LEVÍTICO 17 - Dios Rimashca Shimicunami

Diospajlla carpa huasica shujtajca mana tiyanchu

¹ Mandaj Diosca Moisesta mandashpaca:

² “Aarontapish, paipaj churicunatapish, tucui israelcunatapish mandashpa cashna ni: Mandaj Diosca cashna rurachunmi mandan:

³ Maijan israelcuna shuj huagrata cashpa, shuj malta ovejata cashpa, shuj chivata cashpapish, paicuna causacun huasillapi cashpa mana cashpaca paicuna causacun carpa huasicunamanta canllaman huañuchingachari.

⁴ Mandaj Dioshuan tupana carpa huasiman Mandaj Diospaj ñaupajman mana apashpa chaipi mana cungaraicu paicuna causacunpi huañuchishpaca chai yahuarmantaca mandashcata mana pajtachishcamanta juchayujmi canga. Chai yahuarmantaca chai runaca israelcunapuramanta anchuchishcami canga.

⁵ Chaitaca maipipish Mandaj Diosman cushpa rupachicuj israelcuna, ama chashna rurashpa, ashtahuanpish Mandaj Dioshuan tupana carpa huasi punguman curapajman apamunata yachachun chashna mandashcami. Chaiman apamujpimi, sumaj causaimanta cuna cashcataca Mandaj Diosman cura cunga.

⁶ Chai yahuartaca Mandaj Dioshuan tupana carpa huasi pungupi caj, Mandaj Diospaj altar jahuata cura tsirapachun. Huiratapish Mandaj Diospaj mishquijllata ashnacuj cachun rupachichun.

⁷ Cancuna huainayacushca supaicunamanca nunca ña mana ashtahuan animalcunata huañuchishpa cunachu canguichij. Chaitaca cancunapaj huahua huahuacuna chaitataj pajtachicuchunlla mandashcami.

⁸ Israelcunamanca cashnapish ningui: Maijan israelcuna cashpa mana cashpaca cancunapurapi causaj mana israelcuna cashpa, Mandaj Diosman tucuita cushpa tucui rupachinata cucushpa mana cashpaca Mandaj Diosman cushpa rupachinata cucushpa,

⁹ Mandaj Dioshuan tupana carpa huasi punguman apamushpa chaipi Mandaj Diosman cuna cashcata mana chaipi cujpica chai runataca, maijan cachunpish israelcunapuramanta anchuchishcami canga.

Yahuarta ama micuchun mandashcami

¹⁰ Maijan israelcuna cashpa mana cashpaca paicunapurapi causaj mana israelcuna cashpa ima animalpaj yahuarta micujpica ñucaca paihuan p'iñarishpa, paitaca israelcunapuramanta anchuchishami.

¹¹ Aichapaj causaica yahuarpimi. Yahuartaca cancunapaj almamanta altarpi churanapajmi curcani. Yahuarmi cancunapaj almataca quishpichin.

¹² Chaimanta ñami tucui israelcunata cashna nircani: “Cancunapurapi causajcunaca, israelcuna cashpa, mana israelcuna cashpapish yahuartaca amataj micunguichijchu” nircanimi.

¹³ Maijan israelcuna cashpa, paicunapurapi causaj mana israelcuna cashpapish micuna animalta cashpa, alasyuj micuna animalta cashpapish shitana caspihuan huañuchishpaca yahuartaca allpahuan tapachichun.

¹⁴ Aichayujcunaca yahuarmantami causan. Chaimantami israelcunataca: “Ima aichamantapish yahuartaca amataj micunguichijchu. Tucui aichayujcunaca yahuarmantami causaiyuj. Chaimanta maijanpish yahuarta micujtaca, israelcunapuramanta anchuchishcami canga” nircami.

¹⁵ Israelcuna cashpa, mana israelcuna cashpapish, huañushca animal aichata, mana cashpaca sacha animal huañuchishca animalpaj aichata micushpaca paipaj churanacunata tajshashpa paipish armachun. Paica tutayangacama mapami saquiringa. Chai q'uipami, mapa illajlla saquiringa.

¹⁶ Ashtahuanpish paipaj churanacunata mana tajshashpa, paipish mana armashpaca paipaj juchamanta llaquita apangami” nircami.