LEVÍTICO 2 - Dios Rimashca Shimicunami

Mandaj Diosman chaquishca granocunata cushpa rupachinami

¹ Mandaj Diosman granota cungapaj maijan apamushpaca, tucuimanta yalli alli cutata apamuchun. Chai jahuapica aceiteta inciensota churashpa apamuchun.

² Chaitaca, Aaronpaj churi curacunapajman apachun. Chai cutataca maillata aceitehuan, inciensohuan churashcata paipaj maqui jundata cura apashpa altar jahuapi rupachichun. Yuyarinapaj cachunmi chashna rupachinga. Chai cushpa rupachishcaca Mandaj Diospajca mishquijllata ashnacujmi canga.

³ Mandaj Diosman cushpa rupachishcacunaca Mandaj Diospajlla ch'icanchishcami. Chaimanta puchushcacunaca Aronpaj, paipaj churicunapajmi canga.

⁴ Hornopi cusashcata, Mandaj Diosman cushpaca, tucuimanta yalli alli cutata levadura illajllata aceitehuan chapushpa tortata rurashcahuan, levadura illajlla tortillata, aceitehuan llihuishcahuan apamuchun.

⁵ Chaquishca granota sartenpi cusashcata Mandaj Diosman cusha nishpaca, tucuimanta yalli alli cutata levadura illajllata aceitehuan chapushpa rurashca cachun.

⁶ Chaitaca mirga mirgata chaupishpa, chai jahuataca aceitehuan churangui. Chaimi Mandaj Diosman cushca canga.

⁷ Cazuelapi yanushca micunata Mandaj Diosman cusha nishpaca, tucuimanta yalli alli cutata aceitehuan chapuchun.

⁸ Mandaj Diosman cungapaj chaicunahuan allichishcacunataca Mandaj Diospaj ñaupajman apashpa curaman cungui. Chaitaca paimi altarman apanga.

⁹ Mandaj Diosman cuna cashcataca, ashata cura apashpa altar jahuapi rupachichun. Yuyarinapaj cachun chashna rurachun. Chashna cushpa rupachishcami Mandaj Diospajca mishquijllata ashnacuj canga.

¹⁰ Mandaj Diosman cushcacunaca Diospajlla ch'icanchishcami. Chaimanta Mandaj Diosman cushpa rupachicujpi puchushcacunaca Aronpaj, paipaj churicunapajmi canga.

¹¹ Chaquishca granocunata Mandaj Diosman cancuna cucushpaca ima cashpapish levadurahuan rurashcaca mana cana canchu. Mandaj Diosman rupachishpa cucushpaca levaduratapish chuspipaj mishquitapish ama churachun.

¹² Punta p'ucushca granocunata cucushpaca chaicunata churashpa ñucapajman apamui tucunguichijmi. Ashtahuanpish ñucapaj mishquijllata ashnacuj cachun altar jahuapica ama rupachinguichijchu.

¹³ Tucui imata Diosman cushpaca cachihuan allichishpataj cunguichij. Taita Diosman imata cucushpaca, cambaj Taita Dios cancunahuan ari ninacushcata ricuchij cachitaca amataj illachinguichijchu. Taita Diosman imata cucushpaca cachihuantaj cunguichij.

¹⁴ Punta p'ucushca granocunata Mandaj Diosman cucushpaca, grano espigata canchashcata, mana cashpaca llullu granota cutashcata apamunguichij. Chaimi chagrapi punta p'ucushca granota Mandaj Diosman cushcaca canga.

¹⁵ Chai jahuapica aceiteta churachun, inciensotapish churachun. Chaimi Mandaj Diosman cushca canga.

¹⁶ Yuyarinapaj cachun chai grano cutashcataca ashata aceitendij, inciensondij cura japishpa rupachichun. Chaica Mandaj Diosman cushpa rupachishcami.