LEVÍTICO 7 - Dios Rimashca Shimicunami

Pajtachina cashcata yachashca jahua mana pajtachishpa juchallishcamanta Diosman cuna cashcata yachachishcami

¹ Shinallataj, rurangui nishcata mana rurashpa juchallishcamanta Diosman rupachishpa cushcacunaca Diospajlla ch'icanchishcami. Chaimanta mandashcacunaca caimi:

² Rurangui nishcata mana rurashpa juchallishcamanta cushca animaltaca, Diosman tucuita cushpa tucui rupachingapaj cushca animalta huañuchinallapitaj huañuchichun. Chai yahuartaca altar muyundij quinripi tsirapachun.

³ Chai animaltaca chupatapish, chunllullicunapi tiyaj huiratapish,

⁴ ishqui riñoncunatapish, chaipi tiyaj huiratapish, lomopi tiyaj huiratapish, riñoncunandij yana shungupi tiyaj huirandij llujshichishpa chai animalpaj huirataca tucuita cuchun.

⁵ Chai q'uipaca chai cushcacunaca Mandaj Diosman cushpa rupachina cashcamanta altar jahuapi cura rupachichun. Chaica juchamanta cuna cashcata Diosman cushcami.

⁶ Aichataca curacunalla micuchun. Diospajlla ch'icanchishca cashcamantaca, Diospajlla ch'icanchishcapi micuchun.

⁷ Ama rurangui nishcata rurashpa juchallishcamanta cushcapish, rurangui nishcata mana rurashpa juchallishcamanta cushcapish chai shinallatajmi. Chaimanta ima shina cunapajca ishquindijpajtaj chai shinallataj mandashcami. Chai aichaca juchamanta Diosman cushpa rupachij cura japinapajmi canga.

⁸ Maijanmanta Diosman tucuita cushpa tucui rupachij curaca, tucuita cushpa tucui rupachishca animalpaj carahuan saquirichun.

⁹ Chashnallataj sartenpi mana cashpaca cazuelapi allichishpa hornopi cusashpa Mandaj Diosman cushcacunaca chaita cuj cura japinapaj cachun.

¹⁰ Cutata aceitehuan chapushca cashpapish, mana chapushca cashpapish Diosman cushcacunaca Aaronpaj churicunapajmi tucuicunapaj chai shinallataj canga.

Mandaj Dioshuan alli cangapaj cushca animalta ima shinalla cuchun mandashcami

¹¹ Alli causaimanta Mandaj Diosman ima shina cunata mandashcaca caimi:

¹² Sumaj causaimanta pagui nishpa Mandaj Diosman cushca jahuapish caicunahuan cuchun. Aceitehuan chapushca levadura illajlla tortahuan, levadura illajlla tortillata aceitehuan jahuata llihuishcahuan, tucuimanta yalli alli cutata aceitehuan chapushpa tortata rurashcahuan Diosman cuchun.

¹³ Sumaj causaimanta animalta cucushcandij Mandaj Diosta pagui nishpa cucushpaca, levadurahuan p'unguichishca tandahuan cuchun.

¹⁴ Chai tucui cushcacunamantaca asha ashata japishpa, Mandaj Diospaj ch'icanchichun. Chaitaca sumaj causaimanta cushca animalpaj yahuarta tsirapaj cura japichun.

¹⁵ Sumaj causaimanta Diosta pagui nishpa cushca animalpaj aichataca, chai cui punllallataj tucui micuchun. Chai aichataca cayandijpajca imata ama saquichichun.

¹⁶ Mandaj Diosman cuna tucushcamanta cushca animalpaj aicha cajpi, mana cashpaca cuna munaita charishcamanta cushca animalpaj aicha cajpica, Mandaj Diosman cui punllatajpish micuchun. Puchujpipish cayandij punllapish micuchunlla.

¹⁷ Mandaj Diosman cushca animalpaj aicha quimsa punllacama, mana tucurijpica rupachichunlla.

¹⁸ Sumaj causaimanta Mandaj Diosman rupachishpa cushca aichata quimsa punllapipish micujpica, cujtaca mana chasquishcachu canga. Pai cushcapish mana cushca shinallatajmi canga. Ashtahuanpish millananami canga. Maijanpish chaita micujca jucha aparishcami canga.

¹⁹ Chai aicha ima mapapi tuparishca cajpica ama micuchun. Ashtahuanpish ninapi rupachichun. Chai aichataca, imapi mana mapayashcacunalla micuchun.

²⁰ Sumaj causaimanta Diosman cushca aichaca, Mandaj Diospajlla ch'icanchishcami. Maijanpish mapayashca cashpapish chai aichata micujpica, israelcunapuramanta anchuchishcami canga.

²¹ “Sumaj causaimanta Mandaj Diosman rupachishpa cushca aichaca Mandaj Diospajlla ch'icanchishcami. Mapayashca runapi cashpa, mapa animalpi cashpa, imapish millanana mapapi tuparishca cashpa, chai aichata micujpish israelcunapuramanta anchuchishcatajmi canga” nircami.

Huiratapish, yahuartapish mana micunachu nishpa yachachishcami

²² Mandaj Diosca Moisestaca:

²³ “Israelcunataca cashna mandai: Huiracunataca huagrapajta cashpa, malta c'ari ovejapajta cashpa, chivapajta cashpapish mana micunachu canguichij.

²⁴ Huañushca animalpaj huiratapish, sacha animal huañuchishca animalpaj huiratapish ama micunguichijchu. Chai huirahuanca ima shujtajtami rurai tucunguichij. Ashtahuanpish mana micui tucunguichijchu.

²⁵ Mandaj Diosman cushpa rupachinapaj cushca animalcunapaj huirata maijanpish micujtaca, israelcunapuramanta anchuchishcami canga.

²⁶ Cancunaca maipi causacushpapish, yahuartaca mana micunachu canguichij. Alasyuj animalcunapajta cashpa, shujtaj animalcunapajta cashpapish mana micunachu canguichij.

²⁷ Maijanpish ima animalcunapaj yahuarta cashpapish micujtaca, israelcunapuramanta anchuchishcatajmi canga” nircami.

Mandaj Diosman cushca aichataca curacuna japichun nishcami

²⁸ Mandaj Diosca Moisesta mandashpaca cashnapishmi nirca:

²⁹ “Israelcunataca cashna mandai: Sumaj causaimanta Mandaj Diosman rupachingapaj cucujca, sumaj causaimanta cunataca Diospaj ñaupajman apachun.

³⁰ Diospaj ñaupajpi cushpa rupachingapaj cucushpaca paipaj quiquin maquihuan Mandaj Diosman cuchun. Chai huirataca pecho aichandij cuchun. Chai pecho aichataca Mandaj Diospaj ñaupajpi huichi cuyuchishpa cushca cachun apamuchun.

³¹ Chai huirataca altar jahuapi cura rupachichun. Pecho aichaca Aaronpaj, paipaj churicunapajmi canga.

³² Sumaj causaimanta Mandaj Diosman cushca animalcunapaj alli lado changa aichataca, cura japina cashcamanta paiman cuchun.

³³ Sumaj causaimanta cushca yahuartapish, huiratapish Aaronpaj churicunamanta maijanmi Mandaj Diosman cun chaipajmi, pai japina cashcamanta chai animalpaj alli lado changa aichaca paipajmi canga.

³⁴ Sumaj causaimanta israelcuna cushca animalta huañuchishca pecho aichata huichi ricuchishpa cushcatapish, cuna cashcamanta cushca changa aichatapish cushcacunataca ñucami japircani. Chaicunataca ñuca japishpami Aarón curaman paipaj churicunaman curcani. Cai mandashcacunaca israelcunapaj huahua huahuacuna chaitataj pajtachicuchunlla mandashcani”.

³⁵ Mandaj Diosman cushpa rupachingapaj cushcacunaca Aaronpajpish, paipaj churicunapajpish japina cashcata japinami canga. Chaitaca Mandaj Diosllataj paipajta ruraj curacuna cachun ch'icanchishpa churai punllamantami paicuna japijcuna carca.

³⁶ Mandaj Diosca curamanca cura cachun aceitehuan churashpa ch'icanyachi punllamantapachami Mandaj Diosman cushcacunamanta paicunaman cuchun israelcunataca mandarca. Caitaca paicunapaj tucui huahua huahuacunapish, chaitataj pajtachishpa cucuchunllami mandarca.

³⁷ Mandaj Diosman tucuita cushpa tucui rupachicushpa ima shinalla ruranata, juchamanta Diosman cucushpa ima shinalla ruranata rurangui nishcata mana rurashpa juchallishcamanta Mandaj Diosman cucushpa ima shinalla ruranata, Diospajlla cachun ch'icanyachicushpa ima shinalla ruranata, sumaj causaimanta cucushpa ima shinalla rurana cashcata mandashcacunaca chaicunami.

³⁸ Chaicunataca Sinaí urcupimi Mandaj Diosca Moisesman curca. Sinaí shitashca pambapi paicuna cajpi Mandaj Diosman israelcuna ima shinalla paicunapaj cuna cashcata cuchun mandashcami.