Marcos 1 - Dios Rimashca Shimicunami

Bautizaj Juan huillashcami

¹ Taita Diospaj Churi Jesucristomanta alli huillai ima shina callarishcami.

² Profeta Isaías quillcashcapi nishca shinallatajmi: “Ñuca huillajtami canta ñaupachishpa cachani. Paimi can purina ñantaca ñaupashpa allichinga.

³ Shitashca pambapi caparijca: “Jatun Diospaj ñanta allichichij. ¡Cancunapaj ñancunatapish allichichij!” nishcami.

⁴ Chai nishca shinallatajmi Bautizaj Juan shitashca pambapi ricurishpaca, juchacunata perdonachun mana allita ruracushcata saquishpa cutirichij nishpa bautizacurca.

⁵ Chaipica Judeapi, Jerusalenpi tucui causajcunapish paipajman shamushpa, juchacunata huillashpa Jordán jatun yacupi Juan bautizajpimi bautizarircacuna.

⁶ Juanca, camello millma churanata churarishca, carahuan chumbillirishcami carca. Pai micunaca langostacuna, sacha chuspipaj mishquimi carca.

⁷ Juanca cashnami huillarca: “Ñucapaj q'uipa shamucujca, ñucata yalli imatapish rurai tucujmi. Ñucaca, paipaj pargate huatashcallatapish cumurishpa mana pascaipajmi cani.

⁸ Ñucaca cancunataca yacupi bautizajllami cani. Ñucapaj q'uipa shamujmi jucha illaj Espirituhuan bautizanga” nircami.

Jesusta bautizashcami

⁹ Chai punllacunallapitajmi Jesusca Galileapi caj Nazaretmanta Juanpajman shamujpi, Juanca Jordán yacupi Jesustaca bautizarca.

¹⁰ Yacumanta Jesús llujshishpaca, jahua pacha pascarijpi, Taita Diospaj Espirituca paloma shina shamushpa paipaj jahuapi tiyarijtami ricurca.

¹¹ Jahua pachamantaca: “Canmi ñuca c'uyashca Churi cangui. Canpimi cushicuni” nishpa rimashcami uyarirca.

Jesusta diablo pandachisha nishcami

¹² Chai q'uipaca Taita Diospaj Espirituca, shitashca pambamanmi pusharca.

¹³ Jesusca chuscu chunga punllacunatami chai shitashca pambapi carca. Jesusca Satanás pandachisha nishcami chaipica carca. Manchanana animalcunahuanpishmi chaipi carca. Angelcunami Jesustaca servircacuna.

Jesusca pai rurana cashcata callarishcami

¹⁴ Bautizaj Juan carcelpi cai punllacunami Jesusca Taita Dios mandana alli huillaita huillaihuan huillaihuan Galileaman shamushpaca:

¹⁵ “Taita Dios mandanaca ñami c'uchuyamushca. Chai punllamari chayamushca. ¡Mana alli ruracushcata saquishpa, alli huillaita crichij!” nirca.

Jesusca chalhuata japij chuscu runacunata cayashcami

¹⁶ Jesusca Galilea cucha urita puricushpami Simonta, paipaj huauqui Andrestapish ricurca. Paicunaca chalhuata japijcuna cashcamantami, linchita cuchapi shitacurcacuna.

¹⁷ Paicunataca Jesusca: –Ñucata catichij. Cancunataca chalhuacunata japijta shinallataj, gentecunata pushamujcunatami rurasha– nirca.

¹⁸ Chaimi paicunaca linchicunata saquishcahuan Jesusta catircacuna.

¹⁹ Jesusca ashahuan chainijta rishpaca, Zebedeopaj churi Jacobo, paipaj huauqui Juandij barcopi linchicunata allichicujtami ricurca.

²⁰ Paicunatapish Jesús cayajpica, yaya Zebedeota, trabajajcunandij barcopi saquishpami catircacuna.

Millai espíritu japishca runata Jesús alliyachishcami

²¹ Chaimanta rishpaca Capernaumman chayashpami samana punllapi, sinagogaman yaicushpa yachachirca.

²² Paica mandashcacunata quillcajcuna shinallaca mana yachachircachu. Ashtahuanpish mandajtaj cashcata ricuchishpami yachachirca. Chaimi paipaj yachachinata yachachishcataca achcata mancharircacuna.

²³ Paicunapaj sinagogapica, millai espíritu japishca shuj runami tiyarca. Paimi caparishpa:

²⁴ –Nazaretmanta Jesús, ¿imatataj ñucanchijtaca nij shamungui? ¿Chingachingapajchu shamungui? Cantaca pi cashcata yachanimi. Jucha Illaj Taita Diospajmanta shamushcami cangui– nirca.

²⁵ Jesusca: –¡Upalla cai, cai runamanta llujshi!– nishpa sinchita rimajpimi,

²⁶ millai espirituca, maipish cachun chujchuchishpa, sinchita caparirishpa chai runamantaca llujshirca.

²⁷ Chaitaca tucuicuna mancharinacushpami: –¿Caica imatajchu imamí? ¿Ima mushuj yachanatajchu imamí? Mandajtaj shina pai rimajpica, mapa espiritucunapish cazunllamari– nishpami caishuj chaishuj rimanacurcacuna.

²⁸ Jesús chashna rurashcaca tucui Galilea llajtatami utca yacharirca.

Pedropaj suedrata Jesús alliyachishcami

²⁹ Sinagogamanta llujshishpaca, Jesusca Jacobondij, Juandijmi, Simonpaj, Andrespaj huasiman rircacuna.

³⁰ Chaipica Simonpaj suedra fiebrehuan ungushca siricujpi, Jesús chayanca paiman huillajpimi,

³¹ ungushcapajman c'uchuyashpa, maquimanta japishpa jatarichinca, chai fiebreca anchurca. Ña alliyashpaca paicunaman cararcallami.

Achca ungushcacunata Jesús alliyachishcami

³² Inti huashicushpa tutayacujpica, tucui ungushcacunata, supai japishcacunatapishmi Jesuspajman pushamurcacuna.

³³ Chai huasi punguman, pueblopi tucui causajcuna tandanacumujpimi,

³⁴ Jesusca ima ungüihuan cajcunatapish achcacunata alliyachirca. Supai japishcacunatapish supaicunata llujshichircami. Jesusca, pai pi cashcata yachajpimi, supaicunataca mana rimajta saquirca.

Galileapi Jesús huillashcami

³⁵ Jesusca amsaraj cajpi utca jatarishpa chaimanta llujshishpaca, pi mana causan chulunllaman rishpami, Taita Diosta mañarca.

³⁶ Simonpish, paihuan cajcunapish Jesusta mashcanamanmi rircacuna.

³⁷ Jesús maipi cashcaman chayashpaca: –Tucuicunamari quiquintaca mashcacun– nircacunami.

³⁸ Chaimi Jesusca: –C'uchulla llajtacunaman jacuchij. Paicunamanpish huillangapaj, chaipajmi ñucaca shamurcani– nirca.

³⁹ Tucui Galileata purishpami, paicunapaj sinagogacunapi huillashpa, supai japishcacunamantapish supaicunata llujshichirca.

Leprahuan caj runata Jesús alliyachishcami

⁴⁰ Jesús chaipi cajpimi leprahuan ungushca shuj runa shamushpa Jesuspaj ñaupajpi cungurishpaca: –Ñucata alliyachisha ninguipishchari– nijpi,

⁴¹ Jesusca paita llaquishpa, maquita chutashpa tuparishpaca: –Ari, alliyachisha ninimi, nishpaca alliyashcami cangui– nijpica,

⁴² chai runamanta lepra anchujpica alliyarcallami.

⁴³ Chai runata Jesús minchacama nishpa cachacushpaca ñataj piman huillanguiman nishpami:

⁴⁴ –Riqui, canta pi alliyachishcata pajta piman huillanguiman. Curaman ricuchigri. Can alliyashcamantaca, Moisés mandashca shina ofrendata cugri. Chashna rurajpimi curacunaca can alliyashca cashcata yachangacuna– nircami.

⁴⁵ Ashtahuanpish chaimanta rishpaca, pai ima shina alliyashcataca tucuicunaman huillajpimi, Jesusca mai pueblomanpish tucuicuna ricucujpica, mana yaicui tucushpa, shitashca pambacunallapi saquirirca. Chaipi cajpipish paipajmanca, tucui llajtacunamantami shamurcallacuna.