LEVÍTICO 9 - Dios Rimashca Shimicunami

Mandaj Diosman cuna cashcata Aarón cushcacunami

¹ Ña pusaj punllacuna tucujpimi, Moisesca Aarontapish, paipaj churicunatapish israelcunata cunaj yuyajcunatapish cayashpa,

² Aarontaca cashna nirca: “Juchamanta cungapajca vacacunamanta shuj malta huagrata, Mandaj Diosman tucuita cushpa tucui rupachingapajca shuj carnerota ishquindijtaj ima mana tucushcata apamushpa Mandaj Diospaj ñaupajpi cunguichij.

³ Chai q'uipaca israelcunata cashna ningui: Juchamanta cungapajca shuj chivota apamuichij. Mandaj Diosman tucuita cushpa tucui rupachingapajca, ima mana tucushca shuj huatayuj huagrata, shuj huatayuj carnerota apamuichij.

⁴ Shinallataj sumaj causaimanta Diosman cungapajca shuj huagrata, shuj carnerota apamushpa chaicunataca Mandaj Diospaj ñaupajpi huañuchichij. Aceitehuan chapushcata cunatapish apamuichij. Mandaj Dios cancunaman cunan ricurina cashcamantami chashna rurana canguichij ninmi” nircami.

⁵ Israelcunaca Moisés mandashca shinallatajmi, imallata apamuchun nishcataca Mandaj Dioshuan tupana carpa huasi ñaupajman aparcacuna. Tandanacushca tucui israelcuna shamushpaca, Mandaj Diospaj ñaupajpimi shayarircacuna.

⁶ Chaipimi Moisesca: “Tucui caicunaca Mandaj Dios mandashcami. Chaitataj ruraichij. Chaipimi Mandaj Diospaj sumaj achij nicuj cashcaca cancunapaj ñaupajpi ricuringa” nircami.

⁷ Chai q'uipami Moisesca, Aarontaca: “Altarman c'uchuyashpa cambaj juchamanta Diosman cuna cashcata tucuita cushpa tucui rupachina cashcatapish cushpa Dioshuan alli tucui. Tucuicunamanta cuna cashcatapish tucuicunapajta Mandaj Diosman cushpa paicunatapish Mandaj Dios mandashca shinallataj paihuan alli tucuchi”,

⁸ nijpimi altarman Aarón c'uchuyashpaca, paipaj juchamanta cushca malta huagrataca chaipi huañuchirca.

⁹ Chai huagrapaj yahuartaca, Aaronpaj churicuna apamujpimi, paica yahuarpi paipaj maqui dedota shutujyachishpa altar jahuapi tiyaj gachucuna puntapi llihuirca. Puchushca yahuartaca altar chaquipimi tallirca.

¹⁰ Chai q'uipaca chai animalpaj huiracunatami altar jahuapi rupachirca. Mandaj Dios Moisesta mandashca shinallatajmi, juchamanta cushca animalpajtaca riñoncunatapish yana shungupi tiyaj huiratapish cushpa rupachirca.

¹¹ Aichataca carandijmi carpa huasicunamanta caruman apashpa rupachirca.

¹² Diosman tucuita cushpa tucui rupachina animaltapish huañuchijpica, chai yahuartaca, paipaj churicuna japishpa paiman cujpimi chai yahuarhuanca altar muyundijta tsiraparca.

¹³ Chai q'uipami Mandaj Diosman tucuita cushpa tucui rupachina aichataca mirga mirgata p'itishcata, umandij altar jahuapi cushpa tucui rupachirca.

¹⁴ Chunllullicunatapish, changa aichatapish ña tucui maillashca q'uipaca Mandaj Diosman tucuita cushpa altar jahuapi tucui rupachicun jahuapi churashpami rupachirca.

¹⁵ Israelcunamanta cunatapishmi curca: Israelcunapaj juchamanta cuna cashca chivota japishpa huañuchishpami paicunapaj juchamanta curca. Ñaupaman ima shinalla cushca shinallatajmi curca.

¹⁶ Mandaj Diosman tucuita cushpa tucui rupachinatapish ima shinalla cuna cashca shinallatajmi rurarca.

¹⁷ Tutamantaman Mandaj Diosman tucuita cushpa tucui rupachishca jahuami, Mandaj Diosman cuna chaquishca granota cushpa chaitaca lutsajta japishpa altar jahuapi rupachirca.

¹⁸ Sumaj causaimanta israelcuna cungapaj apamushca huagratapish, carnerotapishmi huañuchirca. Chai animalcunapaj yahuartaca paipaj churicuna japishpa cujpimi, Aaronca dedota yahuarpi satishpa altar muyundij quinripi tsiraparca.

¹⁹ Chai huagrapaj huiratapish chai carneropaj chupatapish, chunllullicunapi tiyaj huiratapish, riñoncunatapish, yana shungupi tiyaj huiratapish apashpami,

²⁰ chai huiracunataca pecho aichacuna jahuapi churarcacuna. Chai huiracunataca altar jahuapimi rupachirca.

²¹ Pecho aichacunataca alli lado changa aichandijmi Mandaj Diosman huichi ricuchishpa cuyuchishpa Mandaj Diosman cushca cachun Mandaj Diospaj ñaupajpi huichi ricuchishpa cuyuchirca. Chaitaca Mandaj Dios Moisesta mandashca shinallatajmi rurarca.

²² Israelcunapaj juchamanta cunatapish, tucuita cushpa tucui rupachinatapish, sumaj causaimanta Mandaj Diosman cushca q'uipaca Aaronca paipaj maquita huichi chutashpami, israelcunataca tucuipi alli cashca canguichij nirca. Chai q'uipaca chaimanta uriyarcallami.

²³ Chai q'uipaca Moiseshuan, Aaronhuanca Mandaj Dioshuan tupana carpa huasimanmi yaicurcacuna. Chaimanta llujshishpaca, israelcunataca alli cashca canguichijman nircami. Chaipimi Mandaj Diosca israelcunamanca, sumaj achij nicuj ricurirca.

²⁴ Chaipimi Mandaj Diospaj ñaupajmanta nina llujshishpaca, Mandaj Diosman tucuita cushpa tucui rupachinapaj cushca huiratapish altar jahuapi cajtaca tucuita rupachirca. Chaita tucui israelcuna ricushpaca, Mandaj Diostaca allimari cangui nishpami pambacama cumurircacuna.