MALAQUÍAS 4 - Dios Rimashca Shimicunami

Mandaj Dios shamuna punllamanta

¹ Tucuita Mandaj Diosca cashnami nin: “Riquichij, hornopi nina lunyacuj shina punllaca ñallami chayamugrin. Chai punllapimi jatun tucushcacunapish, millaita rurajcunapish ujsha shina tucui rupangacuna. Chaipica sapillapish, shuj ramallapish mana saquiringachu.

² Ashtahuanpish ñucata manchashpa causajcunapajca, cashcata ruraj Intimi llujshinga. Paipaj alascunapimi quishpirinataca apamunga. Canlla malta c'ari bizicuna saltacuj shinami saltarishpa llujshinguichij.

³ Ñuca tucuita ricunaman shamui punllapica, cancunami millai runacunataca sarunguichij. Paicunaca cancunapaj chaqui shungu ucupica ushpa shinami canga.

⁴ Ñucata servij Moisesman Horeb urcupi mingashca mandashcapi imallata nishcata alli yuyarichigari. Chai mandashcacunataca tucui israelcunamanmi curcani.

⁵ Riquichij, Mandaj Dios llaquichingapaj shamuna jatun llaqui punllacuna manaraj shamujpimi, ñuca ima nishcata huillaj Eliastaca cancunapajman cachani.

⁶ Paimi yayacunataca huahuacunahuan, huahuacunatapish yayacunahuan p'iñanacushpa causacujtaca, cutin c'uyanacushpa causachun allichinga. Ashtahuanpish cancuna ishquindij mana alli tucujpica, ñuca shamushpaca tucui cai llajtapi causajcunatami llaquichishpa tucuchisha ninmi”.