Lucas 17 - Dios Rimashca Shimicunami

Juchapi urmachinaca jatun llaquimi

¹ Jesusca paipaj yachacujcunataca cashnami nirca: “Mana alli yuyaicunaca tiyanataca tiyangallatajmi. Chai yuyaicunahuan shujtajcunata pandachijcunaca ¡aij imachari tucunga!

² Ñucata catij cai uchillacunata pandachijtaca, molino rumita cungapi huatashpa, mama cuchapi shitanachari ashtahuan alli canman.

³ ¡Chaimanta cancunallataj alli yuyaringuichij! Cambaj huauqui canta llaquichijpica, ama chashna ruraichu nishpa rimangui. Llaquirishpa alli tucujpica, perdonanguilla.

⁴ Shuj punllapi canchis cutin canta llaquichishpa, chai punllallataj canchis cutin mana allitami rurashcani: “Perdonapai” nijpica, perdonanguilla” nircami.

Crina yuyaita ashtahuan cuhuai nishcami

⁵ Apostolcunaca Mandaj Jesustaca: –Ñucanchijman ashtahuan crina yuyaita cuhuai– nircacunami.

⁶ Chaimi Mandaj Jesusca: –Uchilla mostaza muyu shinallatapish crishcata charishpaca, cai sicómoro yurataca: “Sapindij llujshishpa, mama cuchapi tiyarigri” nijpica cazunmanllami.

Servijca ima shina canami

⁷ Cancunamanta ¿maijantaj shuj servijta charishpaca yapushpa, mana cashpaca michishpa tigramujpica: “Shamui, micuj tiyari” ninguichij?

⁸ Ashtahuanpish: “Churanata utca cambiarishpa micunata yanushpa ñuca imalla micuna cashcata ñucamanraj carai. Chai q'uipa canca micungui, ubyanguillami” ninguichijmi.

⁹ Chai servij cancuna ima nishcata rurajpipish mana pagui ninguichijmanchu yuyanimi.

¹⁰ Cancunapish, Taita Dios tucui mandashcacunata rurashpaca: “Ñucanchijca alli servijcunaca mana canchijchu, imata rurana cashcallatami rurarcanchij” ninami canguichij– nircami.

Leprahuan caj chunga runacunata alliyachishcami

¹¹ Jesusca Jerusalenman ricushpaca, Samariahuan, Galileahuan chaupitami rirca.

¹² Shuj uchilla llajtaman yaicugrijpica, leprahuan caj chunga runacunami Jesushuan tupanaman shamurcacuna. Paicunaca carullamanmi shayarircacuna.

¹³ Chai runacunaca: –¡Yachachij, Jesús ñucanchijta llaquihuayari!– nishpami caparircacuna.

¹⁴ Jesús paicunata ricushpaca: –Richij, curacunaman ricuchirigrichij– nijpi ñanta ricushpaca ña alliyarcacunallami.

¹⁵ Paicunapuramanta shujca alliyachishca cashcata ricushpami, Taita Diosta sumajmari cangui nishpa caparishpa Jesuspajman tigramurca.

¹⁶ Paica, Jesuspaj ñaupajpi cungurishpa, pambacama cumurishpami pagui nicurcalla. Chai runaca, Samariamantami carca.

¹⁷ Chaipimi Jesusca: –¿Maipitagari iscuncunaca? Chungatamari alliyachircani.

¹⁸ Taita Diosta sumajyachingapajca caishujcunaca mana tigramurcacunachu. Ashtahuanpish mana judío caj runarajmari tigramushca– nircami.

¹⁹ Chaimi Jesusca chai runataca: –Canca crishcamantami alliyashcangui. Jatari, rilla– nirca.

Taita Diosca ima punllamantataj mandanga nishcami

²⁰ Fariseocunaca Jesustaca: –Taita Diosca ima punllamantataj mandai callaringari– nishpa tapujpi, Jesusca: –Taita Dios mandai callarinaca mana ricunallachu canga.

²¹ “Caipimari mandacun, chaipimari mandacun” nishca mana uyaringachu. Ashtahuanpish Taita Diosca ñamari cancunapaj chaupipi mandacun– nircami.

²² Jesusca paipaj yachacujcunataca: –Runa Aichayujpaj punllata shuj punllallatapish ricunayachina punllacuna chayamungami. Ricusha nishpapish mana ricunguichijchu.

²³ Chai punllacunapica: “Caipimari, chaipimari” ningacunami. Chaimanca ama ringuichijchu, ama catinguichijchu.

²⁴ Runa Aichayuj shamui punllapica, jahua pachamanta relampa achij nishpa tucuita achijyachij shinami canga.

²⁵ Chaipajca paica achca llaquicunata puntaca apangarajmi. Cai punllapi causajcuna p'iñashcarajmi canga.

²⁶ Noé causai punllacuna ima shinami carca, chashnallatajmi Runa Aichayuj shamunapajpish canga.

²⁷ Chai punllacunapica huambuj huasiman Noé yaicungacamami, micucurcacuna, ubyacurcacuna, cazaracurcacuna, cazarachicurcacuna. Ña pai huambuj huasiman yaicujpica, yacu juillu shamushpami tucuita chingachirca.

²⁸ Lot causai punllacunapipish chashnallatajmi micucurcacuna, ubyacurcacuna, c'atucurcacuna, randicurcacuna, tarpucurcacuna, huasichicurcacuna.

²⁹ Ashtahuanpish Lot Sodoma pueblomanta llujshijpica, jahua pachamanta ninahuan, azufrehuan tamyashpami tucuicunata chingachirca.

³⁰ Runa Aichayuj shamuna punllapish chashnallatajmi canga.

³¹ Chai punllapica, huasi jahuapi cajpish, ima charishcacunata huasi ucumanta apanamanca ama yaicuchun. Chagrapi cajpish, huasiman ama tigrachun.

³² Lotpaj huarmi ima tucushcata yuyarichij.

³³ Pipish paipaj causaita llaquijca, chingaringami. Pipish paipaj causaita mana llaquijca quishpiringami.

³⁴ Cancunaman huillanimi: Chai tutapica, shuj camapi ishqui dormicushpapish, shujca apashcami canga, shujca saquishcami canga.

³⁵ Ishqui huarmicunapish cutacungami. Shujca apashcami canga, shujca saquishcami canga.

³⁶ Ishqui runacunami chagrapi canga. Shujca apashcami canga, shujca saquishcami canga– nircami.

³⁷ Chaimi paicunaca: –Mandaj Jesús ¿Maipitaj chashnaca tucunga?– nijpi, Jesusca: –Maipimi huañushca siricun, chaipimi ullahuangacunaca jundaringa– nircami.