LEVÍTICO 24 - Dios Rimashca Shimicunami

Diospaj carpa huasi ucuta achijllata ruranami

¹ Mandaj Diosca Moisesta mandashpaca:

² “Israelcunataca lamparapi tutai punlla ninata japichingapaj, olivocunata tacashpa llujshichishca ashtahuan alli aceiteta apamuchun mandai.

³ Mandaj Dioshuan tupana carpa huasi ucupi cancunahuan shujlla yuyai tucushcata ricuchij quillcata huaquichishca arcata jarcachishca linso ñaupajpi chai lamparacuna nina japichishca tutai punlla Mandaj Diospaj ñaupajpi rupacujta allichij cachunca Aaronta mandai. Chaicunataca cancunapaj huahua huahuacuna chaitataj pajtachicuchunlla mandashcami.

⁴ Chai lamparacunataca ashtahuan alli curimanta rurashca candelero jahuapi Mandaj Diospaj ñaupajpi tutai punlla rupacuchunlla chashna churachun.

Diospaj ñaupajpi churana tandacunami

⁵ Alli cutata japishpa, chunga ishqui tortacunata rurashpa cusanguichij. Chai tortacunataca cada tortata shuj efata chungapi chaupishca ishqui parteta rurashca cachun.

⁶ Chaicunataca ashtahuan alli curimanta rurashca meza jahuapi Mandaj Diospaj ñaupajpi ishqui filata rurashpa churachun. Cada filapi sujta sujtata churachun.

⁷ Chai fila tandacunapica cada filapi ashtahuan alli inciensota churachun. Chai tandacunaca Mandaj Diosman cushpa tucui rupachishca shinallataj paipajca mishquijllata ashnacujmi canga.

⁸ Chai tandacunataca, Mandaj Diospaj ñaupajpi cada samana punllapi, sumajta paltashpa churachun. Tucui israelpaj huahua huahuacunahuan huiñaipaj ari ninacushcamantami chashna churanga.

⁹ Chaicunaca Aaronpajpish, paipaj churicunapajpish huahua huahua japicunapajllami. Chaicunataca Diospajlla ch'icanchishcapi micuchun. Mandaj Diosman cushpa rupachishcaca tucuimanta yalli Diospajlla ch'icanchishca cashcamantami chaipi micuna” nircami.

Mandaj Diosta c'amijcunata llaquichinami

¹⁰ Chai punllacunapimi Israel shuj huarmipaj churi tiyarca. Paipaj yayaca egipciomi carca. Chai churimi, israelpuramanta caj shuj runahuan carpa huasicunapi p'iñanacushpa rimanacurca.

¹¹ Chaipimi Israel huarmipaj churica, Mandaj Diosta c'amishpa paipaj shutita yanganchishpa rimarca. Chaimantami paitaca Moisespajman pusharcacuna. Chai runapaj mamaca, Danpaj aillumanta caj Dibri runapaj ushushi Selomitmi carca.

¹² Mandaj Dios imata ruranata huillangacamami, chai runataca carcelpi churarcacuna.

¹³ Chaipimi Mandaj Diosca, Moisesta mandashpa cashna nirca:

¹⁴ “Diosta c'amij runataca carpa huasicunamanta canllaman llujshichi. Chai runa c'amishcata maijanlla uyajcuna, chai runapaj uma jahuapi maquicunata churaichij. Tucui tandanacushcacuna rumicunahuan shitaichij.

¹⁵ Shinallataj tucui israelcunamanca cashna nishpa huillangui: Maijanpish Taita Diospaj shutita c'amijca juchayujmi tucunga.

¹⁶ Maijanpish Mandaj Diospaj shutita p'iñashpa c'amijca huañungatajmi. Tucui tandanacushca israelcunami rumicunahuan shitangacuna. Mana israelcuna cashpapish, israelcuna cashpapish Mandaj Diospaj shutita p'iñashpa c'amishpaca huañungatajmi.

¹⁷ Maijanpish huañuchijtaca, paitapish huañuchichun.

¹⁸ Maijanpish ima animalta huañuchijca, chai animalyujmanca shujtaj chai shinallataj animalta cuchun.

¹⁹ Maijanpish shujtajta lisiajtaca, pai rurashca shinallataj paitapish rurashca cachun.

²⁰ P'aquishca cajpica paitapish p'aquichun. Ñahuita llujshichishca cajpica, paitapish ñahuita llujshichichun. Quiruta lujshichishca cajpica, paitapish quiruta llujshichichun. Caishujta ima shinami llaquichirca, chashnallataj paitapish llaquichichun.

²¹ Maijanpaj animalta huañuchijca, chai shinallataj animalta tigrachichun. Maijanpish shuj runata huañuchijca paipish huañungami.

²² Israelcunapajpish, mana israelcunapajpish chaitataj pajtachichun mandashcacunaca chai mandashcacunallatajmi canga. Ñucami Mandaj Dios cancunapaj Dios cani” nircami.

²³ Chashna mandashcata Moisés tucui israelcunaman huillajpimi, israelcunaca Diosta c'amij runataca carpa huasicunamanta caruman llujshichishpa rumicunahuan shitarcacuna. Mandaj Dios Moisesta ima shinalla mandashca shinallatajmi israelcunaca rurarcacuna.