Lucas 9 - Dios Rimashca Shimicunami

Chunga ishqui yachacujcunata huillanaman cachashcami

¹ Jesusca chunga ishqui yachacujcunata tandachishpami, tucui laya supaicunata llujshichi tucunata, ungushcacunata alliyachi tucuna podertapish curca.

² Dios ña mandagricushcata huillashpa, ungushcacunata alliyachichunmi cacharca.

³ Paicunataca cashnami nirca: –Cancuna rishpaca taunata, muchilata, cucayuta, cullquitapish ama apanguichijchu. Shujtaj churanatapish, ama apashpa, churashcalla ringuichij.

⁴ Maijan huasiman yaicushpaca, chai llajtamanta ringacama, chaillapitaj saquiringuichij.

⁵ Maipi cashpapish cancunata mana chasquishun nijpica, chai pueblomanta llujshingapajca, paicuna llaquita apana cashcata ricuchingapaj cancunapaj chaquimanta ñutu allpatapish chaspishpa chaimanta llujshishpa ringuichijlla– nircami.

⁶ Yachacujcuna rishpaca, llajtan llajtan rishpami, alli huillaita huillashpa, ungushcacunatapish alliyachishpa purircacuna.

Bautizaj Juanta huañuchishcami

⁷ Tucui imallata Jesús ruracushcatami, jatun mandaj Herodesca uyarca. Maijancunaca Jesustaca: “Bautizaj Juanmari huañushcacunapaj chaupimanta causarishca canga” nircacuna. Chaimi Herodesca, yallitaj mancharirca.

⁸ Maijancunaca: “Eliasmari ricurishca” nircacuna. Shujtajcunaca: “Ñaupa profetacunamanta maijanmari causarishca canga” nircacuna.

⁹ Herodesca: –Juantaca ñucamari cungata p'itichircani. Cunanca shuj runami tucuita rurashpa puricun nijta uyani. ¿Chai runaca pitaj canga?– nishpami, Jesustaca paipaj ñahuihuantaj ricuiman yuyacurca.

Pichca huaranga gentecunaman carashcami

¹⁰ Apostolcunaca huillachun Jesús cachashcamanta tigrashpaca, tucui imalla rurashcatami paiman parlarcacuna. Chai q'uipami paicunata pushashpa, Betsaida pueblo c'uchulla pi mana causanman Jesusca rirca.

¹¹ Chaita gentecuna yachashpa paita catishpa rijpimi Jesusca, Taita Diosca ñami mandagrin nishpa huillarca. Alliyaiman yuyacujcunatapish alliyachircami.

¹² Ashtahuanpish ña chishiyamujpica, chunga ishqui yachacujcuna c'uchuyashpaca: –Cai muyundij uchilla llajtacunapi, huasicunapi micunata, samarinata mashcagrichuncuna, caipi cajcunataca cayacama niyari. Caipica, pi mana causanpimi canchij– nircacunami.

¹³ Chaimi Jesusca: –Paicunamanca cancuna caraichigari– nijpi, paicunaca: –Ñucanchijca pichca tandata, ishqui chalhuallatamari charinchij. Cai tucuicunapajca, randigrinami canga– nircacuna.

¹⁴ Chaipi caj gentecunaca, pichca huaranga shinami carca. Chaimi yachacujcunataca: –Tucuicunallatataj pichca chunga, pichca chunga tucushpa tiyarichun nichigari– nirca.

¹⁵ Chaimi Jesús nishca shinallataj tucuicunata tiyachircacuna.

¹⁶ Jesusca pichca tandata, ishqui chalhuatapish japishpami, jahua pachata huichilla ricushpa, Taita Diosta pagui nirca. Chai q'uipaca chaupishpa chaupishpami, tucuicunaman carachun yachacujcunaman cushpa catirca.

¹⁷ Tucuicunami mana nijta micurcacuna. Puchushcacunatapish chunga ishqui canasta jundatami tandarcacuna.

Pedroca Jesustaca Quishpichij Cristomi cangui nishcami

¹⁸ Chai q'uipami Jesusca Taita Diosta mañacujpi yachacujcuna paihuan cajpi Jesusca yachacujcunataca cashna tapurca: –Gentecunaca ¿pi cashcatataj ñucataca yuyancuna?– nijpi,

¹⁹ paicunaca: –Shujcunaca, Bautizaj Juanmi. Caishujcunaca, Eliasmi. Maijancunaca ñaupa profetacunapuramanta maijantajshimi causarishca nincunami– nircacuna.

²⁰ Chaimi Jesusca: –Cancunaca ñucataca ¿pi cashcatataj yuyanguichij?– nijpi, Pedroca: –Canca Taita Diospajmanta shamuj Cristomi cangui– nirca.

Jesusca pai huañuna cashcata huillashcami

²¹ Ashtahuanpish Jesusca caitaca ñataj piman huillanguichijman nishpa mandashpaca,

²² cashnami nirca: –Runa Aichayujca achca llaquicunata apanatajmi. Cunaj yuyajcuna, curacunata pushajcuna, mandashcacunata quillcajcunapish p'iñashpami huañuchingacuna. Ashtahuanpish quimsa punllapica causachishcami canga– nircami.

²³ Tucui chaipi cajcunataca cashnami nirca: –Maijanpish ñucata catisha nijca, chacatashpa huañuchina cajpipish, quiquin causaita mana llaquishpa punllanta ñucata catichunlla.

²⁴ Pipish paipaj causaita quishpichisha nijca, chingaringami. Pipish ñucamanta paipaj causaita chingachijmi, quishpiringa.

²⁵ Tucui cai pachapi tiyajcunata charishpapish, paipaj almata huiñaipaj chingachishpaca ¿ima allitaj cangari?

²⁶ Ñucamanta, ñuca yachachishcacunamantapish maijan pingarijtaca, Runa Aichayuj ñucaca jucha illaj angelcunandij, ñuca Yayapaj achij nicuj sumaj cashcahuan shamushpaca, paimantapish pingarishami.

²⁷ Taita Dios mandangapaj shamucujta ricungacama, maijan caipi cajcunaca, manaraj huañungacunachu. Chashnatajmi canga– nircami.

Jesusca shujtajyarishcami

²⁸ Cai shimicunata nishca pusaj punlla q'uipa shinatami Jesusca Pedrota, Juanta, Jacobotapish pushashpa, Taita Diosta mañangapaj urcuman huichiyarca.

²⁹ Jesús mañacushpaca ñahuipish shujtajyarishpa, churanapish lamyacuj yurajllami tucurca.

³⁰ Chaipica, ishqui runacuna Jesushuan parlanacucujmi ricurirca. Chai runacunaca Moisesmi, Eliasmi carca.

³¹ Paicunaca sumaj achij nicuj chaupipi ricurishpaca, Jerusalenpi Jesús ima shina huañuna cashcata, causarina cashcata, jahua pachaman rina cashcatapishmi parlanacucurca.

³² Pedropish, paihuan cajcunapish dorminaihuan cashpapish mana dormishpami, Jesusca sumaj achij nicuj cashcata, paihuan parlanacucuj ishqui runacunatapish ricuracurcallacuna.

³³ Chai ishqui runacuna Jesusmanta caruyashpa rijpica, Pedroca, Jesustaca: –Yachachij, ñucanchijca allitajchari caipi canchij. Quimsa chujllacunata rurashun. Shujtaca cambaj, caishujtaca Moisespaj, chaishujtaca Eliaspaj– nirca. Ashtahuanpish Pedroca imata rimacushcatapish mana yacharcachu.

³⁴ Pedro chashna rimacujpiraj, p'uyu shamushpa tapajpimi achcata mancharircacuna.

³⁵ Chai p'uyumantaca: “Caica ñuca c'uyashca Churimi, paita uyaichij” nishpa rimashcami uyarirca.

³⁶ Chai rimacui ña tucurijpica, Jesusca paillami ricurirca. Paicuna tucui imallata ricushcataca chai punllacunapica, piman mana imata huillarcacunachu.

Supai japishca huambrata Jesús alliyachishcami

³⁷ Cayandij punlla urcumanta uriyamujpica, achcacunami Jesusta tupanaman llujshimurcacuna.

³⁸ Chai tucuicunapuramanta shuj runami, cashna caparirca: –Yachachij, ñuca huahuata ayudapai, cai huahuallatamari charini.

³⁹ Paitaca millai espíritu japishpamari ñapish caparichishpa, maipish cachun chujchuchishpa, shimimanpish puscuta shitachinlla. Chashna maipishcachun llaquinayajta llaquichishpami paimanta anchurin.

⁴⁰ Chaimari cambaj yachacujcunataca chai millai espirituta llujshichipaichij nishpa rogarcani. Ashtahuanpish mana llujshichi tucuncunachu– nircami.

⁴¹ Chaimi Jesusca: –¡Huahua huahuami mana crij millaicuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? nishpaca, chai runataca cambaj huahuata caiman pushamui– nirca.

⁴² Shina nijpi huambrata Jesuspajman c'uchuyachigrijpica, supaica chujchuchishpami pambaman urmachirca. Chaimi Jesusca millai espirituta sinchita rimashpa, huambrata alliyachishpa paipaj yayaman curca.

⁴³ Taita Diospaj poderca jatun cashcata ricushpaca, tucuicunami achcata mancharircacuna. Tucuicuna pai imalla rurashcata ricushpa mancharinacucujpimi, Jesusca paipaj yachacujcunata cashna nirca:

Jesusca pai huañuna cashcata cutin huillashcami

⁴⁴ –Cai ñuca huillashcata alli uyaichij. Pajta cungaringuichijman. Runa Aichayujtaca gentecunapaj maquipimi entreganga– nirca.

⁴⁵ Chaitaca paicunapaj yuyaicuna tapashca cashcamantami paicunaca imata nisha nishcata mana entendircacuna. Chai yachachishcacunaca ¿imatataj nisha nin? nishpa tapunatapish mancharcacunami.

Jahua pachamanta mandacujpica ¿maijanshi jatun cashun? nishcami

⁴⁶ Chai q'uipami yachacujcunaca, paicunapuralla maijanshi ashtahuan jatun canchij ninacushpa rimanacucurcacuna.

⁴⁷ Paicunapaj shungupi imata yuyacujta yachashpami Jesusca, shuj huahuata japishpa paipaj c'uchupi churashpa,

⁴⁸ cashna nirca: –Maijanpish ñuca shutipi cai huahuata chasquijca, ñucatami chasquin. Maijanpish ñucata chasquijca, ñucata cachajtami chasquin. Cancunapurapi maijanpish tucuicunamanta yalli uchilla cajmi, tucuicunata yalli jatun canga– nircami.

Ñucanchijta mana p'iñajca ñucanchijpurallatajmi nishcami

⁴⁹ Chaipimi Juanca: –Yachachij, shuj runa cambaj shutipi supaicunata llujshichicujta ricushpami, paica mana ñucanchijpura cajpi, ama chashna ruraichu nircanchij– nirca.

⁵⁰ Chaimi Jesusca: –Chashna rurajtaca ama jarcaichijchu. Maijanpish ñucanchijta mana p'iñajca, ñucanchijpurallatajmi– nirca.

Jacobota Juanta Jesús sinchita rimashcami

⁵¹ Jesusca jahua pachaman rina punlla chayamucujpimi, Jerusalenmanca mana manchashpa rina tucurca.

⁵² Chaimi huillajcunata ñaupachishpa cacharca. Paicuna rishpaca samaritanocuna causan shuj uchilla llajtamanmi, pozadata mashcangapaj rircacuna.

⁵³ Ashtahuanpish Jerusalenman ricujta yachashpami, chai gentecunaca mana chasquircacuna.

⁵⁴ Chaita ricushpami Jesuspaj yachacuj Juanpish, Jacobopish: –Mandaj Jesús, cai tucuicunata chingachichun Elías mañashca shina ¿jahua pachamanta ninata cachachun mañashunchu?– nircacuna.

⁵⁵ Chaimi Jesusca sinchita rimashpa cashna nirca: –Cancunaca pi rimachijpi chashna rimacushcatapish mana yachanguichijchu.

⁵⁶ Runa Aichayujca, runacunapaj almata chingachingapajca mana shamurcachu, ashtahuanpish quishpichingapajmi shamurca– nishpaca, shujtaj uchilla llajtamanmi rircacuna.

Jesusta catishun nishcacunami

⁵⁷ Paicuna ñanta ricujpica, shuj runami Jesustaca: –Amito, maiman rijpipish canhuanmi risha– nirca.

⁵⁸ Chaimi Jesusca: –Zorracunapish causanapaj jutcuta, pajarocunapish tazinta charincunami. Ashtahuanpish Runa Aichayujca, dormingapaj saunallatapish mana charinchu– nirca.

⁵⁹ Cutin shujtaj runataca: –Ñucata cati– nijpica: –Amito, ñuca yayataraj pambamugrisha– nirca.

⁶⁰ Chaimi Jesusca: –Huañushcacunataca huañushcacunallataj pambacuchun saquilla. Ashtahuanpish canca, Taita Dios ima shina mandagrinta huillagri– nircami.

⁶¹ Chai q'uipaca cutin shujtajmi: –Amito, ñucaca canta catisha ninimi. Ashtahuanpish ñuca huasipi cajcunataraj, minchacama nimugrisha– nirca.

⁶² Chaimi Jesusca: –Maijanpish huashaman ricushpaca, mana yapunchu. Chashnacunaca Taita Dios mandacujpica mana paipajta ruraj cai tucunchu– nirca.