LEVÍTICO 26 - Dios Rimashca Shimicunami

Cazushpaca allicunata japinami

¹ “Cancunaca dios nishcacunatapish, tacashpa rurashca dios nishcacunatapish ama ruranguichijchu. Rumi diostapish mana shayachinachu canguichij. Cancunapaj llajtapica pintashca rumicunata ñataj churanguichijman. Chaicunapaj ñaupajpi ñataj cunguringuichijman. Ñucami Mandaj Dios cancunapaj Taita Dios cani.

² Ñucapaj samana punllacunataca huaquichinguichij. Ñucapajlla ch'icanchishca ucutaca ama yanganchinguichij. Ñucami Mandaj Dios cani.

³ Ñuca ima shina causachun nishca shina causaichij. Ñuca mandashcacunata huaquichishpa chaitataj rurana yuyailla tucushpa ruraichij.

⁴ Chashna cajpica tamyana punllapitajmi tamyachisha. Chaipica cancunapaj allpacunapish, cancunapaj allpapi caj yuracunapish alli granocunatami p'ucunga.

⁵ Cancunapaj trigota manaraj tucui trillajpimi, uvata tandanapish ña chayamunga. Uvata manaraj tucui tandajpimi, tarpuipish chayamunga. Cancunaca quiquin micunatami mana nijta micunguichij. Quiquin llajtapimi imata mana manchashpa causanguichij.

⁶ Llajtapica sumaj causaitami cusha. Cancunaca pi mana manchachishcami dorminguichij. Cancunapaj llajtamantaca millai animalcunatapish anchuchishami. Cancunapaj llajtapica macanacuipish mana tiyangachu.

⁷ Cancunata p'iñajcunatapish catirashpami llaquichinguichij. Paicunaca cancunapaj espadacunapimi urmangacuna.

⁸ Cancunata p'iñajcuna patsaj cajpipish, pichcalla cashpapish callpachinguichijllami. Cancunata p'iñajcuna 10.000 cajpipish, cancunaca patsajlla cashpapish callpachinguichijllami. Cancunata p'iñajcunaca cancunapaj espadacunapimi huañungacuna.

⁹ Ñucaca cancunataca tigralla ricushami. Achca huahuacunayujtami rurasha. Cancunataca achcata mirachishpami, cancunahuan ari ninacushcataca pajtachisha.

¹⁰ Ñaupa huatacunaman huaquichishca trigocunatami micunguichij. Mushuj trigota huaquichingapajpish, ñaupa huataman huaquichishca trigotami llujshichishpa shitanguichij.

¹¹ Ñuca causanataca cancunapaj chaupipimi churasha. Ñucapish cancunata mana millanachishachu.

¹² Ñucaca cancunapaj chaupipimi purisha. Cancunapaj Taita Diosmi casha. Cancunapish ñucapajcunami canguichij.

¹³ Ñucaca Mandaj Diosmi cani, cancunapaj Diosmi cani. Egiptopi ama huatashca shina ruraj cachunmi llujshichimurcani. Yugopi huatashca angucunataca ñucami p'itircani. C'ari c'ari purichunmi churarcani.

Mana cazushpaca llaquita apanami

¹⁴ Ñucata mana uyashpa, tucui cai mandashcacunatapish mana pajtachijpi,

¹⁵ ñuca ima shina causachun nishcacunatapish yanganchishpa, cancunapaj yuyaipica ñuca chaitataj pajtachichun nishcatapish mana ricunachishpa, ñucahuan ari ninacushca mandashcacunata chaita rurana yuyailla tucushpa ruranatapish mana rurajpica,

¹⁶ ñucapish cancunahuanca cashnami rurasha: Cancunapajmanca jatun manchaita, purij ungüita, fiebre ungüita cachajpimi cancunapaj ñahuicunata tucuchinga aicha irquiyana ungüitapishmi cachasha. Tarpunatapish yangallami tarpunguichij. Cancunata p'iñajcunallami micungacuna.

¹⁷ Ñucapish cancunataca p'iña ñahuihuanmi ricusha. Cancunata p'iñajcunapaj ñaupajpimi chugrichishcacuna canguichij. Cancunata p'iñajcunami cancunataca mandanga. Pi mana caticujpipish miticushpami callpanguichij.

¹⁸ Chashna llaquichijpipish mana uyajpica, ñucaca canchis cutinhuanmi cancunapaj juchamantaca llaquichisha.

¹⁹ Rumi shungu jatun tucushcataca chingachishami. Cancunapaj cielotapish fierro shinatami rurasha. Cancunapaj allpatapish bronce shinatami rurasha.

²⁰ Cancunapaj fuerzapish yangallami tucuringa. Cancunapaj allpapica ima mana p'ucungachu. Yuracunapish imata mana p'ucungachu.

²¹ Chashna llaquichijpipish ashtahuan yallitaj mana allita rurashpa catijpica, ima shina ashtahuan millaita rurashca shinallatajmi shujtaj canchis cutinhuan llaquichisha.

²² Millai sacha animalcunatapishmi cancunapaj huahuacunata apachun cancunapajman cachasha. Cancunapaj animalcunatapish chingachingami. Chaimanta cancunapaj ñancunapi purijcunaca ashacunallami tucunga.

²³ Chaipipish, mana alli tucushpa ashtahuan ñucata p'iñashpa catijpica,

²⁴ ñucapish cancunahuan ashtahuan p'iñarishpami, cancunapaj juchamantaca shujtaj canchis cutihuan llaquichisha.

²⁵ Ñucahuan ari ninacushcata p'aquishcamanta cancunata llaquichij cachunca, cancunata p'iñajcunatami macanacushpa huañuchichun pushamusha. Paicuna mishajpi cancunapaj pueblocunapi miticujpipish, cancunaman llaquichij ungüita cushpami cancunata p'iñajcunapaj maquipi churasha.

²⁶ Cancunapaj micunacunata ñuca chingachijpica, chunga huarmicunami shuj hornollapi tandata cusashpa, chaita chaupinacushpa micushpapish yaricai pararijtaca mana micunguichijchu.

²⁷ Chaipipish, ashtahuan yallitaj mana allita rurashpa catijpica,

²⁸ ñucapish cancunahuan yallitaj p'iñarishpami, cancunapaj juchamantaca canchis cutinhuan llaquichisha.

²⁹ Chaipica cancunapaj churicunapaj, cancunapaj ushushicunapaj aichallatatajmi micunguichij.

³⁰ Lomacunapi tiyaj cancunapaj altarcunatapish chingachishami. Cancunapaj imamanpish rijchaj dioscunatapish urmachishami. Huañushca cancunapaj aichacunatapish, chai urmachishca manapish causaiyuj dioscunapaj jahuapimi paltajni shitasha. Chashnami ñucaca cancunataca millanachisha.

³¹ Cancunapaj pueblocunatapish shitashcatami saquisha. Diospaj huasitapish shitashcatami saquisha. Cancuna ñucaman cushca mishquijllata ashnacujtapish ña mana ashnachishachu.

³² Llajtatapish chushajllatami saquisha. Chaita ricushpami cancunata p'iñajcuna chai llajtapi causangapaj shamushcacunapish mancharinacungacuna.

³³ Cancunataca shujtaj llajtacunamanmi urajta janajta cachasha. Espadata llujshichishpa catirashpa llaquichishpami chashna rurasha. Cancunapaj llajtapish chushajllami saquiringa. Cancunapaj pueblocunapish shitashca pambacunami saquiringa.

³⁴ Cancuna cancunata p'iñajcunapaj llajtapi causacui punllacunapimi, allpaca samarina cashca punllacunapi mana samarishcamantaca cushicushpa samaringa. Allpacunata samachina punllacunapi mana samachishcamantaca, chashna shitashcata saquishca punllacunapimi allpaca cushicushpa samaringa.

³⁵ Cancunallataj cancunapaj llajtapi causacushpa, samachina huatacunapi mana samachishcamantaca, shitashca saquirishca tucui huatacunapimi chaipaj randi samaringa.

³⁶ Mana huañushpa saquirijcunataca manchana yuyaita paicunapaj shungupi ñuca churajpimi, paicunaca paicunata p'iñajcunapaj llajtapica yura p'anga cuyurijllapipish, espadahuan huañuchingapaj caticujpi shina jatunta mancharishpa miticugringacuna. Pipish manapish caticujpi miticugricushpami urmangacuna.

³⁷ Pipish mana caticujpimi, jatun macanacuimanta miticushpa ricuj shina rishpa caishuj chaishuj huajtarinacunguichij. Chashna cashcamantaca cancunata p'iñajcunahuancarin manataj macanacui tucunguichijchu.

³⁸ Cancunaca shujtaj llajtacunapimi chingaringuichij. Cancunata p'iñajcunapaj llajtami cancunataca tucuchinga.

³⁹ Cancunapura mana huañushpa saquirijcunaca, p'iñajcunapaj llajtapimi ñaupa yayacunapaj juchamantapish, paicunapaj juchallamantatajpish huañungacuna.

⁴⁰ Chaipimi paicuna millaita rurashcatapish, paicunapaj ñaupa yayacuna millaita rurashcatapish, ima shinalla rurashpa ñucata c'ariyashcatapish, imamanta ñucata mana cazushcatapish ñucaman huillangacuna.

⁴¹ Chashna huillajpipish ñucaca paicunahuan p'iñarishcamantaca paicunata p'iñajcunapaj llajtamanmi cachasha. Chaipimi paicunaca shungupi mana circuncisionta rurashcacuna shinallatajmari millaita ruracushcanchij ningacuna.

⁴² Chaipimi ñucaca Jacobhuan ari ninacushcata, Isaac-huan ari ninacushcata, Abrahamhuan ñuca ari ninacushcata yuyarisha. Llajtatapish yuyarishami.

⁴³ Paicuna shitashpa rijpimi, allpaca shitashca saquirishpa samarina punllacunapi mana samarishcamantaca chai punllacunapi samarishpa cushicunga. Ñuca mandashcacunata yanganchishcamanta, ñuca chaitataj pajtachichun nishcacunata p'iñashpa millaita rurashcamantami llaquita apana cashcapi paicunaca llaquita apacungacuna.

⁴⁴ Paicunata p'iñajcunapaj llajtapi paicuna chashna llaquita apacujpica shuj cutintajca mana shitashachu. Tucui chingaringacamatajca mana millanachicushallachu. Paicunahuan ari ninacushcataca manataj yanganchishachu. Ñucaca Mandaj paicunapaj Taita Diosmi cani.

⁴⁵ Paicunapaj ñaupa yayacunata paicunapaj Dios cangapaj shujtaj llajtacuna ricucujpi, Egiptomanta llujshichimucushpa paicunahuan ari ninacushcatami yuyarisha. Ñucami Mandaj Dios cani” nircami.

⁴⁶ Tucui cai mandashcacuna, ima shina causachun nishcacunaca Diospish imallata rurana cashcata, israelcunapish imallata pajtachina cashcata Mandaj Dios callarichishpa Moisesman Sinaí urcupi cushcami.