Lucas 16 - Dios Rimashca Shimicunami

Mana allita ruraj mayordomomanta yuyachishpa parlashcami

¹ Jesusca paipaj yachacujcunamanpish cashnami nirca: “Shuj charij amomi tiyarca. Paica shuj mayordomotami charirca. Chai mayordomotaca amo imalla charishcacunata yanga tucuchicun nijtami amoca yachaj chayarca.

² Chaimi chai amoca mayordomota cayashpaca: “Cantaca imatatajshi ruracun nijtami uyani. Canman mingashcata ima shinalla apacushcata ñucaman ricuchi. Canca ña mana ashtahuan mayordomo cai tucunguichu” nirca.

³ Chaimi chai mayordomoca: “Cunanca ¿imatataj rurashari? Ñuca amoca, mayordomo canatamari quichugrin. Tsagmanatapish mana pudishachu, caridadta mañaj canatapish pinganayanmi.

⁴ Mayordomo canata quichujpica, paicunapaj huasicunapi ñucata chasquichun imata ruranata ñami yuyarini” nirircami.

⁵ Amoman debijcunata shuj shujlla cayashpami, punta shamujtaca: “¿Mashnatataj ñuca amomanca debingui?” nijpi,

⁶ chai debijca: “Patsaj barril aceitetami debini” nijpi paica: “Can mashnata debishcata quillcashcaca caipimi. Caipi tiyarishcahuan pichca cungallata churai” nirca.

⁷ Chai q'uipaca shujtaj debijtapish: “Canca, ¿mashnatataj debingui?” nijpi paica: “Patsaj saco trigotami debini” nijpi: “Can mashnata debishcata quillcashcaca caipimi. Pusaj chungallata churai” nirca.

⁸ Chai millai mayordomo yachaisapa tucushpa, chaita rurashcamantaca amoca allimi nircami. Taita Dios mana agllashcacunarajmi luzpaj huahuacunata yalli, paicunapuraca caishuj chaishuj allita chashna rurancuna.

⁹ Ñucaca cancunataca cashnami nini: Cai pachallata yuyashpa charijyashcacunata shujtajcunaman cushpa paicunahuan alli apanacuj tucuichij. Chashna rurashca cajpimi cancuna illaj tucujpica jahua pachapi huiñaita causanapaj chasquinga.

¹⁰ Ashallahuanpish allita rurajca, achcahuancarin ashtahuan allitami ruranga. Ashallahuanpish mana allita rurajca, achcahuancarin ashtahuan mana allitami ruranga.

¹¹ Cai pachallata yuyashpa charijyashcacunahuan mana allita rurajpica, tucuimanta yalli alli cajta ruranatacarin ¿pitaj mingangari?

¹² Shujtajpajtapish mana alli charijpica, cancunapajtaj cachun charinataca Taita Diosca mana cungachu.

¹³ Maijan servijpish ishqui amotaca, mana servi tucunchu. Shujtaca p'iñanmanmi, caishujtaca c'uyanmanmi. Shujtaca alli ninmanmi, caishujtaca yanganchinmanmi. Shinallatajmi Taita Diospajpish, charijyangapajpish ishquindijtaca mana rurai tucunguichij” nirca.

¹⁴ Chaita uyashpaca, paicunapajlla charinata yuyaj mitsa fariseocunaca Jesustaca asircacunami.

¹⁵ Chaimi Jesusca: “Cancunaca runacunapaj ñaupajllapimi, cancunallataj alli ricurishun nijcuna canguichij. Ashtahuanpish Taita Diosca, cancunapaj shungutaca yachanmi. Runacunalla alli nishcacunataca, Taita Diosca mana ricunachinchu” nircami.

Mandashcata Moisesman cushcaca Taita Dios mandai callaringacamallami

¹⁶ Mandashcacunata, profetacuna huillashcataca Bautizaj Juan ricurina punlla camami yachachircacuna. Chai q'uipaca Taita Dios ima shina mandagrin alli huillaitami huillarca. Chaimanca tucuicunami ima shinapish yaicushun nicuncuna.

¹⁷ Jahua pachapish, cai pachapish jahualla tucuringallamari. Ashtahuanpish mandashcacunapi nishcacunaca shuj puntollapish manataj saquirishpami pajtanga.

Manataj shitanacunachu nishpa Jesús yachachishcami

¹⁸ Maijanpish paipaj huarmita shitashpa shujtajhuan cazarajca, huainayanmi. Cusa shitashca huarmihuan cazarajpish, huainayanllatajmi.

Charij runamantapish huajcha Lazaromantapish

¹⁹ Shuj charij runami tiyarca. Paica alli lino, morado churanacunallatami churarij carca. Jatun micuitapish punllantami ruraj carca.

²⁰ Imata mana charij carachahuan apiyacuj Lázaro shuti runapishmi tiyarca. Paica charij runapaj huasi pungupimi,

²¹ chai charij runa micucushpa urmachishcallatapish japishpa micushapishchari nishpa tiyacurca. Ashtahuanpish allcucuna shamushpami carachata lambij carca.

²² Mañashpalla causaj runa huañujpica, angelcuna shamushpami Abrahampaj c'uchuman aparca. Charij runapish huañujpica pambarcacunami.

²³ Paica Hadespi llaquita apacushpa huichilla ricushpami Abrahamta, Abrahampaj c'uchupi caj Lazarotapish ricurca.

²⁴ Chaimi sinchita caparishpa: “Yaya Abraham, ñucata llaquihuayari. Lazarota cachapai yacupi paipaj dedota satishpa, ñuca c'allullatapish chiriyachichun, ñucaca caitaj ninapica jatun llaqui nanaitamari apacuni” nirca.

²⁵ Ashtahuanpish Abrahamca: “Huahua, yuyariyari, canca causaipirajmi cambaj charishcacunahuan sumajta cushicurcangui. Lazaroca causaipica llaquitami aparca. Paica cunanca caipimi cushicucun. Ashtahuanpish canca llaquitami apacungui.

²⁶ Ashtahuancarin ñucanchijpajmanta, cancunapajmanca shuj jatun huaicumari ch'icanchin. Chaimi caimanta chaiman risha nishpapish mana ri tucun. Chaimanta caiman shamusha nishpapish mana shamui tucunchu” nircami.

²⁷ Chaimi charij runaca: “Yayitu, caitami rogani: Lazarota ñuca yayapaj huasiman cachapai.

²⁸ Chaipica ñucaca, pichca huauquicunatamari charini. Paicunapish caitaj llaquimanca ama shamuchun, huillaj cachapai” nircami.

²⁹ Chaimi Abrahamca: “Moisés mandashcacunatapish, profetacuna quillcashcacunatapish charincunami. ¡Chaicunamanta huillashcata uyachuncuna!” nijpi,

³⁰ charij runaca: “Chaicunata ricushpallaca mana cringacunaca. Ashtahuanpish huañushcacunapaj chaupimanta maijan causarishpa paicunaman huillajpimari, mana allita ruracushcataca saquishpa cutiringacuna” nircami.

³¹ Shina nijpipish Abrahamca: “Moisés mandashcacunatapish, profetacuna quillcashcatapish mana uyashpaca, huañushcacunapaj chaupimanta maijan causarishpa huillajllapichu cringacunari” nircami nishpami parlarca.