Lucas 18 - Dios Rimashca Shimicunami

Viuda huarmimanta millai juezmanta yuyachishpa parlashcami

¹ Taita Diosta mañanataca mana shaicushpa tucui imapipish mañacunallami nishpa yachachingapajca, cai yuyachij parlotami Jesusca,

² cashna nishpa parlarca: “Shuj pueblopimi Taita Diostapish, runacunatapish mana manchaj juez causarca.

³ Chai pueblollapitajmi shuj viuda huarmipish causarca. Paica: “Ñucata p'iñajta imallatapish nipai” nishpami, juezpajman shamucujlla carca.

⁴ Juezca pai huillashcataca mana uyasha nircachu. Punllanta puricujllapimi, cashna yuyarirca: Taita Diostapish, runatapish mana manchanichu,

⁵ shina cajpipish cai viuda huarmica, yallitajmi p'iñachin. Ama cutin cutin shamushpa p'iñachicuchunllaca paita p'iñajta cayashpa rimasha” nirircami.

⁶ Chaimi Mandaj Jesusca: “Millai juez cashpapish ima shina nishcata yuyarichij.

⁷ Taita Dioscarin tutapish punllapish pai agllashcacuna caparijpica, ¿manachu imatapish mana uniyashpalla paicuna mañashcata cutichinga?

⁸ Cancunaman huillanimi: Paica mana uniyashpallami paicuna mañashcata cunga. Ashtahuanpish Runa Aichayuj shamushpaca ¿cai pachapica chashna crijtaca japingachu imashi?” nircami.

Fariseomanta impuestota japijmanta yuyachishpa parlashcami

⁹ Cashcata rurajcunami canchij yuyashpa, shujtajcunata p'iñajcunata yuyachingapajca cai yuyachij parlotami Jesusca cashna parlarca:

¹⁰ “Ishqui runami Taita Diospaj huasipi Taita Diosta mañangapaj rircacuna: Shujca fariseo, caishujca impuestota japijmi carca.

¹¹ Fariseo shayarishpaca, paillataj alli nirishpami cashna mañarca: “Taita Dioslla, cantami pagui nini. Ñucaca mana shujtaj runacuna shina: Shuhuaj, cashcata mana ruraj, huainayaj mana canichu. Impuestota japij cai runa shinapish mana canichu.

¹² Semanapica ishqui cutinmi ayunani. Tucui ñuca ganashcamantapish, chungamanta shujtami cuni” nirircami.

¹³ Ashtahuanpish impuestota japijca caruman shayarishpa, mana huichilla ricushpallapish shungupi huajtarishpami: “Taita Dioslla, ñucata llaquihuayari, juchasapamari cani” nirirca.

¹⁴ Cancunaman huillanimi: Impuestota japij runarajmi huasimanca Taita Dios alli nishca tigrarca. Fariseo mañashcataca mana chasquircachu. Maijanpish jatunmi cani nirijtaca, pingachishcami canga. Mana jatun tucujtaca, jatunyachishcami canga” nircami.

Huahuacunapi Jesús tuparichun paicunata pushamushcami

¹⁵ Huahuacunapi Jesús tuparichun nishpami apamurcacuna. Yachacujcuna ricushpaca sinchita rimashpami jarcarcacuna.

¹⁶ Chaimi Jesusca, yachacujcunata cayashpa cashna nirca: –Huahuacuna ñucapajman shamuchun saquichij, ama jarcaichijchu. Cai huahuacuna shina tucujcunatami Taita Diosca mandacun.

¹⁷ Taita Dios paita mandachun shuj huahua shina maijanpish mana chasquijca, Taita Dios mandacujpica mana yaicungachu. Chashnatajmi canga– nircami.

Achcata charij mozo Jesusta tapushcami

¹⁸ Chai q'uipami shuj mandajca: –Yachachij canca allimari cangui. Huiñai causaita charingapajca ¿imatataj rurana cani?– nishpa tapujpi,

¹⁹ Jesusca: –¿Ima nishpataj ñucataca alli ningui? Allica pi mana tiyanchu, ashtahuanpish Taita Diosllami allica tiyan.

²⁰ Mandashcacunataca yachanguillatajmi: “Ama huainayangui, ama huañuchingui, ama shuhuangui, ama llullashpa huillangui, cambaj yaya mamatapish alli ningui” ninmi– nircami.

²¹ Chaimi paica: –Tucui chaicunataca, huahuamanta pachami pajtachishcani– nirca.

²² Chaita uyashpami Jesusca: –Shujca illanrajmi: Can imalla charishcacunata tucui c'atushpa, huajchacunaman cugri. Chaimi jahua pachapica achcata charingui. Chai q'uipaca, shamui ñucata cati– nirca.

²³ Chai uyashpaca achcata charij cashcamantaca, yallitajmi llaquirirca.

²⁴ Achcata llaquirijta Jesús ricushpaca cashnami nirca: –¡Achcata charijcunaca Taita Dios mandacujpica, mana jahualla yaicui tucungacunachu!

²⁵ Shuj camellorajmi auja rinrintaca, jahualla pasan. Taita Dios mandacujpi shuj charij chaiman yaicunaca, chaitapish yalli sinchimari– nircami.

²⁶ Chaita uyacujcunaca: –Shinashpaca ¿pitaj quishpiri tucungari?– nijpimi,

²⁷ Jesusca: –Gentecunapajca sinchitajmari, ashtahuanpish Taita Diospajca imapish jahuallami– nirca.

²⁸ Chaimi Pedroca: –Ñucanchijca tucui imalla charishcacunata saquishpami, cantaca caticunchij– nirca.

²⁹ Chaimi Jesusca: –Taita Dios mandacujpi chaipi cangapaj huasita, yaya mamata, huauquicunata, huarmita, huahuacunatapish saquishpaca,

³⁰ cunan punllacunapish ashtahuan achcatami chasquinga. Shamuj punllapicarin huiñai causaitami chasquinga. Chaica chashnatajmi– nircami.

Jesusca caihuanca pai huañuna cashcata quimsa cutin huillashcami

³¹ Chai q'uipami Jesusca, chunga ishqui yachacujcunallata pushashpa cashna nirca: –Cunanca Jerusalenmanmi rigrinchij. Chaipica Runa Aichayuj imalla tucuna cashcata profetacuna quillcashcami tucui pajtanga.

³² Chaipica mana israelcunamanmi cunga. Paicunaca chanzata rurashpami asingacuna. C'amishpa rimangacunami, ch'ucangacunami,

³³ azotingacunami, chai q'uipaca huañuchingacunami. Huañuchijpipish quimsa punllapica causaringallami– nirca.

³⁴ Shina nijpipish yachacujcunaca, chai tucui imalla nishcacunaca mana entendipajlla cashcamantami ima nisha nishcata mana entendircacuna.

Jericopi causaj mana ricuj runata Jesús alliyachishcami

³⁵ Jericoman Jesús ña chayagricujpica, shuj mana ricuj runami ñan c'uchupi mañashpa tiyacushpa,

³⁶ achcacuna chaita pasacujta uyashpa imataj nishpa tapujpi,

³⁷ –Nazaretmanta Jesusmari ricun– nircacuna.

³⁸ Chaimi paica: –¡Davidpaj Churi Jesús, ñucata llaquihuai!– nishpa caparijpi,

³⁹ ñaupashpa ricujcunaca upalla cai nircacuna. Ashtahuanpish paica: –¡Davidpaj Churi, ñucata llaquihuai!– nishpami, ashtahuan sinchita caparirca.

⁴⁰ Chaimi Jesusca shayarishcahuan, paipajman pushamuchun mandarca. Ña chayamujpica,

⁴¹ –¿imatataj rurachun ningui?– nijpi, chai runaca: –Amito, ricuj canatamari chasquisha nini– nirca.

⁴² Chaimi Jesusca: –Ña ricuilla, can crishcamantami alliyashcangui– nirca.

⁴³ Shina nincami ricuita chasquishpa, Taita Diosta sumajyachishpa Jesusta catirca. Tucui chaipi cajcunapish ricushpaca, Taita Diostami alabarcacuna.