LEVÍTICO 6 - Dios Rimashca Shimicunami

¹ Mandaj Diosca Moisestaca cashnami nirca:

² Maijanpish shujtajta umashpa Mandaj Diosta p'iñachingachari. Maijanpish paipaj maquipi mingashcata paipaj maquipi saquishcata shujtajpajta mana tigrachingachari, mana cashpaca shujtajpajta imata shuhuangachari, imata quichungachari,

³ mana cashpaca ima jichushcata tarishpapish manataj japishcanichu nishpa mana japishca shina tucushpa mana tigrachingachari, chashnacunapi llullanata yachashpaca chashna juchallishpa causanapimi amañarin.

⁴ Chashna juchallishpa llaquichishcamantaca shuhuashcatapish, pipajta quichushcatapish, mingashcata mana tigrachishcatapish, jichushcata tarishcatapish,

⁵ tucui chaicunata manataj japishcanichu nishpa llullashcacunataca pipajllata chashna rurashcataca pipaj cashca cajpica chaillamantaj tucuita tigrachichun. Chaicunataca juchamanta cuna cashcata cucui punllapi cada chungamanta pichcahuan mirachishpa tigrachichun.

⁶ Chai juchamanta Mandaj Diosman cungapajca, canlla ovejamanta ima mana tucushca carnerota apamuchun. Chai juchamanta cunapaj pajta cashcata, ricushpa apamushpa curaman cuchun.

⁷ Chai runapaj juchamantaca Mandaj Diosman cura cuchun. Chashna rurajpimi tucui imallapi juchallishpa amañaricushca juchacunataca perdonanga.

Diosman cushcacunata ima shinalla rupachinami

⁸ Mandaj Diosca Moisestaca cashna nishpami mandarca:

⁹ “Aarontapish, paipaj churicunatapish cashna mandai: Diosman tucuita cushpa tucui rupachinacuna ima shinalla ruranata yachachinaca cashnami: Diosman tucuita cushpa tucui rupachinataca, altar jahuapi nina rupacunpi chishimantaca pacaringacama tucui tuta rupashpa tucui rupachun churachun.

¹⁰ Chai Aarón curaca linomanta rurashca churanata, lino calzoncillota churarishpa, Diosman cushca animalpaj aicha tucui rupashca ushpataca, chai altar jahuamanta pallashpa altar c'uchullapitaj churachun.

¹¹ Chai q'uipaca chai churanata llujshichishpa shujtaj churanata churarishpa chai ushpataca carpa huasicunamanta canllaman apashpa, mana mapa allpapi shitachun.

¹² Chai altar jahuapi rupacun ninaca amataj huañushca cachun. Ashtahuanpish cada tutamanta cura yantata churachun. Chaipica Diosman tucuita cushpa tucui rupachina animaltaca chai jahuapi churachun. Mandaj Dioshuan alli cangapaj cushca huiratapish chaillapitaj rupachichun.

¹³ Chai altarpica ninaca rupacungallami manataj huañushca canachu can.

Mandaj Diosman tucuita cushpa tucui rupachinata mandashcami

¹⁴ Mandaj Diosman cunata mandashcaca caimi: Chaitaca Aaronpaj churicunami, Mandaj Diospaj ñaupajpi caj altar ñaupajpi Mandaj Diosman cungacuna.

¹⁵ Chai curacunamanta shujmi Diosman cushca cutamanta, aceitendij inciensondij paipaj maqui jundata Diosman cushca jahuamanta japishpa altar jahuapi rupachinga. Chashna rurajpimi chai cujta yuyarinapaj Mandaj Diospajca mishquijllata ashnacuj canga.

¹⁶ Saquirishca cutataca Aaronmi, paipaj churicunandij micunga. Chaitaca Mandaj Dioshuan tupana carpa huasi ñaupajpi, Diospajlla ch'icanchishcapi levadura illajllata micuchuncuna.

¹⁷ Chaitaca levadurahuanca ama cusachun. Ñucaman rupachishpa cushcacunataca curacuna japina cashcamanta curacunaman cushcami. Chaicunaca ñucapajlla ch'icanchishcami. Juchamanta cushpa rupachishcapish pandarishpalla juchallishcamanta cushpa rupachishcapish chai shinallatajmi.

¹⁸ Aaronpish paipaj churicunapish chai saquirishcacunatami micungacuna. Mandaj Diosman cushpa rupachishcacunamanta curacuna japina cashcaca huahua huahuapaj huiñaipaj chashna cachun mandashcami. Imapish Mandaj Diosman cushcapi tuparijca Diospajllami tucunga” nircami.

Curacunata mandaj curata mandashcami

¹⁹ Mandaj Diosca Moisestaca cashnami nirca:

²⁰ “Aarontapish, paipaj churicunatapish cura cachun aceitehuan churai punllapi Diosman cunaca caimi: Shuj efamanta chungapi chaupishca shuj mirga cutamanta Mandaj Diosman cuchun. Chaitaca chaupitaca tutamantaman, chaupitaca chishi cuchun. Punllanta chashna cucuchunlla.

²¹ Chaitaca aceitehuan sartenpi allichishpa cusashcata Mandaj Diospajman apashpa, mirga mirgata Mandaj Diospaj mishquijllata ashnacuj cachun paiman cuchun.

²² Aaronpaj randi maijan paipaj churi cunata cura cachun aceitehuan churacushpapish, Diosman cuna cashcataca chashnallatataj cuchun. Chaica huiñaipaj chashna ruracuchunlla Mandaj Dios mandashca cashcamanta tucui chaicunaca rupachishca cachun.

²³ Curamanta Mandaj Diosman cushcataca tucuita rupachina cashcamanta ama micuchun” nircami.

Juchamanta cushca animalcunata curacuna rupachichun mandashcami

²⁴ Mandaj Diosca Moisesta mandashpaca:

²⁵ “Aarontapish, paipaj churicunatapish, juchamanta animalta cushpa ima shinalla rupachichun mandashcaca cashnami: Juchamanta cuna cashca animaltaca, Mandaj Diosman cushpa rupachina animaltaca, tucui cushpa rupachina animalta huañuchinallapitaj Mandaj Diospaj ñaupajpi huañuchichun. Chaica Diospajlla ch'icanchishcami.

²⁶ Juchamanta Diosman cushpa rupachicuj cura chai aichataca micuchun. Chaitaca, Dioshuan tupana carpa huasi canlla Diospajlla ch'icanchishcapi micuchun.

²⁷ Diosman cushca animalpaj aichapi tucui imapish tuparijca, Diospajllami tucunga. Chai animalpaj yahuarhuan yahuaryashca churanataca, Diospajlla ch'icanchishcapi tajshachun.

²⁸ Diosman cushcata allpa mangapi yanushca cashpaca, chai mangataca p'aquichun. Bronce mangapi yanushca cashpaca, chai mangataca sobashpa alli maillachun.

²⁹ Diosman cushcacunaca, Diospajlla ch'icanchishcami. Chaitaca curacunalla micuchuncuna”.

³⁰ Juchamanta cushca animalpaj aichataca Diospaj huasipi caj Diospajlla ch'icanchishca ucuman yahuarta apashca cajpica, ima animal aicha cajpipish chai aichataca ama micuchun. Chaitaca tucuita ninapi rupachichunlla.