MALAQUÍAS 2 - Dios Rimashca Shimicunami

¹ Curacuna, cunanca cancunataca caitami mandan:

² Tucuita Mandaj Diosca cashnami nin: “Ñuca mandashcata mana uyajpi, tucui shunguhuan ñucata jatunyachinguichij nishcata mana cazujpica, cancunataca llaquichishatajmi. Ñucata mana cazushcamantaca, cancunaman cushca ima allicunatapish quichushami. Cancunallataj imatapish mana tucui shunguhuan ñucapajta rurashcamantami, saruncunamanpish llaquichircani.

³ Cancuna tarpushca chagratapish chingachishami. Ñucaman cushpa huañuchishca animalcunapaj mapacunatapish, cancunapaj ñahuipimi shitasha. Cancunataca, chai animalcunapaj mapacunandijmi tandachishpa, p'ichashpa shitasha.

⁴ Levitacunahuan ñuca ari ninacushcata pajtachingapaj chashna mandashcataca, ñuca cushcatami yachanguichij. Tucuita Mandaj Diostajmi chashna nini.

⁵ Levitacunahuan ari ninacushcamantami, huiñai causaitapish, sumaj causaitapish curcani. Chaicunataca, ñucata manchashpa cazushpa causachunmi curcani. Chaimantami paicunaca, ñucataca manchashpa cazushpa causarcacuna.

⁶ Levitacunaca mana llullashpallami, ñuca mandashcataca yachachircacuna. Paicunaca, ima millai shimicunatapish mana rimarcacunachu. Ñucahuan cashpaca sumajta causashpa, cashcata rurashpami purircacuna. Millai ruranamantapish achcacunatami anchuchircacuna.

⁷ Cura yachachishcamantami, yachaisapa tucungacuna. Pai huillashcamantami, tucuicunallataj mandashcata yachanata munangacuna. Paica tucuita Mandaj Diosmanta huillajmi.

⁸ Ashtahuanpish cancunaca, alli ñanta ricushca jahuamari chaimantaca anchurishcanguichij. Ñuca mandashcata panda yachachishpamari, achcacunata urmachishcanguichij. Chashna rurashpami, levitacunahuan ari ninacushcataca p'aquishcanguichij. Tucuita Mandaj Diostajmi chashna nini.

⁹ Ima shinami cancunapish ñuca yachachishcacunata mana cazushpa, ñuca mandashcatapish shujcunamanca shuj shina, caishujcunamanca shujtaj shina yachachircanguichij. Chaimantami cancunataca tucuicuna p'iñashca, sarushca causachun rurarcani” ninmi.

Israelcuna mana cazushcamanta

¹⁰ ¿Manachu tucuicunallataj shujlla yayata charinchij? ¿Manachu tucuicunallataj Taita Dios rurashca canchij? Shina cajpica, ¿ima nishpataj ñucanchij ñaupa yayacunahuan ari ninacushcataca yangata rurashpa, caishuj chaishuj mana cazunacunchigari?

¹¹ Judá llajtapi causajcunaca mana cazurcacunachu. Israelpi, Jerusalenpi causajcunaca yallitajmi millaita rurarcacuna. Chaimanta Judá llajtapi causajcunaca, Mandaj Dios c'uyashca huasitami yangata rurarcacuna. Shinallataj shujtajcunapaj diosta adoraj huarmicunahuanmi casararcacuna.

¹² Jacobopaj huahua huahuapuramantaca, cuidaj cachunpish, cutichij cachunpish, tucuita Mandaj Diosman imalla cuna cashcata cuj cachunpish anchuchingallami.

¹³ Cutinllatajmari cancunaca, Mandaj Diospaj altartaca huiquicunahuan jundachinguichij, caparirishpamari huacanguichij. Chaimantami cancuna ñucaman imalla cuna cashcacunata cujpipish, manataj chasquisha.

¹⁴ Chaimanta cancunaca: “¿Imamantataj mana chasquinguichu imamí?” ninguichijmi. Canllatajmari mosoraj cashpa, ari ninacushpa cazarashca quiquin huarmitamari shitarcangui. Chaitaca Mandaj Diosca ricucurcami.

¹⁵ ¿Manachu cancuna chairaj cashpa cazarashca huarmihuanca, pai Diosllataj shujlla aichata, shujlla yuyaita rurarca? ¿Imapajshi chashna rurashca canga yuyanguichijchari? Cancunapaj huahua huahuacunapish, paipajlla cachunmari chashna rurarca. Chashna cashcamantaca ama cancunapaj yuyaita mapayachichijchu, ama cancunapaj quiquin huarmita shitaichijchu.

¹⁶ Israelcunata Mandaj Taita Diosca: “Quiquin huarmita shitajcunata, quiquin churanata mapayachijcunataca p'iñanimi” ninmi. Chaitaca tucuita Mandaj Diostajmi chashna nin. “Chaimanta millai yuyaicuna ama japichun jarcarichij. Quiquin huarmita amataj shitaichijchu” ninpishmi.

Mandaj Diosca paita mana cazujcunata llaquichinamanta

¹⁷ Cancunaca rimacushpallami, Mandaj Diostaca shaicuchishcanguichij. Chaimantaca: “¿Ima shinataj paitaca shaicuchishcanchigari?” ninguichijmi. “Maijanpish mana allita rurashpami, Mandaj Diostaca cushichin, paipish paicunamantami cushicun. Mana cashpaca, ¿cashcata ruraj Diosca maipitagari?” nishpami shaicuchinguichij.