanaca allimi. Cai ishqui mandashcacunata pajtachinami Taita Diosman cushpa tucuita rupachishcatapish, sacrificiocunatapish ashtahuan yalli allica– nircami.

³⁴ Yachashcata alli yuyarishpa cutichijta ricushpami Jesusca: –Canca, Taita Dios mandacujpica ña yaicunallami cangui– nircami. Jesús chashna nijpica, pi mana ashtahuan tapui tucurcacunachu.

¿Cristoca pipaj Churitaj?

³⁵ Jesusca Taita Diospaj huasipi yachachicushpaca: –¿Ima nishpataj mandashcacunata quillcajcunaca Cristotaca, Davidpaj Churimi nincuna?

³⁶ Davidllatajmi jucha illaj Espíritu yuyachijpica: “Jatun Diosca ñucata Mandajtaca: Canta p'iñajcunata cambaj chaqui sarunapi churangacama, ñuca alli ladoman tiyarilla” nirca.

³⁷ Davidllataj ñuca Mandaj nijpica ¿ima shinataj paipaj churica cangari?– nircami. Chaipi caj achcacunaca allimari yachachin nishpami ashtahuan uyanachircacuna.

Mandashcacunata quillcajcunata Jesús rimashcami

³⁸ Jesús yachachicushpaca cashnami nirca: –“Mandashcacunata quillcajcuna shinaca ama canguichijchu. Paicunaca pambata pichacujta churashpa purinatami munancuna. Plazacunapipish allillachu cangui nishca canatami munancuna.

³⁹ Sinagogacunapi, mai jatun micuicunapipish puntapi tiyarinatami munancuna.

⁴⁰ Paicunaca viudacunapaj huasicunatapish quichushpa millpujcunami. Alli ricuringaraicuca, unitami Taita Diosta mañaj tucuncuna. Chashna rurajcunataca yallitaj jatunta llaquichishcami canga”– nircami.

Viuda huarmi ofrendata cushcami

⁴¹ Jesusca, Taita Diospaj huasipi cashpaca, ofrendata churana ch'imbapurapimi tiyarirca. Chaipi cashpami ofrendata churanapi ofrendata churacujta ricurca. Achcata charij taucacunami, achcata churacurcacuna.

⁴² Shinallataj shuj huajcha viudapish shamushpaca, pai charicushca ishqui quillu cullquitami churarca.

⁴³ Chaimi paipaj yachacujcunata cayashpaca: –Cai huajcha viudami, ofrendataca tucui shujtajcunamanta yallita churan. Chaica chashnatajmi.

⁴⁴ Tucui caishujcunaca achcata charishpapish, puchushcallatami churarcacuna. Ashtahuanpish paica, huajcha cashpapish, pai causanapaj tucui charishcatamari churan– nircami.