Lucas 2 - Dios Rimashca Shimicunami

Jesús huacharishcami

¹ Chai punllacunapimi Augusto shuti Cesarca pai mandacun tucui llajtacunapi causajcuna, shuticunata quillcachichun nishpa huillachirca.

² Cirenio shuti runa Siria llajtata mandacujpimi, shuticunata quillcachinaca punta callarirca.

³ Shuticunata quillcachinamanca tucuicunami paicunapaj quiquin pueblocunaman rina carca.

⁴ Josepish, Galileapi caj Nazaretmantaca, Judeapi caj Belenmanmi huichiyarca. Ñaupa yaya Davidca chaipi huacharishca cashcamantami, Joseca Davidpaj huahua huahua cashcamanta chaiman rirca.

⁵ Joseca cazaranapaj ari ninacushca Mariandijmi shuticunata quillcachingapaj chaimanca rirca. Mariaca chichumi carca.

⁶ Paicuna Belenpi cajpimi, María huachanaca pajtarca.

⁷ Pozana huasicunapi junda cajpimi, Mariaca punta c'ari huahuataca huagracuna shayana ucullapi huacharca. Chai huahuataca maitushpami ujsha jahuapi sirichirca.

Angelcunapish michijcunapish

⁸ Chai c'uchulla llajtacunapica michijcunami tiyarca. Paicunaca paicunapaj canlla ovejacunatami tuta chapashpa cuidacurcacuna.

⁹ Chaipica Jatun Diospaj shuj ángel ricurishpa, Jatun Diospaj achijnicujhuan muyunchijpimi paicunaca achcata mancharircacuna.

¹⁰ Chaimi angelca: –Ama manchaichijchu. Ñucaca tucuicuna jatunta cushicuna alli mushuj huillaitami, cancunamanca huillaj shamuni:

¹¹ Cunanmari Davidpaj pueblopica, shuj Quishpichij huacharishca. Paica Mandaj Cristomi.

¹² Cancuna rishpaca, huagracuna shayana ucupimi, maitushca huahua siricujta ricunguichij. Chaita ricushpami pai cashcata yachanguichij– nirca.

¹³ Chaipica ñapish jahua pacha achca angelcuna, chai huillacuj angelhuan ricurishpami, Diosta alabashpa cashna nircacuna:

¹⁴ “¡Jahua pachapi caj Diostaca tucuicuna alli nishca cachun! ¡Cai pachapipish pai c'uyashpalla cushcata chasquijcunaca sumaj causaita charichun!” nircacunami.

¹⁵ Chai angelcuna jahua pachaman ña rijpica, michijcunaca caishuj chaishujmi: –Jatun Dios ñucanchijman huillachishca imalla tucushcata ricungapaj Belenman chayajta jacuchij– nircacuna.

¹⁶ Paicuna ucui jahua rishpaca Mariatapish, Josetapish, ujsha jahuapi siricuj huahuatapishmi huagracuna shayana ucupi ricurcacuna.

¹⁷ Chai huahuata paicuna ricushpaca, ángel chai huahuamanta imallata paicunaman nishcatami huillarcacuna.

¹⁸ Michijcuna huillashcata uyajcunaca tucuicunami achcata mancharircacuna.

¹⁹ Ashtahuanpish Mariaca tucui chaicunataca, paipaj shungupi huaquichishpami yuyaricurcalla.

²⁰ Michijcunaca paicunaman huillashcata uyashca shinallatataj ricushpaca, tucui chaicunamanta Diostaca allimari cangui, sumajmari cangui nishpami tigrarcacuna.

Diospaj huasiman Jesusta apashcami

²¹ Ña pusaj punlla tucujpica huahuata circuncisionta rurachinamanmi aparcacuna. Chai punllallatajmi María manaraj chichu cajpi ángel huillashca shinallataj JESÚS shutita shutichircacuna.

²² Huachashca q'uipa maillarina punllacunata pajtachishpaca, Jatun Diospaj ñaupajpi alli ricuringapajca Moisés Mandashca shinallatajmi rurarcacuna. Chai q'uipami, huahua Jesustaca Jatun Diospaj ñaupajman paiman cungapaj Jerusalenman apamurcacuna.

²³ (Jatun Dios Quillcachishpa Mandashcapica: “Punta huacharij tucui c'ari huahuacunaca, Jatun Diospajlla ch'icanchishcami canga”) nishcata pajtachingapajmi apamurcacuna.

²⁴ Jatun Dios Mandashcapica: “Ishqui urpita cashpa, ishqui palomata cashpapish cungui” nishcatapish apamurcacunami.

²⁵ Chai punllacunaca Jerusalenpica, Simeón shuti runami tiyarca. Paica cashcata ruraj, Diosta manchaj, israelcunata Dios quishpichinata shuyacujmi carca. Jucha illaj Espiritupish paipaj jahuapimi carca.

²⁶ Paimanca Jucha illaj Espiritumi, Jatun Dios cachashca Quishpichij Cristota ricungacama, manaraj huañunguichu nishca carca.

²⁷ Simeonca Diospaj Espíritu pushajpimi Diospaj huasiman shamurca. Chaipimi yaya mamaca mandashcapi nishcata pajtachingapaj, huahua Jesustaca Diospaj huasiman apamujpi,

²⁸ Simeonca huahuata marcashpa, Diosta allimari cangui nishpaca cashna nirca:

²⁹ “Jatun Dios quiquin cusha nishcataca ñamari pajtachingui, quiquinpajta rurajtaca cushicushpa huañuchun saquihuailla.

³⁰ Quiquin cushca Quishpichijtaca, ñuca ñahuihuantajmi ricuni.

³¹ Paitaca tucuicuna ricuchunmi allichishcangui.

³² Paica mana israelcunata luz shina achijyachinapajmi. Quiquinpaj pueblo Israeltapish paimanta shujtajcuna alli ninapajmi” nircami.

³³ Paicunapaj huahuamanta Simeón imalla nishcata uyashpaca, Josepish, huahuapaj mamapish achcatami mancharircacuna.

³⁴ Simeonca Dios allicunata cuchun nishca q'uipami Jesuspaj mama Mariataca: –Cai huahuataca, cai Israelpica achcacuna urmanapaj achcacuna jatarinapajmi churashca. Paica achcacuna Diosta p'iñana cashcata ricuchijmi canga.

³⁵ Chashna p'iñashpaca paicunapaj shungupi imata yuyacushcataca llaquichishpa ricuchijpimi, cambaj shungupica, shuj espada cambaj shunguta chaupijpi shina tullu ñutcucama llaquiringui– nircami.

³⁶ Ana shuti yallitaj yuyaj huarmipish chaipimi carca. Paica Dios ima nishcata huillajmi carca. Chai huarmica, Aserpaj aillumanta caj Fanuelpaj ushushimi carca. Pai cazarashca canchis huatallapimi cusaca huañushca carca.

³⁷ Paica pusaj chunga chuscu huatatami viuda causarca. Chai huarmica Diospaj huasimantaca manataj anchushpami, tutapish punllapish Diospajta rurashpa, ayunashpa, mañashpa causarca.

³⁸ Chai yallitaj yuyaj huarmica Simeón rimacujpiraj chayashpami chai huahuata ricushpa Diosta pagui nirca. Jerusalenpi causajcuna Quishpichijta shuyacujcunamanpish tucuicunamanmi huillarca.

Nazaretman tigrashcami

³⁹ Jatun Dios mandashcata tucuita pajtachishpami, Joseca Mariandij Galileapi caj paicuna causacushca Nazaret puebloman tigrarcacuna.

⁴⁰ Chai huahua huiñashpaca ashtahuan sinchiyashpa Diosmanta alli yachajmi carca. Mana c'uyaipajta c'uyaj canapish paihuanmi carca.

Huahua Jesús Diospaj huasiman rishcami

⁴¹ Jesuspaj yaya mamaca huatantami, Jerusalén Pascua fiestaman rijcuna carca.

⁴² Paicunaca chunga ishqui huatata Jesús charijpipish, Jerusalén fiestamanmi huichiyarcacuna.

⁴³ Ña fiesta tucurijpica Jesuspaj yaya mamaca huasimanmi tigrarcacuna. Jesusca Jerusalenllapitajmi saquirishca carca. Chaitaca Josepish, Jesuspaj mamapish mana yacharcacunachu.

⁴⁴ Ñucanchijhuan shamucujcunahuanchari shamucun yuyashpami, tucui punlla rircallacuna. Mana ricurijpimi paicunapaj familiacunata, rijsishcacunata tapushpa mashcarcacuna.

⁴⁵ Ashtahuanpish mana japishpaca, Jerusalenllamantajmi, mashcanaman tigrarcacuna.

⁴⁶ Ña quimsa punllata mashcacushpallami, Diospaj huasi ucupi Mandashcacunata yachachijcunata uyashpa, paicunata tapushpa paicunapaj chaupipi tiyacujta japircacuna.

⁴⁷ Tucui tapushcacunata cutichishcata uyajcunaca, alli cutichijpimi, yuyaisapa cashcata ricushpa mancharircacuna.

⁴⁸ Chaipi cajta ricushpami yaya mamaca mancharircacuna. Chaimi paipaj mamaca: –Huahua ¿ima nishpataj cashnaca ruranguiyari? Yayapish, ñucapish achcata mancharishpamari mashcamunchij– nircami.

⁴⁹ Chaimi Jesusca: –¿Ima nishpataj ñucataca mashcarcanguichigari? Ñuca Yayapaj huasipi imalla rurana cashcapaj cana cashcataca ¿manachu yacharcanguichij?– nirca.

⁵⁰ Ashtahuanpish paicunaca, imata nishcata mana entendircacunachu.

⁵¹ Jesusca Nazaretman paicunahuan tigrashpaca, tucui ima nishcatapish cazushpami causarca. Paipaj mamaca, tucui imalla tucujta ricushpaca paipaj shungupimi huaquichishpa catirca.

⁵² Jesusca ashtahuan huiñashpa yachaisapa tucushpami catirca. Diospish, runacunapish alli nishcami carca.