LEVÍTICO 19 - Dios Rimashca Shimicunami

Diospajlla canatapish cashcata ruranatapish mandashcacunami

¹ Mandaj Diosca Moisesta mandashpaca:

² “Tandanacushca tucui israelcunamanca cashna nishpa huillai: Mandaj ñuca cancunapaj Diosca ima jucha illaj cashcamanta, cancunapish ima jucha illajlla caichij.

³ Tucuicuna quiquin yayata quiquin mamata manchachun. Ñucapaj samana punllata huaquichinguichij. Ñucami Mandaj Dios cancunapaj Taita Dios cani.

⁴ Cancunaca rurashcalla dioscunata ñataj cutin yuyaricunguichijman. Cancunapaj dios cachun nishpapish ñataj imatapish yacuyachishpa dioscunata ruranguichijman. Ñucami Mandaj Dios cancunapaj Taita Dios cani.

⁵ Sumaj causaimanta animalta huañuchishpa Mandaj Diosman cushpaca, pai munashca shina chasquinallata cunguichij.

⁶ Chai aichataca, chai punllatajpish, cayandij punllapish micunguichijlla. Ashtahuanpish quimsa punllapaj saquirishca aichataca ninapi rupachinguichij.

⁷ Chai aichata quimsa punllapi micujpica, millananami canga. Chaimanta mana chasquishcami tucunga.

⁸ Chai micujca jatun mana alli nishcami tucunga. Mandaj Diospajlla ch'icanchishcata yangata rurashcamantaca, chai yanganchijtaca israelcunapuramanta anchuchishcami canga.

⁹ Cambaj allpapi granota tandai punllacuna tandacushpaca, ama maipi tiyajta tucuita tandanguichu. Pambapi urmashca granotapish ama pallanguichu.

¹⁰ Uva chagrapi uvata pallashpapish ama mashcashpurishpa pallangui. Pambapi urmashcatapish ama pallangui. Chaicunataca huajchacunapish, caru llajtamanta shamushcacunapish ch'alachun saquingui. Ñucami Mandaj Dios cancunapaj Taita Dios cani.

¹¹ Ama shuhuanguichijchu, ama llullanguichijchu, caishuj chaishuj ama umanacunguichijchu.

¹² Cancunapaj Taita Diospaj shutita yanganchishpa, manapish pajtachingapaj pajtachishatajmi nishpa ñuca shutipi ama ninguichij. Ñucami Mandaj Dios cani.

¹³ Shujtajcunata ama llaquichinguichijchu, ama shuhuanguichijchu. Cambaj huasipi trabajajman pagana cashcataca cayami cusha ama ninguichijchu.

¹⁴ Rinrin mana uyajcunataca imatapish nishpa ama chanzata ruranguichij. Ñahui mana ricuj ñitcachunpish ama imata churanguichijchu. Ashtahuanpish cancunapaj Taita Diosta manchanguichij. Ñucami Mandaj Dios cani.

¹⁵ Maijan ima mana allita rurashcata allichichun nijpica, imata mana charij huajchapuralla ama tucunguichijchu. Achcata charijpurallapish ama tucunguichijchu. Ashtahuanpish maijanmanpish ama tucushpa, imatapish cashcata ricuchinguichij.

¹⁶ Cambaj llajtapica ama huashalla parlashpa purij cangui. Pita ama huañuchisha nishpa puringui. Ñucami Mandaj Dios cani.

¹⁷ Cambaj huauquita cambaj shungupi ama p'iñangui. Juchata rurajtaca sinchita rimangui. Mana chashna rurashpaca canpish juchata rurashca shinallatajmi tucungui.

¹⁸ Cambaj llajtapi causajcunata canpish ama tigra llaquichinguichu, ama chai yuyailla puringuichu. Ashtahuanpish can quiquinta shinallataj shujtajcunatapish c'uyangui. Ñucami Mandaj Dios cani.

¹⁹ Ñuca mandashcacunata huaquichingui. Cambaj animaltaca mana chaipurallataj caj animalhuanca ama japichingui. Cambaj chagrapipish, shujtaj shujtaj muyuhuan chagruca ama tarpungui. Ch'ican ch'ican puchcacunahuan rurashca churanatapish ama churangui.

²⁰ Shujtajpajta ruraj huarmi shujtajhuan ari ninacushca cangachari. Chashna cashpapish chai amoman cullquita manaraj cushca cangachari. Manaraj richun saquishcapish cangachari. Chai huarmihuan shujtaj c'ari siririjpica, ishquindijtataj llaquichishca cachun. Manaraj richun saquishca cashcamanta paitaca mana huañuchishcachu canga.

²¹ Chai runa mana cazushcamantaca shuj carnerota, Mandaj Dioshuan tupana carpa huasi pungupi Mandaj Diosman cuchun.

²² Chai juchamanta cushca carnerota cura cushpami, Mandaj Dioshuan alli tucunacuchinga. Chashna chai juchamanta Mandaj Diosman cujpimi, chai runa chashna juchallishca juchataca perdonanga.

²³ Canaaman ña chayashpaca, mishqui micuita p'ucuj tucui laya yuracunata tarpushpa, chai p'ucushcacunataca circuncisionta mana rurashca cashca shinata yuyanguichij. Chaicunaca quimsa huatatami circuncisionta mana rurashca shina mapa canga. Chai p'ucushca granocunaca mana micunachu canga.

²⁴ Ña chuscu huata tucujpi, tucui chai p'ucushcacunataca Mandaj Diosta alabanapaj ch'icanchinguichij.

²⁵ Ña pichca huata tucujpi chai yurapi p'ucushcacunataca micunguichij. Chai yuracunapi ashtahuan ñuca p'ucuchichunmi chashna micuna canguichij. Ñucami Mandaj Dios cancunapaj Taita Dios cani.

²⁶ Imatapish yahuarhuan chagrutaca ama micunguichijchu. Shinallataj brujocunapish, adivinocunapish ama canguichijchu.

²⁷ Uma ajchatapish corona pamballata ama lluchujllata rutuchinguichijchu. Cancunapaj barba puntatapish ama utunguichijchu.

²⁸ Huañujmantaca cancunapaj cuerpotaca ama chugrichinguichijchu. Ima ricunacunatapish cancunapaj aichapi ama quillcanguichijchu. Ñucami Mandaj Dios cani.

²⁹ Cambaj ushushitaca huainayashcahuan causajta rurashpa ama mapayachingui. Chai llajtaca huainayashcahuan mapayashca millaihuan junda ama cachunmi mana chashna rurana cangui.

³⁰ Ñucapaj samana punllacunataca huaquichinguichij. Ñucapajlla ch'icanchishca ucutaca ama yanga cashcata yuyanguichij. Ñucami Mandaj Dios cani.

³¹ Muspachij yumbucunatapish, adivinocunatapish tapujcuna cutin tucunguichijman. Paicunahuan ama mapayanguichijchu. Ñucami Mandaj Dios, cancunapaj Taita Dios cani.

³² Puzujlla uma yuyajcunataca paicunapaj ñaupajpi shayarishpa alli ninguichij. Cambaj Taita Diosta manchanguichij. Ñucami Mandaj Dios cani.

³³ Mana israelcuna cancunapaj llajtapi cancunahuan causacujpica ama llaquichinguichijchu.

³⁴ Cancunapurata ima shinami c'uyanguichij, chashnallataj paicunatapish c'uyanguichij. Cancunapish Egipto llajtapi cashpaca caru llajtamanta cajcunallatajmi carcanguichij. Ñucami Mandaj Dios cancunapaj Taita Dios cani.

³⁵ Imata allichinapica ama shujllaman tucunguichij. Allpata medishpapish, imata pezashpapish, ima shujtajta medishpapish ama llaquichinguichij. Ashtahuanpish cashcata ruranguichij.

³⁶ Chashna rurangapajca pezanatapish, medinatapish allita charinguichij. Ñucami Egiptomanta cancunata llujshichij Mandaj Dios cancunapaj Taita Dios cani.

³⁷ Ñuca chaitataj pajtachichun nishcacunata, ñuca tucui mandashcacunata huaquichishpa chaitataj pajtachina yuyailla ruranguichij. Ñucami Mandaj Dios cani” nircami.