Lucas 1 - Dios Rimashca Shimicunami

Teofiloman quillcashcami (1.1-4)

¹ Ñucanchijpurapi imalla tucushcacunaca chashnatajmi. Chaimantami achcacuna callarishpa ima shina cashcatataj quillcashpa churashun nishcacuna.

² Callarimanta quiquin ñahuihuantaj ricushpa alli huillaita huillajcunami, ñucanchijmanca ima shina cashcatataj alli yachachirca.

³ Callarimanta pacha tucui imalla tucushcacunataca, callarishpami alli alli tapurcani. Chaicunaca ñucapajpish alli cajpimi, alli nishca can Teofiloman tucuita callarishpa quillcani.

⁴ Canta yachachishcacunaca, chashnataj cashcata alli yachachunmi quillcani.

Bautizaj Juan huacharinata huillashcami

⁵ Judea llajtata jatun mandaj Herodes mandacui punllacunapimi, Zacarías shuti cura causarca. Paica Abías curapaj huahua huahuacunapurami carca. Paipaj huarmica, Aaronpaj huahua huahuapuramanta Elisabetmi carca.

⁶ Paicunaca ishquindijtajmi Taita Diospaj ñaupajpica, cashcata rurajcuna carca. Jatun Dios tucui mandashcacunata, rurai nishcacunataca chaitataj rurashpa pi mana juchachipajcunami carca.

⁷ Elisabet mana huachaj cashcamantami paicunaca huahua illajcuna carca. Ishquindijtaj ña yuyajcunapishmi carca.

⁸ Zacarías curaca paicunapurapaj chai punllacunapi Diospajta rurana tucujpi chaipi Diospajta ruracujpimi,

⁹ curacuna ruraj cashca shinallataj sorteajpica, Jatun Diospajlla ucuman yaicushpa inciensota rupachinaca, Zacariaspajmi urmarca.

¹⁰ Chaipi caj tucuicunaca inciensota rupachingacamaca canllapimi Diosta mañacurcacuna.

¹¹ Inciensota rupachina altar alli ladomanca, Jatun Diospaj shuj angelmi shayacuj ricurirca.

¹² Angelta ricushpami, Zacariasca musparishpa jatunta mancharirca.

¹³ Angelca cashnami nirca: –Zacarías, ama manchaichu. Can mañashcataca Diosca uyashcami. Cambaj huarmi Elisabetca, shuj c'ari huahuatami huachanga. Paitaca Juan shutita shutichingui.

¹⁴ Pai huacharijpica yallitajmi cushicungui. Shujtajcunapish cushicungacunami.

¹⁵ Paica Dios alli nishcami canga. Vinotapish, sidratapish mana ubyangachu. Mamapaj huijsamanta pachami jucha illaj Espirituhuan junda canga.

¹⁶ Achca israelcunatami, paicunapaj Jatun Dios, Taita Diospajman tigrachinga.

¹⁷ Juanca Eliaspaj espirituhuan, Elías charishca poderllahuantajmi Quishpichijta ñaupashpa ringa. Yayacunapaj shungutaca, huahuacunata c'uyaj cachun tigrachingapaj, mana cazujcunatapish, cashcata rurajcuna shina cachun rurangapajmi chashna canga. Gentecunataca Mandaj Jesusta chasquinallata rurangapajmi chashna canga– nircami.

¹⁸ Chaimi Zacariasca angeltaca: –Ñucapish ñuca huarmipish ñamari yuyajcuna canchij. ¿Ima shinataj can huillashca pajtanataca yachashari?– nirca.

¹⁹ Shina nijpi angelca: –Ñucaca Diospajta rurangapaj paipaj ñaupajpi shayacuj Gabrielmi cani. Paimari canman cai alli huillaita huillachun cacharca.

²⁰ Ñuca huillashcata mana crishcamanta cunanca cambaj huahua huacharingacama upami saquiringui. Ñuca nishca pajtangacamami mana rimaj saquiringui– nircami.

²¹ Chaicamaca canllapi cajcunaca: –Diospajlla ch'icanchishca ucupica, ¿ima nishpataj Zacariasca uniyanchu imamí?– nishpami mancharinacushpa shuyacurcacuna.

²² Zacarías llujshimushpaca imata mana rimai tucushpa, ima tucushcataca maquillahuan ricuchishpami huillarca. Mana rimai tucushpa upallataj saquirijpimi: –Diospajlla ch'icanchishca ucupimari ¿imatatajshi ricushca yuyachin?– ninacurcacuna.

²³ Diospajta rurana punllacuna ña tucurijpica, Zacariasca paipaj huasimanmi tigrarca.

²⁴ Chai punllacuna q'uipami, paipaj huarmi Elisabetca chichushpa pichca quillata mana maiman llujshishpa huasillapi carca.

²⁵ Chaipimi: “Mana huachaj nishpa pipish ama rimachun, Jatun Diosmari ñucataca chashna rurashca” nishpa yuyacurca.

Jesús huacharinata huillashcami

²⁶ Elisabet chichushca ña sujta quilla cajpimi, Diosca Galileapi caj Nazaret shuti puebloman ángel Gabrielta cacharca.

²⁷ Chaipica c'arihuan manaraj chayarinacushca Mariamanmi huillanaman rirca. Mariaca Davidpaj huahua huahuamanta caj Josehuanmi cazaranapaj ari ninacushca carca.

²⁸ María maipi cashcaman ángel yaicushpaca: –¡Allillachu cangui! Jatun Dios canhuan cashcamanta tucui huarmicunata yalli alli nishcami cangui. Taita Dios cushca allicunata chasquijmari cangui– nircami.

²⁹ Mariaca angelta ricushpaca, achcata mancharishpami: –¿Ima nishpataj chashna ninchu, imamí?– nishpa yuyacurca.

³⁰ Chaimi angelca: –María, ama manchaichu. Taita Diosmari canmanca mana c'uyaipajta c'uyajta cungapaj agllashca.

³¹ Cunanca chichu tucushpa shuj c'ari huahuatami huachangui. Chai huahuataca, JESÚS shutita shutichingui.

³² Paica jatun nishcami canga. Jahua pachapi caj Jatun Diospaj Churi nishcami canga. Mandaj Diosca, Davidpaj jatun tiyarinatami paimanca cunga.

³³ Paica Jacobpaj huahua huahuacunatami huiñaita mandanga. Paipaj mandanaca, manataj tucuringachu– nircami.

³⁴ Chaimi Mariaca angeltaca: –¿Ima shinataj chashnaca tucungari? Manaraj cusayuj canica– nirca.

³⁵ Shina nijpi angelca: –Jucha illaj Espiritumi cambaj jahuaman shamunga. Tucuipaj jahuapi caj Diosmi paipaj poderhuan llandunga. Chaimantami Jucha Illaj huacharigrij Huahuaca, Diospaj Churi nishcapish canga.

³⁶ Riqui, cambaj familia Elisabetpish mana huachaj nishca cashpapish, yuyaj cashpapish ñamari sujta quillata c'ari huahuata chichu.

³⁷ Diosca imatapish rurai tucunllami– nirca.

³⁸ Chaimi Mariaca: –Shinashpaca can nishca shina rurachunlla. Ñucaca Jatun Diospajta rurajmi cani– nijpica, angelca paipaj ñaupajmanta rircallami.

Elisabetta María ricugrishcami

³⁹ Chai punllacunapimi, Judá urcucunapi caj shuj puebloman Mariaca utcashpa rirca.

⁴⁰ Chaiman chayashpa Zacariaspaj huasiman yaicushpa Mariaca Elisabettaca: –¿Allillachu cangui?– nijpica,

⁴¹ Elisabetpaj huijsapi caj huahuaca jaitarircallami. Chaipimi jucha illaj Espirituca Elisabetta japijpi,

⁴² sinchita cashna nirca: –Canca huarmicunapurapica alli nishcami cangui, cambaj huijsapi caj huahuapish alli nishcamari.

⁴³ Ñucataca ¿ima cajpitaj ñucata Mandajpaj mamaca ricuj shamurcanguiyari?

⁴⁴ Can allillachu cangui nijpica ñapish ñuca huahuaca cushicushpa huijsapi jaitarinllamari.

⁴⁵ Jatun Dios ima nishca pajtana cashcata crishcamantaca canca cushichishcami cangui– nircami.

⁴⁶ Chaimi Mariaca: “Ñuca almaca Jatun Diostami jatunyachin.

⁴⁷ Ñuca espirituhuanca ñucata Quishpichij Taita Diospimi yallitaj cushicuni.

⁴⁸ Diospajta ruraj imapish mana cajtami paica ñucataca agllashca. Cunanmanta pachami huahua huahuacuna ñucataca, Taita Dios cushichishcami cangui nicungallacuna.

⁴⁹ Tucuita rurai tucuj Diosmi ñucapica, pi mana rurai tucuipajta rurashca. ¡Paipaj shutica jucha illajmi!

⁵⁰ ¡Paita manchajcunataca huahua huahuacunatami llaquishpa c'uyacungalla!

⁵¹ Paipaj maquihuanmi, pi mana ruraipajta rurashca. Paicunapaj shungupi jatun tucushcacunataca caita chaitami cachashca.

⁵² Jatun tucushca mandajcunataca anchuchishpami, mana jatun tucushcacunataca jatun nishca canapi churarca.

⁵³ Yaricaihuan cajcunamanca, charinacunatami yallijta cushca. Charijcunataca chushajllatami cachashca.

⁵⁴ Diosca pai llaquij cashcata mana cungarishpami, paipajta ruraj israelcunamanca allicunata cushca.

⁵⁵ Chaitaca ñucanchij ñaupa yaya Abrahamman, paipaj huahua huahuacunamanpish huiñaipaj cusha nishca shinallatajmi rurashca” nircami.

⁵⁶ Mariaca Elisabethuan, quimsa quilla shinata tiyashpami, paipaj huasiman tigrarca.

Bautizaj Juan huacharishcami

⁵⁷ Elisabetca huachana punlla pajtajpica, c'ari huahuatami huacharca.

⁵⁸ Elisabetta Dios llaquishpa jatunta c'uyashcata uyashpaca, c'uchullapi causajcunapish, familiacunapish paita ricunaman rishpaca yallitajmi cushicurcacuna.

⁵⁹ Ña pusaj punlla tucujpica, huahuata circuncisionta rurachinamanmi apashpami, huahuataca yayapaj shuti Zacariasta shutichishun nircacuna.

⁶⁰ Ashtahuanpish paipaj mamaca: –¡Mana! Juan shutimi canga– nijpimi,

⁶¹ –¿Imamantari? Cambaj familiapica, chai shutica manamari tiyanchu– nircacuna.

⁶² Chashna nishpaca paipaj yayataca maquihuan ricuchishpallami, ima shutitataj shutichisha ningui nishpa tapujpi,

⁶³ Zacariasca uchilla tablata mañashpa: “Paipaj shutica Juanmi” nishpa quillcajpica, tucuicuna mancharircacuna.

⁶⁴ Chashna quillcancami paipaj c'allu cacharirishpa rimai callarishpaca, Diosta allimari cangui nirca.

⁶⁵ C'uchullapi causajcunaca yallitajmi mancharircacuna. Tucui chaicunataca, Judea urcucunapi causajcunapish tucuicunami huashan huashan yachaj chayarcacuna.

⁶⁶ Tucui chaita uyajcunami: –Chai huahua jatunyashpaca ¿ima shinashi canga?– nishpa, caishuj chaishuj tapunacushpa chaitaca paicunapaj shungupi huaquichircacuna. Jatun Diospaj tucuita rurai tucuj maquica chai huahuahuanmi carca.

Chai huahua ima shina canata Zacarías huillashcami

⁶⁷ Juanpaj yaya Zacariasca, jucha illaj Espíritu rimachijpimi, ima shina tucunata cashna nishpa huillarca:

⁶⁸ “Israelcunata Mandaj Taita Diosca allimari. Paipaj cajcunataca quishpichishpa llujshichingapajmi shamushca.

⁶⁹ Paipajta ruraj Davidpaj huasi ucupuramantami, tucuita rurai tucuj Quishpichijta cushca.

⁷⁰ Callarimanta pachami paipaj jucha illaj profetacunaman caitaca huillachishca:

⁷¹ Ñucanchijta p'iñashpa mana ricunachijcunapaj maquimanta Quishpichijmi.

⁷² Ñucanchij ñaupa yayacunata llaquishpa, paica pajtachishatajmi nishcata mana cungarishpami quishpichishca.

⁷³ Ñucanchij ñaupa yaya Abrahamman cushami nishcata Dios pajtachinaca caimi:

⁷⁴ Cancunata p'iñajcunamanta quishpichishami. Quishpichijpica imata mana manchashpami ñucapajta ruranguichij.

⁷⁵ Cancunapaj tucui causaipi ñuca munaillata rurashpa, ima jucha illajllami causanguichij nishcami.

⁷⁶ Shinallataj can huahuituca, jahua pachapi caj Diospaj profeta nishcami cangui. Canmari Quishpichij purina ñanta allichishpa ñaupashpa ringui.

⁷⁷ Can rishpaca paipaj caj gentecuna quishpirichun juchacunamanta ima shina quishpirina yuyaitapish cushpami yachachingui.

⁷⁸ Diosca ñucanchijtaca achcata c'uyashpami tutamantapi inti llujshishpa achijyachij shina jahua pachamanta Quishpichijta cachashca.

⁷⁹ Huañuna manchaihuan amsapi causacujcunapica achijyachichunmi luzta churanga. Ñucanchijtaca sumaj causaipimi punllanta pushanga” nircami.

⁸⁰ Chai huahua huiñashpaca Diosmanta alli yachajmi carca. Israelcunaman huillanapaj ricurina punllacamami, shitashca pambacunallapi causarca.