Marcos 11 - Dios Rimashca Shimicunami

Jerusalenman Jesús yaicushcami

¹ Jerusalenman chayamucushpaca, Betfagé, Betania pueblocuna ch'imbanij Olivocuna tiyan urcupi cashpami Jesusca, paipaj yachacujcunamanta ishquita cachacushpaca,

² cashna nirca: –Chai ch'imbanij uchilla llajtaman richij. Chaiman chayashpaca pi manaraj tiyarishca shuj uchilla burrito huatashca shayacujtami japinguichij. Chaita cacharishpa pushamuichij.

³ Cacharicujpi pi imata nijpica: “Mandaj Jesusmi pushaj cacharca, ñallami saquij cachanga”– ninguichij nircami.

⁴ Paicuna rishpaca, ñan muyurin uri huasi canlla pungupi huatashca huahua burrotami cacharicurcacuna.

⁵ Chaimi maijan chaipi cajcunaca: –¿Imapajtaj huahua burrotaca cacharicunguichij?– nijpi,

⁶ Pushacujcunaca Jesús mandashca shinallataj nijpica, pushachun saquircacunallami.

⁷ Huahua burrota Jesuspajman pushamushpaca, churanacunatami huahua burro jahuapi churarcacuna. Jesusca chaipimi tiyarirca.

⁸ Achca gentecunami paicunapaj churanacunata Jesús ricun ñanpi mantarcacuna. Shujtajcunaca yura ramacunata p'itishpami, ñanpi churarcacuna.

⁹ Chai tucui catishpa ñaupashpa ricujcunaca: –¡Hosanna! ¡Jatun Diospaj shutipi shamucujtami alli ninchij!

¹⁰ ¡Ñaupa yaya Davidpaj mandanapi mandangapajmari shamucun! ¡Hosanna cantaca jahua pachapipish alli nishca cachun!– nircacunami.

¹¹ Jesusca Jerusalenman chayashpaca, Taita Diospaj huasimanmi yaicurca. Tucuita ricushca q'uipaca, ñalla tutayacujpimi chunga ishqui yachacujcunandij Betaniaman rirca.

Mana p'ucuj higo yurata Jesús chaquichishcami

¹² Cayandij punlla Betaniamanta llujshishpa ricushpami Jesusca yaricachirca.

¹³ Chaimi carumanta shuj higo yura p'angasapa cajta ricushpaca, higo tiyanpishchari nishpa ricunaman rirca. Chaiman chayajpica, p'angacunallami junda cashca carca. Manaraj p'ucuna punlla cashcamantami higoca mana tiyashca carca.

¹⁴ Chaimi Jesusca higo yurataca: –¡Cunanmanta pacha pipish amataj canmantaca micuchuncuna!– nishpa rimarca. Paipaj yachacujcunaca chaitami uyarcacuna.

Taita Diospaj huasipi c'atujcunata Jesús llujshichishpa cachashcami

¹⁵ Chai q'uipaca Jerusalenmanmi shamurcacuna. Taita Diospaj huasiman Jesús yaicushpaca, c'atucujcunata, randicujcunatapish tucuicunatami llujshichishpa cacharca. Cullquita cambiayajcunapaj mezacunatapish, palomacunata c'atujcuna tiyarinacunatapish t'angashpami pambaman shitarca.

¹⁶ Shinallataj Taita Diospaj huasi canllata aparishcacuna caiman chaiman pasachunpish pita mana saquircachu.

¹⁷ Chaipica cashna nishpami yachachirca: –Taita Dios Quillcachishcapica: “Ñuca huasica, tucui llajtapi causajcuna tandanacushpa ñucata mañana huasimi canga” ninmi. Ashtahuanpish cancunaca, shuhuacunapaj jutcutamari rurashcanguichij– nircami.

¹⁸ Chashna nijta mandashcacunata quillcajcunapish, curacunata mandajcunapish uyashpaca, ima shinapish huañuchinatami yuyarircacuna. Chashna yuyarinacucushpapish Jesús yachachishcataca allimi yachachin nishpa tucuicuna uyanachicujpimi, paicunata manchashcamanta mana imata rurai tucurcacuna.

¹⁹ Ña tutayamujpica, Jesusca Jerusalenmanta llujshishpa rircallami.

Canmantaca pi mana imata micungachu nishca higo yura chaquirishcami

²⁰ Cayandij tutamanta higo yura c'uchuta ricushpami, chai yuraca sapimanta chaquirishcata ricurcacuna.

²¹ Chaita ricushpami Pedroca Jesús rimashcata yuyarishpaca: –Yachachij, riquiyari can amataj p'ucuchun nishca higo yuraca chaquirishcamari– nijpi,

²² Jesusca: –Taita Diospi crichij.

²³ Maijanpish cai urcuta: “Caimanta anchushpa, mama cuchapi siririgri” nishpa, shungupi mana caita chaita yuyashpa Taita Dios pajtachinata crijpica, chaica pajtangallami. Ricunguichij, chashnatajmi tucunga.

²⁴ Chaimanta cashnami nini: Taita Diosta imata mañashpaca, ña japinataj cashcata crishpa mañaichij, chasquinguichijmi.

²⁵ Cancuna Taita Diosta mañacushpaca, maijan cancunapaj mana allita rurashca cajpica paitaraj perdonaichij. Chashna rurajpimi, jahua pachapi caj cancunapaj Yayaca, cancunapaj juchacunatapish perdonanga.

²⁶ Cancuna shujtajcunata mana perdonajpica, jahua pachapi caj cancunapaj Yayapish, cancunapaj juchacunataca mana perdonangachu– nircami.

Jesusca mandajmi

²⁷ Cutinllataj Jerusalenman yaicushpaca, Taita Diospaj huasipimi Jesusca puricurca. Chaipi cajpimi curacunata mandajcuna, mandashcacunata quillcajcuna, cunaj yuyajcunapish Jesuspajman c'uchuyamurcacuna.

²⁸ Paicunaca: –¿Pi mandajpitaj chashna rurangui? ¿Pitaj chashna rurachun, cantaca mandarca?– nishpa tapujpimi,

²⁹ Jesusca: –Ñucapish cancunataca, shuj tapunata tapusha. Chaita cutichijpica, pi mandajpi caicunata ruracushcata ñucapish huillashami.

³⁰ Bautizaj Juan bautizachunca ¿Taita Dioschu, runacunachu pitaj cachashca canga?– nircami.

³¹ Chaimi paicunapura parlanacushpaca cashna ninacurca: –Juantaca Taita Dios cachashcami nijpica: “Shinashpaca ¿ima nishpataj pai huillashcataca mana crircanguichij?” ningami.

³² “Shinallataj Juantaca Taita Dios cachashca huillajtaj cashcata tucuicuna yachashcamantami, runacunalla cachashcami nishpapish mana ni tucunchijchu” ninacurcacuna.

³³ Chaimi Jesusmanca: –Mana yachanchijchu– nijpi, Jesusca: –Ñucapish pi mandajpi chashna ruracushcataca mana huillanichu– nirca.