Lucas 24 - Dios Rimashca Shimicunami

Jesús causarishcami

¹ Semana callari punlla pacarigrijpimi, huarmicunaca paicuna allichishca mishquijlla ashnacujcunata apashpa, shujtaj tauca huarmicunandij Jesusta churashca jutcuman rircacuna.

² Paicunaca jutcu pungupi churashca rumitaca ladoman churashca cashcata ricushpa,

³ jutcuman yaicushpaca, Mandaj Jesuspaj cuerpotaca ña mana japircacunachu.

⁴ Chaipi paicuna mancharinacushpa shayacujpimi, lamyacuj churanata churarishca ishqui c'aricuna paicunapaj c'uchupi ñapish shayarircacuna.

⁵ Chaipicarin ashtahuan mancharinacushpa pambaman cumurijpimi, paicunaca: –¿Ima nishpataj causacujtaca, huañushcacunapaj chaupipi mashcacunguichigari?

⁶ Paica mana caipichu, ashtahuanpish causarircamari. Galileapi cashparaj, pai imata nishcata yuyarichigari.

⁷ Chaipica paica: “Runa Aichayujca, chacatashpa huañuchichun juchayuj runacunaman entregashcatajmi canga. Ashtahuanpish quimsa punllapica causaringallami”– nircami.

⁸ Chaipica huarmicunaca Jesús chashna nishcatami yuyarircacuna.

⁹ Jutcumanta paicuna tigrashpaca, chunga shuj yachacujcunaman, caishuj crijcunamanpish tucui imalla tucushcatami huillarcacuna.

¹⁰ Apostolcunaman chaicunata huillagrijcunaca, Magdalamanta Mariapish, Juanapish, Jacobopaj mama Mariapish, shujtaj huarmicunapishmi carca.

¹¹ Huarmicuna huillashcaca apostolcunapica musparicushca shinalla cajpimi, Jesús causarishca canataca mana crircacuna.

¹² Mana cricushpapish Pedroca jatarishcahuan callpashpa jutcuman rishpa chayashpaca pillushca linsocunallata ricushpami, achcata mancharishpa huasiman tigrarca.

Emausman rina ñanpi ishqui runaman Jesús ricurishcami

¹³ Chai punllallatajmi yachacujcunapuramanta ishqui runacunaca, Emaús shuti puebloman ricurcacuna. Chai puebloca Jerusalenmanta chunga shuj kilómetro shinallapimi carca.

¹⁴ Paicunaca tucui imalla tucushcacunatami, parlanacuihuan ricurcacuna.

¹⁵ Paicuna parlanacuihuan caishuj chaishuj rimanacuihuan ricujpica, Jesusca ñapish paicunapajman c'uchuyashpami paicunahuan rirca.

¹⁶ Paicunapaj ñahuicunaca huichcashca shina cajpimi Jesustaca mana rijsircacuna.

¹⁷ Chaimi Jesusca: –Cancunaca ¿imatataj parlanacuihuan ricunguichij? ¿Imamantataj llaquilla canguichij?– nishpa tapujpi,

¹⁸ paicunamanta Cleofas shuti shuj runaca: –Tucuicunamari cai punllacuna Jerusalenpi ima tucushcataca yachancuna. ¿Canllachari maimanta cashpa mana yachangui?– nijpimi,

¹⁹ Jesusca: –¿Imataj tucushca?– nishpa tapujpi, paicunaca: –Nazaretmanta caj Jesusmantami parlanacucunchij. Paica Taita Diospaj ñaupajpipish, gentecunapaj ñaupajpipish allita ruraj, allita rimaj, tucuita rurai tucuj profetami carca.

²⁰ Paitamari curacunata pushajcuna, ñucanchij llajtata mandajcunapish huañunatajmi can nishpa cujpi chacatashpa huañuchincuna.

²¹ Ñucanchijca cai Israeltaca paimi quishpichinga nishpamari yuyacurcanchij. Ashtahuanpish paita huañuchishcaca, ñamari quimsa punlla tucun.

²² Chashna cajpipish, ñucanchijpuramanta maijan huarmicunamari, manaraj pacarijpi chai jutcuman rishpaca,

²³ Jesuspaj cuerpoca mana ricurinchu nishpa manchachincuna. Cashnapishmi nincuna. Angelcuna muscuipi shina ricurishpami Jesusca causacunmi ninmi nincuna.

²⁴ Chaimi ñucanchijpuramanta maijancunapish jutcuman rishpaca paicunapish huarmicuna nishca shinallataj ricumushcacuna. Ashtahuanpish Jesustaca mana ricushcacunachu– nircacunami.

²⁵ Chaimi Jesusca: –¡Cancunaca ¿upacunachu canguichij? Profetacuna huillashcacunata crinamari cancunapajca sinchiraj cashca!

²⁶ Cristoca sumaj llajtaman yaicushpa mandaj cangapajca ¿manachari llaquicunataraj apana nin?– nishpaca,

²⁷ Moisés quillcashcamanta callarishpa, tucui profetacuna quillcashcacamami, Quillcachishcacunapi pai imalla tucuna cashcata huillacushcata yuyachirca.

²⁸ Chaicamaca paicuna ricun pueblomanmi chayarcacuna. Ña chayashpaca Jesusca mai caruman ricuj shinami tucurca.

²⁹ Chaimi paicunaca: –Ñucanchijhuan saquirilla, ñamari chishi, tutayacunmari– nishpa, mana cachashun nircacuna. Chaimi paicunahuan saquiringapaj yaicurca.

³⁰ Micungapaj ña tiyarishpaca, tandata japishpa Taita Diosta pagui nishpami, chaupishpa paicunaman curca.

³¹ Chaimi paicunapaj ñahuica pascarij shina tucujpi Jesús cashcata rijsircacuna. Chaipica Jesusca paicunapaj ñaupajmanta chingarircallami.

³² Chaimi paicunaca: –Quillcachishcacunata yuyachishpa, ñanpi ñucanchijman huillacushpaca ¿manachu ñucanchij shungutaca rupachij shina yuyachishpa rimarca?– nishpami, caishuj chaishuj ninacurcacuna.

³³ Paicunaca chashna ninacushcahuanmi jatarishcahuan Jerusalenman tigrarcacuna. Chaipica chunga shuj yachacujcunataca, shujtajcunandij tandanacushcatami japircacuna.

³⁴ Chaipi cajcunaca: –Mandaj Jesusca causarishcatajmari, Simonmanmari ricurishca– nircacunami.

³⁵ Chaimi paicunapish ñanpi imalla tucushcata, tandata chaupicujpi ima shina Jesusta rijsishcatapish parlarcacuna.

Yachacujcunaman Jesús ricurishcami

³⁶ Chaicunamanta paicuna parlanacucujpirajmi, Jesusca ñapish paicunapaj chaupipi ricurishpaca: –¡Sumaj causai cancunahuan cachun!– nirca.

³⁷ Paicunaca ayatami ricucunchij yuyashpami, chujchushpa mancharircacuna.

³⁸ Chaimi Jesusca cashna nirca: –¿Ima nishpataj mancharinguichij? ¿Ima nishpataj cancunapaj shungupica caita chaita yuyacunguichij?

³⁹ Ñuca maquita, ñuca chaquita japishpa ricuichij ñucallatajmi cani. Ayaca mana aichayuj, mana tulluyujchu. Cancuna ricushca shina, ñucaca aichayuj, tulluyujmi cani– nircami.

⁴⁰ Shina nishpaca maquita, chaquitapishmi ricuchirca.

⁴¹ Ashtahuanpish paicunaca cushicuimanta mancharinacushpa, Jesús cashcata manaraj crijpimi: –¿Ima micunata caipi charinguichijchu?– nijpi,

⁴² paicunaca asha chalhua cusashcata, sacha chuspipaj mishquitapish curcacuna.

⁴³ Chaita japishpaca, paicunapaj ñaupajpimi micurca.

⁴⁴ Chai q'uipaca Jesusca paicunataca: –Moisés Mandashcapipish, Profetacuna quillcashcapipish, Salmocunapipish ñucamanta tucui imalla tucuna cashcata huillashcacuna pajtachunmi chashna tucurca. Tucui chaicuna chashna tucuna cashcataca cancunahuan cashparajmi huillarcani– nircami.

⁴⁵ Chashna nishpami Quillcachishcacunata alli entendichun, paicunapaj yuyaicunata pascashpa,

⁴⁶ cashna nirca: –Quillcachishcapi nishca shinaca Cristoca llaquita apashpa, huañushpa, quimsa punllapica causarinami carca.

⁴⁷ Jerusalenmanta callarishpa, tucui llajtacunapi causajcunaman mana allita ruracushcata saquishpa cutirichij, juchacunata Taita Dios perdonachun nishpa paipaj shutipi huillashcami canga nishcamari.

⁴⁸ Chashna nishca shinallataj tucui imalla tucushcata ricushcataca cancunami huillana canguichij.

⁴⁹ Cunanca ñuca Yaya cusha nishca Espiritutami cancunapajman cachasha. Jahuamanta cachashca tucuita rurai tucujhuan churaringacama, Jerusalenllapitaj shuyacunguichijlla– nircami.

Jahua pachaman Jesús rishcami

⁵⁰ Chai q'uipami Jesusca, Betania ch'imbanijman paipaj yachacujcunata pushashpa rishpaca, paicunapaj jahuaman maquicunata chutashpa Taita Dios cancunahuan cachun nirca.

⁵¹ Taita Dios cancunahuan cachun nishpa paicunamanta anchurijpica, jahua pachaman aparcallami.

⁵² Jesusta adorashca q'uipaca jatunta cushicushpami paicunaca Jerusalenman tigrarcacuna.

⁵³ Chaipica punllantami Taita Diospaj huasipi Taita Diosta adorashpa, allimari cangui nicurcallacuna. Chashna cachun.