Lucas 12 - Dios Rimashca Shimicunami

Mishqui shimi jayaj shunguca ama canguichij nishcami

¹ Jesús rimangacamaca, huaranga huaranga gentecuna tandanacushpami, paicunapura sarurinacucurcacuna. Chaimi Jesusca paipaj yachacujcunataca cashna nirca: –Fariseocunapaj levaduramanta cuidaringuichij. Pajta paicuna shina mishqui shimi jayaj shungu canguichijman.

² Ima mana pacalla cangachu, tucuimi ricuchishca canga. Ima pacalla cajpish mana yachashcaca mana cangachu.

³ Amsapi tucui imalla nishcacunaca, achijpimi uyaringa. Huasi ucupi rinrinllapi allijlla parlashcaca, huasi jahuamanta caparishpa huillashcami uyaringa.

Taita Diosllata manchanami

⁴ Ñucahuan apanacujcuna cancunamanca caitami huillani: Cuerpota huañuchijcunataca, ama manchaichijchu. Huañuchishca q'uipaca, imata mana ashtahuan rurai tucungacunachu.

⁵ Pita manchana cashcata yachachisha: Cancunaca causaita quichushpa ucu pachaman cachai tucuj Taita Diosta manchaichij. Paitatajca manchanami canguichij.

⁶ ¿Manachu pichca pajarocunata ishqui cullquipi c'atuncuna? Chashna cajpipish chai pajarocunataca Taita Diosca shujllatapish mana cungarinchu.

⁷ Cancunapaj uma ajchapish tucui yupashcami canguichij. Chaimanta amataj manchaichijchu. Cancunacarin achca pajarocunatapish yalli valijmi canguichij.

Jesusta catij cashcata mana pingarinami

⁸ Cancunaman huillanimi: Shujtajcunapaj ñaupajpi ñucata catij cashcata huillajpica, Runa Aichayuj ñucapish Taita Diospaj angelcunapaj ñaupajpica caicunaca ñucata catijcunami nishami.

⁹ Ashtahuanpish shujtajcunapaj ñaupajpi ñucata catij cashcata huillanata pinganachijpica, ñucapish Taita Diospaj angelcunapaj ñaupajpica, paimanta huillanataca pingarishami.

¹⁰ Runa Aichayujta maijanpish p'iñajtaca perdonangami. Ashtahuanpish jucha illaj Espirituta p'iñashpa rimajtaca, manataj perdonangachu.

¹¹ Sinagogacunaman, juezcunapajman, mandajcunapajmanpish cancunata apajpica, imatataj nishun, imatataj rimashun nishpa ama manchanguichij.

¹² Imalla rimana cashcataca, jucha illaj Espiritumi chai horallataj yachachinga– nircami.

Achcata charijyashpa Taita Diosta cungarishcami

¹³ Chaipi cajcunamanta shujmi Jesustaca: –Yachachij, ñuca huauquillata ñuca yayamanta herenciata ñucamanpish chaupichun nipai– nirca.

¹⁴ Chaimi Jesusca: –Ñucataca ¿pitaj cancunapaj juez cachun, mana cashpaca chaupishpa cuj cachun churarca? nishpaca,

¹⁵ cashnami nirca: Pajta ñataj mitsa tucushpa ashtahuan charisha ninguichijman. Achcata charishcacunaca mana causaita cunchu– nirca.

¹⁶ Shuj yuyachij parlotapishmi, cashna nishpa parlarca: “Shuj charij runapaj allpapimi achca grano p'ucushca carca.

¹⁷ Chaimi paipaj shungupica: “¿Imatataj rurashari? Ñuca granocunata huaquichinaca ña maipi mana tiyanca” nirishpami,

¹⁸ cashna nirirca: “Cunanca caita rurasha: Cai huaquichinacunata urmachishpa, ashtahuan jatuncunata shayachisha. Ñuca tucui granocunatapish, tucui charishcacunatapish chaipi huaquichingapaj.

¹⁹ Chashna huaquichishpaca paipaj yuyaitaca: Achcatami tauca huatacunapaj huaquichishcata charingui. Cunantajca samarishpa, micucuilla, ubyacuilla, cushicucuilla niricurcami”.

²⁰ Ashtahuanpish Taita Diosca chai runataca: “Yuyai illaj, cunan tutallatajmari cambaj causaita quichugrin. Tucui can huaquichishcacunaca ¿pipajshi canga?” nirca.

²¹ Cai causaillapi quiquinpajlla tucuita tandachishpa huaquichijca, Taita Diospaj ñaupajpica imata mana charinchu” nircami.

Taita Diosca paipaj huahuacunapaj ima illashcataca ñami yachan

²² Chai q'uipami Jesusca paipaj yachacujcunataca cashna nirca: Chashna cana cashcamanta: “Cancunapaj causaipica, imatataj micushun, cuerpopipish imatataj churashun nishpa ama chai yuyailla caichijchu.

²³ Causaimari micunatapish ashtahuan yalli alli, cuerpomari churanatapish ashtahuan yalli alli.

²⁴ Cuervocunata ricushpallapish yuyarichigari: Paicunaca mana tarpunchu, mana tandanchu, granocuna huaquichina huasitapish, chai ucupi granocunata huaquichinacunatapish mana charinchu. Ashtahuanpish Taita Diosca caranllami. ¿Manachu cancunaca pajarocunatapish yalli canguichij?

²⁵ Cancunamanta ¿maijantaj ashtahuan huiñana yuyailla cashpa, chaupi varahuan huiñai tucunguichij?

²⁶ Cai ashallacunatapish mana rurai tucushpaca ¿ima nishpataj ashtahuan shujtajcuna yuyailla causanguichij?

²⁷ Chagrapi tiyaj lirio sisacuna ima shina huiñajta alli ricuichigari: Mana trabajanchu, mana puchcanchu. Ashtahuanpish cashnami nini: Salomonca achcata charij cashpapish chai sisa shina sumajtaca manataj churarircachu.

²⁸ Taita Diosca q'uihuacunatapish sumajtami huiñachin. Cayaca rupanapajlla caj q'uihuamanpish chashna churachishpaca ¿manachu cancunamancarin chaitapish yalli churachinga? Chaita yachashpapish mana tucui shunguhuan cringuichijchu.

²⁹ Cancunaca imatataj micushun, imatataj ubyashun nishpa ama chai yuyailla causaichijchu.

³⁰ Taita Diosta mana rijsijcunallami tucui chaicuna yuyailla causan. Ashtahuanpish cancunapaj Yayaca, cancunapaj imalla illashcataca ñamari yachan.

³¹ Cancunaca Taita Dios mandashcaraj tucuichij. Chaipica Taita Diosca ima charina cashcataca cancunaman cungallami.

Jahua pachapi huaquichinami

³² Ñuca ovejacunalla, ashalla cashpapish ama manchaichijchu. Ashtahuanpish Taita Diosca cushicushpami cancunahuan mandasha nicun.

³³ Ima charishcacunata c'atushpa, huajchacunaman cuichij. Jahua pachapi mana ismuj muchilapi huaquichishpa huiñaipaj charijyaichij. Chaipica shuhuapish mana shuhuanchu, polillapish mana micunchu.

³⁴ Cancunapaj charishcacuna maipimi, cancunapaj shungupish chai yuyaillami canga.

Allichirishca shuyanami

³⁵ Cancunaca ña chumbillirishca, lamparatapish japichishca caichij.

³⁶ Bodamanta amo tigramushpa cayanca, pascangapaj chaparacuj servij shina caichij.

³⁷ Amo shamunapaj mana dormishpa chaparacuj servijcunaca cushichishcami canga. Chai amo shamushpaca chumbillirishpami mezapi tiyachishpa paicunaman caranga. Chashnatajmi canga.

³⁸ Chaupi tutata shamushpapish, pacaricuita shamushpapish, mana dormishpa chapacujta japishpaca, chai servijcunataca cushichingami.

³⁹ Ashtahuanpish caita yuyarichij: Ima hora shuhua shamunata huasiyuj yaya yachashpaca, chaparashpami paipaj huasiman yaicuchunca mana saquinman.

⁴⁰ Runa Aichayujpish, mana yuyashca horaspi shamuna cashcamanta cancunapish allichirishca chaparaichij” nircami.

Allita ruraj servijpish, mana allita ruraj servijpish

⁴¹ Chaimi Pedroca: –Mandaj Jesús ¿chai yuyachij parlotaca ñucanchijllamanchu, mana cashpaca tucuicunamanchu yuyachishpa parlangui?– nijpi,

⁴² Mandaj Jesusca: –¿Maijanshi ima rurana cashcata chaitataj ruraj servijca canga? Amo paipaj huasipi cajcunaman carana horaspitaj carachun saquijpi chashnataj ruraj servijmari alli runaca.

⁴³ Paipaj amo shamushpa chashna ruracujta japishpaca, chai servijtaca cushichishpa,

⁴⁴ paipaj tucui charishcacunatapish ricuj cachunpishmi churanga. Chashnatajmi canga.

⁴⁵ Ashtahuanpish chai servijca: “Ñuca amoca manaraj shamungachu” nishpa paipaj shungullapi yuyashpa, amopaj caishuj servijcunata macashpa, machajcunahuan micushpa, ubyashpa puri callaringachari.

⁴⁶ Chai servijpaj amoca, pai mana yuyashca punllapi, mana yuyashca horaspi tigramushpaca, chai servijtaca jatunta llaquichishca cachun mana allicunahuan churangachari.

⁴⁷ Amo imata rurachun nishcata yachaj servijca, yachashca jahua mana cazushcamanta mana rurashcamantaca achcata llaquichishcami canga.

⁴⁸ Maijan mana yachashcamanta ima mana allita rurashca cajpica, mana yalli llaquichishcachu canga. Piman achcata cushpaca, achcallatatajmi mañanga. Maijanman achcata mingashca cashpaca, achcallatatajmi tapunga.

Jesusta catijpica ch'icanyarinacui tiyangami nishcami

⁴⁹ Cai pachapica ninata japichingapajmi shamurcani. ¡Ñucaca, ña japichishca rupacuj cachunmi munani!

⁵⁰ Shuj bautismopimi bautizarinaraj cani. ¡Chai pajtangacamaca llaquihuan huañucunimari!

⁵¹ Ñucataca cai pachapi sumaj causai tiyachun shamushcataca ama yuyanguichij. Ashtahuanpish p'iñanacui tiyachunmi shamurcani. Chaica chashnatajmi.

⁵² Cunanmanta pacha shuj huasipi pichcapura causashpaca, chaupirinacungami. Quimsaca ishquitami p'iñanga, ishquica quimsatami p'iñanga.

⁵³ Yayaca churita, churica yayata, mamaca ushushita, ushushica mamata, suedraca nuerata, nueraca suedrata p'iñashpami chaupirinacunga– nircami.

Ima punllacunapi cashcataca ¿ima nishpataj mana yachanguichij? nishcami

⁵⁴ Chai gentecunataca Jesusca caitapishmi nirca: “Inti huashicunmanta p'uyu llujshijta ricushpaca: “Tamyagrinmi” ninguichijmi. Chaica chashnatajmi tucun.

⁵⁵ Uramanta huaira p'ucujpica: “Rupaimi canga” ninguichijmi. Chaipish chashnallatajmi tucun.

⁵⁶ ¡Mishqui shimi jayaj shungucuna! Punllacuna ima shina tucucujtaca yachanguichijmi. ¿Ima nishpataj ima punllacunapi cashcataca mana yachanguichij?

Canta p'iñajhuan utca alli tucungui nishcami

⁵⁷ ¿Ima shina rurashpa cashcata ruraj cana cashcataca cancunallatajca ima nishpataj mana yuyaringuichij?

⁵⁸ Maijanpish canta imamanta juchachishpa juezpajman apacujpica, ñanpiraj paihuan allichingui. Ashtahuanpish juezpajman chayachijpi juezca soldadoman cujpi carcelpimi churanga.

⁵⁹ Chaimantaca tucui cullquita pagashpallami llujshingui. Chashnatajmi canga” nircami.