LEVÍTICO 8 - Dios Rimashca Shimicunami

Aarontapish paipaj churicunatapish Diospajlla cachun ch'icanchishcami

¹ Mandaj Diosca Moisestaca:

² “Aarontapish, paipaj churicunatapish pushashpa, curacuna churarina churanacunatapish, ch'icanchina aceitetapish, juchamanta cuna malta huagratapish, ishqui carnerotapish, levadura illajllata rurashca tanda canastatapish apashpa,

³ tucui israelcunata ñucahuan tupana carpa huasi pungupi tandachigri” nircami.

⁴ Chashna mandajpimi, Moisesca Mandaj Dios mandashca shinallataj rurashpa, israelcunataca Mandaj Dioshuan tupana carpa huasi ñaupajpi tandachirca.

⁵ Chaipimi Moisesca israelcunataca: “Caicunaca ima shinalla ruranata Mandaj Dios mandashcami” nirca.

⁶ Chaipimi Moisesca Aarontapish, paipaj churicunatapish carpa huasi ñaupajman c'uchuyachishpa armachirca.

⁷ Aarontaca tunicata churachishpami, chumbillinahuan chumbillichirca. Chai q'uipaca jahuamanta ucu chaquicama churanatami churachirca. Chai jahuapica efodta churachishpami, efodpi caj huatucunahuan sinchita chutashpa chumbillichirca.

⁸ Chai q'uipaca, pectoralta churachishpami, chai ucupica Urim nishca Tumim nishca rumicunata churarca.

⁹ Mitratapish paipaj umapi churachishpaca, mitra ñaupaj ladopica, uchilla curi latatami churarca. Chaica Mandaj Diospajlla ch'icanchishca cashcata ricuchij diademami. Chaitaca, Mandaj Dios Moisesta mandashca shinallatajmi rurarca.

¹⁰ Chai q'uipaca Moisesca, Mandaj Diospajlla cachun ch'icanchina aceiteta japishpami carpa huasitapish, chaipi imalla tiyajcunatapish tucuita chai aceitehuan churashpa Diospajlla cachun ch'icanchirca.

¹¹ Chai aceitehuanca altar jahuatapish canchis cutinmi tsiraparca. Chashnami altartapish chaipi tucui imallata ruranacunandij Diospajlla cachun ch'icanchirca. Tanquetapish, tanqueta tiyachina basatapish chashnallatajmi Diospajlla cachun ch'icanchirca.

¹² Diospajlla cachun ch'icanchina aceiteta Aaronpaj umapi churashpami, paitaca, Mandaj Diospajlla cachun ch'icanchirca.

¹³ Chai q'uipaca Moisesca Aaronpaj churicunatapish c'uchuyachishpami, tunicacunata churachishpa chumbillinahuan chumbillichishpa umapi churachishca tiaratapish sinchita chutashpa huatarca. Mandaj Dios Moisesta mandashca shinallatajmi rurarca.

¹⁴ Chai q'uipaca juchamanta cuna malta huagratami apamuchirca. Aaronpish, paipaj churicunapish juchamanta cuna chai malta huagrapaj uma jahuapi paicunapaj maquicunata churajpimi,

¹⁵ Moisesca chai huagrataca huañuchirca. Chai yahuartaca paipaj dedohuan japishpami, chai altarta Mandaj Diospajlla ch'icanyachingapaj altar gachucunatapish, altar muyundij quinritapish llihuirca. Puchushca yahuartaca altar chaquipimi tallirca. Chashnami Mandaj Dioshuan alli tucungapaj rupachina altar cachun, Diospajlla cachun ch'icanchirca.

¹⁶ Moisesca chunllullicunapi tiyaj tucui huiratapish, yana shungupi tiyaj huiratapish, ishqui riñoncunatapish, chaipi tiyaj huiratapish japishpami altar jahuapi tucuita rupachirca.

¹⁷ Ashtahuanpish chai huagrapaj caratapish, aichatapish, majadatapish carpa huasicunamanta canllamanmi Mandaj Dios Moisesta mandashca shinallataj tucuita rupachirca.

¹⁸ Chai q'uipaca, tucuita cushpa tucui rupachina carnerotami apamuchirca. Aaronpish, paipaj churicunapish chai carneropaj uma jahuapimi paicunapaj maquicunata churarcacuna.

¹⁹ Moisesca chai carnerota huañuchishpami, chai yahuartaca altar muyundijta tsiraparca.

²⁰ Moisesca chai carnero aichata mirga mirgata p'itishpami, umandij, mirga mirgata rurashca aichacunandij, huirandij rupachirca.

²¹ Chunllullicunatapish, changa aichacunatapish tucui maillashca q'uipami, Moisesca chai carnerotaca tucuita altar jahuapi rupachirca. Mandaj Dios ima shinalla Moisesta mandashca shina Mandaj Diosman tucuita cushpa rupachishcaca, paipaj mishquijllata ashnacuj cachunmi chashna rurarca.

²² Chai q'uipaca Mandaj Diospajlla ch'icanchishcamanta cuna cashca carnerotami apamuchirca. Aaronpish, paipaj churicunapish chai carneropaj uma jahuapi paicunapaj maquicunata churajpimi,

²³ Moisesca huañuchirca. Chai yahuarta japishpami Aaronpaj alli lado rinrinta llihuirca. Alli lado maqui mama dedopipish, alli lado chaqui mama dedopipishmi churarca.

²⁴ Chai q'uipaca Aaronpaj churicunata c'uchuyachishpami, Moisesca chai yahuarhuanca paicunapaj alli lado rinrinta llihuirca. Alli lado maqui mama dedocunapipish, alli lado chaqui mama dedocunapipishmi chai yahuarllahuantaj churarca. Altar jahua muyundijtapish yahuarhuanmi tsiraparca.

²⁵ Chai q'uipaca, carneropaj huirataca, chupandij, chunllulli jahuapi tiyaj huirandij, yana shungupi tiyaj huirandij, ishqui riñoncunata chaipi tiyaj huirandij, alli lado changa aichandijmi llujshichirca.

²⁶ Mandaj Diospaj ñaupajpi tiyacuj levadura illajlla tanda canastamanta, levadura illajlla shuj tortata, aceitehuan rurashca tortata, tortillatapishmi llujshichirca. Chaicunataca huirahuan, alli lado changa aichahuan tandachishpami churarca.

²⁷ Tucui chaicunataca Aaronpaj, paipaj churicunapaj maquipimi churarca. Mandaj Diosman cushca cachunmi Mandaj Diospaj ñaupajman huichi ricuchishpa cuyuchichirca.

²⁸ Chaicunata paicunapaj maquimanta Moisesllataj cutin japishpami, altar jahuapi tucuita cushpa rupachicushca jahuapi churashpa rupachirca. Chashna rurajpimi Mandaj Diospajlla cachun ch'icanyachicushpa Mandaj Diosman cushpa rupachishcacunaca paipajca mishquijllata ashnacuj carca.

²⁹ Moisesca, Mandaj Diosman cushcataca pai japina cashca pecho aichata japishpami, Mandaj Diospaj ñaupajpi huichi ricuchishpa cuyuchirca. Mandaj Dios mandashca shinallataj paiman cushpa huichi ricuchishpa cuyuchishca cachunmi chashna rurarca.

³⁰ Chai q'uipaca Moisesca, Diospajta ruraj cachun ch'icanyachina aceitetapish, altar jahuapi tiyacuj yahuartapish japishpami Aaronpaj jahuapipish, paipaj churanacuna jahuatapish, paipaj churicunapaj jahuapipish, paicunapaj churanacuna jahuatapish tsiraparca. Chashnami Aarontapish, paipaj churanacunatapish, paipaj churicunatapish, paicunapaj churanacunatapish Diospajlla cachun ch'icanyachirca.

³¹ Moisesca Aaronta, paipaj churicunatapish: “Mandaj Dioshuan tupana carpa huasi pungupi aichata t'imbuchishpa, chaipi Mandaj Diospajlla cachun ch'icanyachicuipi cushca canasta tandahuan chai aichataca micunguichij. Ñuca ima shinalla mandashca shinallatajmi: Aaronpish, paipaj churicunapish micungacuna nircami.

³² Puchushcacunataca aichatapish, tandatapish tucui rupachinguichij.

³³ Diospajlla cachun ch'icanyachicui canchis punllacuna pajtangacamaca, Mandaj Dioshuan tupana carpa huasi pungumantaca ama llujshinguichijchu. Cancunaca canchis punllacunapimi, Mandaj Diospajlla ch'icanyachishca tucunguichij.

³⁴ Cancunapaj juchamanta cuna cashcata cuchunca, cunan ima shina rurashca shinallataj rurachunmi Mandaj Diosca mandarca.

³⁵ Mandaj Dioshuan tupana carpa huasi pungupica canchis punllacunatami tutapish punllapish cana canguichij. Cancuna mana huañungapajca Mandaj Dios mandashcataca tucuitami Mandaj Diospaj ñaupajpi pajtachina canguichij. Mandaj Diosca chashnami ñucataca mandarca” nircami.

³⁶ Aaronpish, paipaj churicunapish Mandaj Dios Moisesta mandashca shinallatajmi tucuita rurarcacuna.