Marcos 10 - Dios Rimashca Shimicunami

Manataj shitanacunachu nishpa Jesús yachachishcami

¹ Chai q'uipami Jesusca Jordán yacuta ch'imbashpa Judea llajtaman rirca. Pai chaipi cajpimi achcacuna paipajman cutin tandanacumurcacuna. Chaipimi ima shina yachachij cashca shinallataj yachachirca.

² Fariseocuna Jesuspajman c'uchuyashpaca, ima mana allita nijpica juchachingapajmi, cusaca paipaj huarmita shitanaca allichu canga nishpa tapurcacuna.

³ Chaimi Jesusca: –Cancunataca ¿imatataj Moisesca mandarca?– nijpi,

⁴ paicunaca: –Moisesca, maijan cashpapish huarmita shitasha nishpaca, chaita ricuchij quillcata cushpa shitachunlla ninmi– nircacunami.

⁵ Chaimi Jesusca: –Cancunaca rumi shungucuna cajpimi Moisesca chashna nishpa quillcarca.

⁶ Taita Diosca callaripi tucuita ruracushpaca shuj c'ari, shuj huarmillatami rurarca.

⁷ Chashna cashcamanta c'arica, yaya mamata saquishpa, paipaj huarmihuan tandanacushpa,

⁸ ishquindijmanta shuj aichallami tucunga. Chaimanta ña mana ishquichu, shuj aichallami.

⁹ Chashna cashcamanta Taita Dios tandachishcataca, ni pi amataj ch'icanyachichun– ninmi.

¹⁰ Yachacujcunaca huasipi cashpa Jesustaca, chaillatataj cutin tapujpimi,

¹¹ Jesusca: –Maijan cashpapish paipaj huarmita shitashpa shujtajhuan cazarajca huainayanmi. Chashna rurashpaca paipaj huarmitapish llaquichinmi.

¹² Huarmipish cusata shitashpa shujtajhuan cazarashpaca huainayanmi– nircami.

Huahuacunapaj umapi maquita Jesús churashcami

¹³ Chai q'uipami huahuacunapaj jahuapi maquita churachun nishpa Jesuspajman pushamurcacuna. Ashtahuanpish paicunataca yachacujcunaca imapajtaj pushamunguichij nishpami jarcarcacuna.

¹⁴ Chaita Jesús ricushpaca, p'iñarishpami: –Huahuacuna ñucapajman shamuchun saquichij, ama jarcaichijchu. Cai huahuacuna shina cajcunami jahua pacha Taita Dios mandacujpica yaicunga.

¹⁵ Taita Dios paita mandachun shuj huahua shina maijanpish mana chasquijca, Taita Dios mandacujpica chaipica mana yaicungachu. Chashnatajmi canga– nishpaca,

¹⁶ huahuacunata marcashpami, paicunapaj jahuapi maquita churashpa Taita Dios allicunata cuchun nirca.

Achcata charij moso Jesusta tapushcami

¹⁷ Jesús chaimanta rigrijpimi, shuj runa callpashpa c'uchuyashpa paipaj ñaupajpi cungurishpaca: –Yachachij canca allimari cangui. Huiñai causaita charingapajca ¿ima allitataj rurana cani?– nijpi,

¹⁸ Jesusca: –¿Ima nishpataj ñucataca alli ningui? Allica pi mana tiyanchu, shujllami tiyan, chaica Taita Diosmi.

¹⁹ Mandashcacunataca yachanguillatajmi: “Ama huainayangui, ama huañuchingui, ama shuhuangui, ama llullashpa huillangui, pita ama umangui, cambaj yaya mamatapish alli ningui” ninmi– nircami.

²⁰ Chaimi paica: –Yachachij, tucui caicunataca huahuamanta pachami ruracuni– nijpi,

²¹ Jesusca c'uyaihuan paita ricushpami: –Shujca illanrajmi: Can imalla charishcacunata tucui c'atushpa, huajchacunaman cugri. Chashna rurashpami jahua pachapica, achcata charingui. Chacatashpa huañuchina cajpipish ñucata catingui tigramugri– nirca.

²² Shina nijta uyashpa paica achcata charij cashcamantaca llaquijlla rircallami.

²³ Jesusca chaipi cajcunata muyundijta ricushpami, paipaj yachacujcunataca: –¡Achcata charijcunaca, Taita Dios mandacujpica mana jahualla yaicungacunachu!– nircami.

²⁴ Chashna nijpi yachacujcuna achcata mancharinacucujpimi cutinllataj Jesusca: –Huahuacuna, ¡ima charishcacunallapi shunguta churajcunaca, Taita Dios mandacujpica mana jahualla yaicui tucungachu!

²⁵ Shuj camellorajmi auja rinrintaca, jahualla pasan. Shuj charij runa Taita Dios mandacujpi chaiman yaicunaca, chaitapish yalli sinchimari– nijpicarin,

²⁶ yachacujcunaca ashtahuan mancharinacushpami: –Shinashpaca ¿pitaj quishpiri tucungari?– nircacuna.

²⁷ Chaimi Jesusca paicunata ricushpaca: –Gentecunapajca sinchitajmari, ashtahuanpish Taita Diospajca imapish jahuallami– nirca.

²⁸ Chaimi Pedroca: –Ñucanchijca tucuita saquishpami, cantaca caticunchij– nijpi,

²⁹ Jesusca cashna nirca: –Cashnatajmi nini: Maijanpish ñucata caticushcamantapish, alli huillaimantapish paipaj huasita, huauquicunata, panicunata, yaya mamata, huarmita, huahuacunata, allpacunatapish saquishpaca,

³⁰ ñucata caticushcamanta catirashpa llaquichicujpipish, cunan punllacunapi chasquinataca patsaj cutihuanmi huasicunata, huauquicunata, panicunata, mamacunata, huahuacunata, allpacunatapish chasquinga. Shinallataj shamuj punllapicarin, huiñai causaitami chasquinga.

³¹ Ashtahuanpish cunan puntapi cajcunaca achcacunami huashayachishca cangacuna. Cunan huashaman cajcunaca puntapimi cangacuna– nircami.

Jesusca pai huañuna cashcata cutin huillashcami

³² Jerusalenman rina ñanta huichiyacushpaca Jesusca ñaupashpami ricurca. Yachacujcunaca manchai, manchaillami caticurcacuna. Chaimi chunga ishquicunata ch'icanyachishpaca, paita imallata rurana cashcata huillai callarishpa cashna nirca:

³³ –Cunanca Jerusalenmanmi huichiyacunchij. Chaipimi Runa Aichayujtaca curacunata mandajcunaman, mandashcacunata quillcajcunaman entregangacuna. Paicunaca huañunami cangui nishpami mana israelcunaman entregangacuna.

³⁴ Paicunaca chanzata rurashpami azotingacuna, ch'ucangacuna, huañuchingacuna. Huañuchijpipish quimsa punllapica causaringallami– nircami.

Santiagopish Juanpish mañashcami

³⁵ Chaipimi Zebedeopaj churicunaca Jacobopish, Juanpish Jesuspajman c'uchuyashpaca: –Yachachij, ñucanchij caita mañagrinchij chaita rurapai– nircacuna.

³⁶ Chaimi Jesusca: –¿Imatataj rurachun ninguichij?– nijpi,

³⁷ paicunaca: –Can tucui rurai tucuj cashcahuan mandacushpaca, shujtaca alli ladoman, caishujtaca lluqui ladoman tiyachingui– nircacuna.

³⁸ Chaimi Jesusca: –Imata mañacushcatapish mana yachanguichijchu. ¿Ñuca ubyana cashca vasomantaca ubyai tucunguichijchari, ñuca imahuan bautizarishcapipish, bautizari tucunguichijchari?– nijpi,

³⁹ paicunaca: –Ari, chashna rurai tucunchijmi– nircacuna. Chaimi Jesusca: –Ñuca ubyashca vasomantapish ubyanguichijmi, ñuca imahuan bautizarishcapipish bautizaringuichijmi.

⁴⁰ Ashtahuanpish ñuca alli ladoman, lluqui ladoman maijanta tiyachinaca mana ñucapajchu. Chaitaca ñuca Yayami maijancunapaj allichishca cashpaca, chaipica tiyachinga– nircami.

⁴¹ Chaita caishuj chunga yachacujcuna uyashpaca, Jacobohuanpish, Juanhuanpish p'iñarijpimi,

⁴² Jesusca paicunata cayashpa: –Jatun mandajcunallami paicunalla tucuita mandaj cashun nincuna. Cai pachapi llajtacunata mandajcunallami, paicuna yuyashca shinata rurashpa mandancuna. Chaitaca yachanguichijmi.

⁴³ Ashtahuanpish cancunapurapica, mana chashnachu canga. Cancunapuramanta maijanpish jatun casha nijca, caishujcunapajta rurajmi canga.

⁴⁴ Cancunapurapi maijanpish puntapi casha nishpaca, tucuicunapajta rurajmi canga.

⁴⁵ Runa Aichayujca servishca cangapajca, mana shamurcachu, ashtahuanpish servingapaj. Paipaj causaita cushpa tucuicunata randishpa cacharichingapajmi shamurca– nircami.

Jesusca mana ricuj Bartimeota alliyachishcami

⁴⁶ Chaimantaca Jericomanmi chayamurcacuna. Jericomanta Jesusca paipaj yachacujcunandij, shujtaj achcacunandijpish llujshishpa ricujpica, paicuna rina ñan uripimi Timeopaj churi Bartimeo tiyacurca. Paica, ñahui mana ricuj cashpami mañashpa tiyacurca.

⁴⁷ Nazaretmanta Jesús chaita pasacun nijta uyashpami: –¡Davidpaj Churi Jesús, ñucata llaquihuai!– nishpa caparijpi,

⁴⁸ chaipi cajcunaca upalla cai nishpa jarcarcacuna. Ashtahuanpish paica: –¡Davidpaj Churi, ñucata llaquihuai!– nishpami ashtahuan caparirca.

⁴⁹ Chaita uyashpa Jesús chaipi shayarishpaca: –Paita pushamugrichij– nijpi chai pushanaman rijcunaca: –Cushicushpa jatari, cayacunmari– nircacunami.

⁵⁰ Pai pillurishcatapish chaipi shitashpa jatarishcahuan Jesuspajman shamujpimi,

⁵¹ Jesusca: –¿Imatataj rurachun ningui?– nishpa tapujpi, mana ricujca: –Yachachij, ñuca ñahuicunata alliyachihuai– nirca.

⁵² Chaimi Jesusca: –Rilla, can crishcamantami alliyashcangui– nirca. Chashna ninca paipaj ñahui ricujpimi Jesús ricun ñanllatataj paita catishpa rirca.