Lucas 10 - Dios Rimashca Shimicunami

Canchis chungacunata huillanaman cachashcami

¹ Chaipaj q'uipami Mandaj Jesusca, shujtaj canchis chungacunatapish agllarca. Paicunataca pai maillaman rina cashca pueblocunamanmi ishqui ishquita ñaupachishpa cacharca.

² Cashna nishpami cacharca: “Granocunata tandanaca achcami, ashtahuanpish tandajcunaca ashallami. Tandajcunata cachachun, Chagrayuj amota mañaichij.

³ Richij, cancunataca atujcunapaj chaupiman ovejacunata cachaj shinami cachani.

⁴ Cullqui muchilata, cucayu muchilata, pargatetapish ama apashpa ringuichijchu. Ñanpi allillachu cangui nishpaca, ama uniyanguichijchu.

⁵ Maijan huasiman yaicushpaca: “Cai huasipica, sumaj causai tiyashca cachun” ninguichijraj.

⁶ Sumaj causai cancunahuan cachun nishcata chai huasipi chasquisha nij tiyajpica, paicunahuanmi saquiringa. Ashtahuanpish mana chasquijpica cancunallahuantajmi ringa.

⁷ Maijan huasipi chasquijpica, imatapish carashcata micushpa, ubyashpa chaillapitaj saquiringuichijlla. Taita Diospajta rurajca, pai causanapajca chaillamantatajmi japinga. Huasin huasinca ama puringuichijchu.

⁸ Maijan puebloman yaicujpi paicuna chasquishpa carajpica, carashcata micunguichijlla.

⁹ Chaipi ungushcacuna tiyajpi, alliyachishpaca: “Cancunata Taita Dios mandanamari ña c'uchuyamushca” nishpa huillanguichij.

¹⁰ Mai puebloman yaicujpi cancunata mana chasquijpica, ñanman llujshishpaca cashna ninguichij:

¹¹ “¡Cancunapaj pueblopi cajpi ñucanchij chaquipi ñutu allpa japirishcatapish, cancuna llaqui tucuna cashcata ricuchishpami caillapitaj chaspinchij! Ashtahuanpish caitaca yuyaripanguichij: Taita Dios mandanaca cancunapaj c'uchullapimi carca” ninguichij.

¹² Chai pueblopi causajcunata Taita Dios llaquichi punllapica, Sodoma llajtapi causajcunata llaquichishcata yallimi llaquichinga. Chashnatajmi canga.

Taita Diosman mana cutirij pueblocunata llaquichinami

¹³ Aij Corazinpi causajcunalla, aij Betsaidapi causajcunalla. ¡Imachari tucunguichij! Cancunapajpi rurashca shina milagrocunata Tiropi, Sidonpi rurashca cajpica, paicunarajchari Taita Diosman cutirishcata ricuchingapaj cañamazuta churarishpa, ushpapi tiyarinman carca.

¹⁴ Imalla rurashcata Taita Dios ricuchi punllapica, cancunataca Tiropi, Sidonpi causajcunata yallimi jatunta llaquichinga.

¹⁵ Capernaumpi causajcunalla, jahua pachamanmi apashca cashun yuyacunguichijmi. Ashtahuanpish ucu pachamanmari shitashca canguichij.

¹⁶ Cancunata uyajca ñucatami uyan, cancunata p'iñajca ñucatami p'iñan. Ñucata p'iñajca, ñucata cachajtapishmi p'iñan” nircami.

Huillanaman cachashca canchis chungacuna tigrashcami

¹⁷ Huillanaman cachashca canchis chungacuna cushicuihuan tigramushpaca: –¡Mandaj Jesús, cambaj shutipi rimajpica supaicunapish cazunllami!– nircacunami.

¹⁸ Chaimi Jesusca cashna nirca: –Satanastaca, jahua pachamanta rayo shina urmajtami ñucaca ricurcani.

¹⁹ Cancunamanca culebracunata, escorpioncunata saruna poderta, p'iñaj diablota cazuchina podertami cuni. Chaimanta cancunataca imata mana rurai tucungachu.

²⁰ Cancunaca supaicunata cazuchishpallaca ama cushicuichijchu. Ashtahuanpish cancunapaj shuticuna jahua pacha libropi quillcashca cashcamanta cushicuichij– nircami.

Jesús cushicushcami

²¹ Chai horasllatajmi Jesusca jucha illaj Espíritu cushichijpi achcata cushicushpa cashna nirca: –Jahua pachata, cai pachata Mandaj ñuca Yaya, ñucaca cantami alabani. Caicunataca alli yuyaiyuj, yachaisapacunamanca mana ricuchishcanguichu. Huahuacuna shina manaraj yachajcunamanmi ricuchishcangui. Ñuca Yayitu, canllatajmari chashna tucuchun munashcangui.

²² Ñuca Yayaca tucuitami ñucamanca curca. Churi pi cashcatapish pi mana rijsinchu, Yayallami rijsin. Yaya pi cashcatapish pi mana rijsinchu, Churillami rijsin. Pi cashpapish Churi rijsichisha nishcacunallami, Yayataca rijsin– nircami.

²³ Yachacujcunapajman tigrarishpaca, paicunallatami cashna nirca: –Cancuna ricucunta paicunapaj ñahuihuantaj ricujcunataca, cushichishcami canga.

²⁴ Profetacunapish, jatun mandajcunapish cancuna ricucunta ricunaihuan cashpapish, mana ricurcacunachu. Cancuna uyacunta uyanaihuan cashpapish, mana uyarcacunachu. Chaica chashnatajmi– nircami.

Samaria llajtamanta caj alli runamanta Jesús parlashcami

²⁵ Mandashcacuna ima nisha nishcata yachachij shuj runami, Jesús imapi pandarijpica juchachingapaj nishpa cashna tapurca: –Yachachij ¿imata rurashpataj huiñai causaita japisha?– nijpi,

²⁶ Jesusca: –Mandashcapica ¿imata quillcashcataj tiyacun, chaitaca ima cashcatataj rezashcanguiyari?– nirca.

²⁷ Chaimi chai yachachijca: –Mandaj cambaj Taita Diosta tucui shunguhuan, tucui almahuan, tucui fuerzahuan, tucui yuyaihuan c'uyangui. Can quiquinta shinallataj shujtajcunatapish c'uyangui ninmi– nirca.

²⁸ Chaimi Jesusca: –Allitami nishcangui. Chaicunata pajtachishpaca huiñai causaita charinguimi– nirca.

²⁹ Pai ashtahuan alli ricurisha nishpami chai runaca: –¿Pi shujtajtataj c'uyana cani?– nirca.

³⁰ Chaimi Jesusca, cashna nirca: –Shuj runami Jerusalenmanta Jericoman uriyacushpa, shuhuacunapaj maquipi urmarca. Paitaca imalla charishcacunata quichushpa, chugrichishpa, ch'ahuata huañuchishpami saquishpa rircacuna.

³¹ Chaipica shuj cura chai ñanta uriyacushpa chaita ricushpapish pasashpa rircallami.

³² Shinallataj shuj levitapish chai ñanllatataj uriyacushpa chai siricuj runata ricushpaca, pasashpa rircallami.

³³ Ashtahuanpish Samaria llajtamanta shuj runapish chai ñanllatataj shamucushpami, chaiman c'uchuyashpa ricushpaca, shungumanta llaquirishpa,

³⁴ c'uchuyashpaca aceitehuan, vinohuan chugricunata jambishpa linsohuan pilluchishpaca, paipaj burro jahuapi churashpa pozadaman pushashpa paitaca cuidarca.

³⁵ Cayandij punllata ña rigrishpaca, ishqui denariota pozadayujman cushpami: “Alli cuidapangui, cai cullqui mana pajtajpipish, tigramushpa cushallami” nishpa saquirca.

³⁶ Chai ñanta ricuj quimsacunamantaca canpica ¿maijantaj pai quiquinta llaquij shinallataj llaquishca yuyachin?– nirca.

³⁷ Mandashcacunata yachachijca: –Paita llaquishpa ayudaj runari– nijpi, Jesusca: –Canpish chashnallataj ruragri– nirca.

Martapaj Mariapaj huasiman Jesús rishcami

³⁸ Chai q'uipami Jesusca paipaj yachacujcunandij rishpa shuj uchilla llajtaman chayarca. Chaiman chayajpica, Marta shuti huarmimi paipaj huasiman pusharca.

³⁹ Martaca, María shuti shuj ñañatami charirca. Mariaca, Jesuspaj ñaupajpi tiyarishpami, pai yachachishcata uyacurca.

⁴⁰ Ashtahuanpish Martaca, huasi ucupi caita chaita rurana yuyailla cashpami, Jesuspajman rishpaca: –Mandaj Jesús caita chaita ñucalla rurachun ñuca ñaña saquijtaca ¿manachu ricungui? Ri ayudagri niyari– nirca.

⁴¹ Chaimi Jesusca cashna nirca: –Marta, Marta, canca caitapish chaitapish rurasha nishpamari musparicungui.

⁴² Ashtahuanpish shujllata ruranamari alli. Mariaca ashtahuan allitami agllashca, chaitaca pi mana quichungachu– nirca.