Lucas 15 - Dios Rimashca Shimicunami

Chingarishca ovejamanta yuyachishpa parlashcami

¹ Jesús huillashcata uyangapajmi impuestota japijcuna, juchayujcunapish tucuicuna c'uchuyarcacuna.

² Chaita ricushpami fariseocunapish, mandashcacunata quillcajcunapish huashalla parlanacushpaca: –Caica juchayujcunahuan tandanacushpa paicunahuan micunllamari– ninacucujpimi,

³ Jesusca, cai yuyachij parlota cashna nishpa parlarca:

⁴ “Maijan cancunataj patsaj ovejacunata charishpa shuj chingarijpica, iscun chunga iscunta michicushcapi saquishpa, ¿chai chingarishcataraj japingacama mashcanguichijman?

⁵ Japishpaca rigra jahuashpami, cushicushpa shamunman.

⁶ Huasiman chayamushpaca paipaj alli rijsishcacunata, c'uchullapi causajcunatapish tandachishpami: “Ñamari chingarishca ovejataca japimuni, shamuichij ñucahuan cushicushunchij” ninmanmi.

⁷ Cancunaman huillanimi. Iscun chunga iscuncunaca ñucanchijca cashcata rurajcunami canchij nishpa imamantataj cutirishunri nicujpipish shuj runaca juchayuj cashcata yuyashpa cutirijpica jahua pachapica ashtahuan cushicuimi tiyan.

Chingarishca cullquimanta yuyachishpa parlashcami

⁸ Maijan huarmitaj chunga dracma cullquita charicushpa, shuj chingarijpica lamparata japichishpa huasi ucuta p'ichashpa, ¿japingacama mana mashcanmanri?

⁹ Chaita japishpaca paipaj alli rijsishcacunata, c'uchullapi causajcunatapish tandachishpami: “Ñamari chingarishca cullquitaca japini, shamuichij ñucahuan cushicushunchij” nishpa cushicunmanmi.

¹⁰ Cancunaman huillanimi: Chashnallatajmi shuj juchayuj runa Taita Diosman cutirijpica, Taita Diospaj angelcunapish cushicun” nircami.

Chingarishca churimanta yuyachishpa parlashcami

¹¹ Jesusca caitapishmi nirca: Shuj runami ishqui churita charirca.

¹² Chai ishquimanta q'uipa churimi yayataca: “Yaya, ñuca japina cashcata chaupishpa cuhuai” nijpimi, yayaca pai japina cashcata chaupishpa curca.

¹³ Chaimanta asha punllacuna q'uipaca, tucui pai japishcata c'atushpa cullquita tandachishpami q'uipa churica caru llajtaman rirca. Chaipimi pai apashcacunataca millaillapi causashpa tucuita chingachirca.

¹⁴ Millaillapi tucuita tucuchishca q'uipaca, chai llajtapica jatun yaricai callarijpimi, paipish tucui ima illajlla yaricaihuan carca.

¹⁵ Chaimi chai llajtapi causaj shuj runapajpi trabajota mashcanaman rijpi, chai runaca paipaj haciendapi c'uchicunata michigrichun cacharca.

¹⁶ Paica achca yaricaihuanmi carca. Chaimi cuchicuna micucun algarrobata micuiman yuyarca. Ashtahuanpish pi imata mana cararcachu.

¹⁷ Chaipimi paica cashna yuyarirca: “¡Ñuca yayapaj huasipi trabajajcunaca micunata atichicungacunami! ¡Ñucaca caipica, yaricaihuan huañucunimari!

¹⁸ Ñuca yayapaj huasiman tigrashalla. Chaiman chayashpaca: Yayitu, jahua pachapi caj Taita Diostapish, cantapish p'iñachishpami juchallishcani.

¹⁹ Chaimanta ña mana cambaj churi shinataj canichu. Cambaj shuj trabajaj shinallata chasquipai nigrisha” nishpami yuyarirca.

²⁰ Chaimi paipaj yayapajman tigrarca. Pai caruta shamucujpirajmi paipaj yaya ricushpaca achcata llaquirishpa, callpashpa, rishcahuan ugllarishpa mucharca.

²¹ Chaipimi paipaj churica: “Yayitu, jahua pachapi caj Taita Diostapish, cantapish p'iñachishpami juchallishcani. Cunanca ña mana cambaj churitaj shinachu cani” nijpi,

²² yayaca paipajta rurajcunataca cashnami nirca: “Tucuimanta yalli alli churanata llujshichimushpa churachichij. Maqui dedopica sortijasta, chaquipica pargateta churachichij.

²³ Jatun fiestata rurashpa micungapaj huirayashca bizita pushamushpa huañuchichij.

²⁴ Cai ñuca churica huañushcami carca, cunanca causarishcami. Chingarishcami carca, cunanca tigramushcami” nishpami, yallitaj cushicui callarircacuna.

²⁵ “Chaicamaca, punta churica chagrapimi carca. Chagramanta tigrashpa ña huasiman chayamucushpaca, tocacujta, danzacujcunatapish uyashpaca,

²⁶ paipajta rurajta cayashpami, imamanta bullacushcata tapurca.

²⁷ Chaimi paipajta rurajca: “Cambaj huauquimari tigramushca. Mana ungushca alli tigramushcamantami cambaj yayaca, huirayashca bizita huañuchichishpa fiestata ruracun” nirca.

²⁸ Chaimi achcata p'iñarishpa mana yaicusha nijpi, paipaj yaya llujshishpaca yaicupai nishpa rogarca.

²⁹ Ashtahuanpish paipaj yayataca cashnami nirca: “Manataj imata c'ariyashpamari, cai tucui huatacunata can ima nishcata rurani. Ñuca alli rijsishcacunahuan cushicuchun, shuj chivollatapish mana cushcanguichu.

³⁰ Ashtahuanpish cambaj cai churica, tucui can cushcacunataca huainayashpa causaj huarmicunahuanmi tucuchimushca. Chashna rurajpirajmari paihuan cushicungapajca huirayashca bizita huañuchichishcangui” nircami.

³¹ Chaimi paipaj yayaca: “Huahua, canca tucui punllacunami ñucallahuantaj cangui. Chaimanta tucui ñuca imalla charishcacunaca cambajmi.

³² Ashtahuanpish cambaj cai huauquica, huañushcami carca, cunanca causarishcami. Chingarishcami carca, cunanca tigramushcami. Chaimantaca jatun fiestata rurashpa cushicunatajmi canchij” nircami” nishpami parlarca.