LEVÍTICO 4 - Dios Rimashca Shimicunami

Juchamanta Mandaj Diosman cunami

¹ Mandaj Diosca Moisestaca cashna nishpami mandarca:

² Israelcunataca: Mandaj Dios mandashca maijancunata mana rurana cashcata mana yuyarishcamanta rurashpaca, cashna rurachun mandai:

³ Curacunata punta pushaj cachun aceitehuan churashca cura juchallijpica, tucui israelcuna juchallishca shinallatajmi canga. Chai juchallishcamanta cuna cashcataca ima mana tucushca malta huagrata Mandaj Diosman cuchun.

⁴ Chai malta huagrataca, Mandaj Dioshuan tupana carpa huasi punguman Mandaj Diospaj ñaupajman apamushpa, chai malta huagrapaj uma jahuapi paipaj maquita churashpa, Mandaj Diospaj ñaupajpi huañuchichun.

⁵ Chai q'uipaca curacunata punta pushaj cachun aceitehuan churashca curallataj, chai malta huagrapaj asha yahuarta japishpa Mandaj Dioshuan tupana carpa huasiman apachun.

⁶ Chai curallataj paipaj dedota chai yahuarpi shutujyachishpa, Mandaj Diospajlla ch'icanchishca ucuta jarcachishca linso ñaupajpi canchis cutin tsirapachun.

⁷ Chai asha yahuartaca mishquijllata ashnacuj inciensota rupachina altar Mandaj Dioshuan tupana carpa huasi ucupi, Mandaj Diospaj ñaupajpi tiyacuj altar gachucuna puntapi cura churachun. Chai malta huagrapaj puchushca yahuartaca, Mandaj Dioshuan tupana carpa huasi pungupi Diosman tucuita cushpa tucui rupachina altar chaquipi tallichun.

⁸ Chai q'uipaca juchamanta cushca malta huagrapaj chunllullicunapi tiyaj huirata, huijsapi tiyaj huirata,

⁹ ishqui riñoncunata, chaipi tiyaj huirata, lomopi tiyaj huirata, yana shungupi tiyaj huirataca ishqui riñoncunandij tucuita llujshichichun.

¹⁰ Mandaj Dioshuan alli cangapaj Mandaj Diosman cushca huagrapaj huirata llujshichij shinallataj llujshichishpami, Diosman tucuita cushpa tucui rupachina altar jahuapi curallataj rupachinga.

¹¹ Chai malta huagrapaj carataca, tucui aichandij, umandij, changacunandij, chunllullicunandij majadandij,

¹² chai tucuita tandachishpa carpa huasicunamanta canllaman llujshichishpa, ushpata shitana mana mapayashcaman llujshichichun. Chaitaca yanta jahuapi ninapi rupachichun. Chaicunataca ushpata shitanapi chashna rupachichun.

¹³ Tucui tandanacushca israelcuna Mandaj Dios mandashca maijan mandashcacunata mana yuyarishcamanta, tucuicuna mana cazushca cashpapish paicuna mana cazucushcataca pi mana yuyarishca cashpapish juchayujmi canga.

¹⁴ Paicuna mana cazucushcata q'uipata yachaj chayashpaca, Diosmanca chai juchamanta cuna cashcataca tucuicuna tandanacushpa shuj malta huagrata cuchuncuna. Chai malta huagrataca Mandaj Dioshuan tupana carpa huasi ñaupajman apashpa,

¹⁵ israelcunata cunaj yuyajcuna Mandaj Diospaj ñaupajpi chai malta huagrapaj uma jahuapi paicunapaj maquicunata churashpa, chai malta huagrataca Mandaj Diospaj ñaupajllapitaj huañuchichun.

¹⁶ Chai huagrapaj asha yahuartaca, curacunata punta pushaj cachun aceitehuan churashca cura, Mandaj Dioshuan tupana carpa huasiman apachun.

¹⁷ Chai curaca paipaj dedota chai yahuarpi shutujyachishpa, Mandaj Diospajlla ch'icanchishca ucuta jarcachishca linso ñaupajpi canchis cutin tsirapachun.

¹⁸ Chai yahuartaca Mandaj Dioshuan tupana carpa huasi ucupi Mandaj Diospaj ñaupajpi tiyacuj altar gachucuna puntapi churachun. Puchushca tucui yahuartaca Mandaj Dioshuan tupana carpa huasi pungupi caj Diosman tucuita cushpa tucui rupachina altar chaquipi tallichun.

¹⁹ Chai animalpaj huirataca tucui llujshichishpa altar jahuapi rupachichun.

²⁰ Chai malta huagrataca curapaj juchamanta cushca huagrata cushpa rupachij shinallataj rupachichun. Paicunapaj juchamantaca cura chashna cushpa rupachichun. Chashna rurashpami, Mandaj Dios perdonashca cangacuna.

²¹ Chai q'uipaca carpa huasimanta malta huagrata canllaman llujshichishpami, ñaupaman rupachishca malta huagrata shinallataj rupachinga. Chaica tucui israelcunapaj juchacunamanta cuna cashcata cushcami canga.

²² Israelcunata maijan pushajpish paita Mandaj Dios tucui mandashcacunamanta shuj mandashcata mana yuyarishcamanta mana cazushpapish juchayujmi tucun.

²³ Mana yuyarishcamanta chashna mana cazushpa juchallishcata q'uipata yachaj chayashpaca, chai juchamanta Diosman cungapajca ima mana tucushca shuj c'ari chivota apamuchun.

²⁴ Chai chivopaj uma jahuapi paipaj maquita churachun. Chai q'uipaca chai chivotaca Diosman tucuita cushpa tucui rupachingapaj huañuchinallapitaj Mandaj Diospaj ñaupajpi huañuchichun. Chaica juchamanta cuna cashcata cushcami canga.

²⁵ Chai juchamanta cushca chai animalpaj asha yahuartaca, cura paipaj dedohuan asha yahuarta japishpa, Diosman tucuita cushpa tucui rupachina altar jahuapi caj gachucuna puntapi churachun. Puchushca yahuartaca, Diosman tucuita cushpa tucui rupachina altar chaquipi tallichun.

²⁶ Chai q'uipaca, Mandaj Dioshuan alli cangapaj Mandaj Diosman cushca animalpaj huirata shinallataj, chai huiratapish tucuita altar jahuapi rupachichun. Chai mandajpaj juchamantaca cura chashna Mandaj Diosman cuchun. Chaimi paica Mandaj Dios perdonashca canga.

²⁷ Maijanpish israelcunapuramanta Mandaj Dios tucui mandashcacunamanta maijan shuj mandashcata mana yuyarishcamanta mana cazushpa rurashpaca juchayujmi tucun.

²⁸ Chashna juchallishcata q'uipata yachaj chayashpaca, chai juchamanta Diosman cungapajca ima mana tucushca shuj chivata apamuchun.

²⁹ Juchamanta cushca animalpaj uma jahuapi paipaj maquita churachun. Chai q'uipaca, Diosman tucuita cushpa tucui rupachinallapitaj huañuchichun.

³⁰ Chai q'uipaca cura paipaj dedohuan asha yahuarta japishpa, Diosman tucuita cushpa tucui rupachina altar jahuapi caj gachucuna puntapi churachun. Puchushca yahuartaca altar chaquipi tallichun.

³¹ Chai q'uipaca Mandaj Dioshuan alli cangapaj Mandaj Diosman cushca animalpaj huirata tucuita llujshichij shinallataj chai animalpaj huiratapish tucuita llujshichichun. Chaitaca, Mandaj Diospaj sumaj mishquijllata ashnacuj cachun altar jahuapi cura rupachichun. Chai juchallijmantaca cura Mandaj Diosman chashna cushpa rupachichun. Chaipimi paica Mandaj Dios perdonashca canga.

³² Chai juchamanta cungapaj shuj malta ovejata apamushpaca ima mana tucushca huarmi ovejata apamuchun.

³³ Juchamanta cucujca chai ovejapaj uma jahuapi paipaj maquita churashpa, Diosman tucuita cushpa tucui rupachinallapitaj, juchamanta cushca animaltaca huañuchichun.

³⁴ Juchamanta cushca animalpaj yahuartaca curallataj paipaj maqui dedohuan ashata japishpa, Diosman tucuita cushpa tucui rupachina altarpi caj gachucuna puntapi churachun. Puchushca yahuartaca, altar chaquipi tallichun.

³⁵ Chai q'uipaca Mandaj Dioshuan alli cangapaj Mandaj Diosman cushca animalpaj huirata llujshichishca shinallataj, chai animalpaj huiratapish tucuita llujshichichun. Chaitaca Mandaj Diosman cushpa rupachicushca jahuapi churashpa cura rupachichun. Juchallijmantaca cura Mandaj Diosman cushpa chashna rupachichun. Chaimi Mandaj Diosca paitaca perdonanga.