LEVÍTICO 16 - Dios Rimashca Shimicunami

Juchata Dios perdonana punllami

¹ Aaronpaj ishqui churicunaca Mandaj Diospajman c'uchuyashcamantami huañurca. Chai q'uipami Mandaj Diosca Moisestaca cashna mandarca:

² Mandaj Diosca Moisestaca: “Cambaj huauqui Aaronman cashna huillai: Ama huañungapajca linsohuan jarcachishpa ñucapajlla ch'icanchishca ucuman, arca jahuapi caj propiciatorio ñaupajmanca ima punllapish ama yaicunguichu. Ñucami chai propiciatorio jahuapi p'uyu chaupipi ricurisha.

³ Aaronca ñucapajlla ch'icanchishca ucumanca caicunahuan yaicuchun: Juchamanta cungapaj shuj malta huagrahuan, tucuita cushpa tucui rupachinapaj shuj carnerohuan yaicuchun.

⁴ Cai ucumanca ñucapajlla ch'icanchishca lino tunicata churarishca, lino calzoncillocunata churarishca, lino chumbillahuantaj chumbillirishca, umapipish lino mitrata churarishca yaicuchun. Tucui chaicunaca Diospajlla ch'icanchishca churanacunami. Paipaj cuerpota yacuhuan armashca q'uipa chai churanacunataca churarichun.

⁵ Aaronca tandanacushca tucui israelcunapajtaca juchamanta cungapajca ishqui c'ari chivota japichun. Tucuita cushpa tucui rupachinapajca shuj carnerota japichun.

⁶ Aaronca, paipaj juchamanta cuna c'ari huagrata apamuchishpami, paipaj juchamantapish, paipaj huasi ucupuracunapaj juchamantapish ñucahuan alli tucunga.

⁷ Chai q'uipaca ishqui chivota japishpa, Mandaj Dioshuan tupana carpa huasi punguman Mandaj Diospaj ñaupajman apamuchun.

⁸ Aaronca chai ishqui chivocunataca Mandaj Diospaj maijan cashcata, Azazelpaj maijan cashcata yachangapajmi sorteanga.

⁹ Sorteajpi Mandaj Diospaj urmashca c'ari chivotaca, Aarón apamuchishpa juchamanta cuna cashcata cuchun.

¹⁰ Ashtahuanpish sorteajpi Azazelpaj urmashca chivotaca Mandaj Diospaj ñaupajman causajta apamushpa israelcunapaj juchata perdonachun Mandaj Diosman cuchun. Chai q'uipaca Azazelpaj cachun shitashca pambapi cacharinaman cachachun.

¹¹ Aaronca paipaj juchamanta cuna c'ari huagrata apamuchishpa, paipaj juchamantapish, paipaj huasi ucupuracunapaj juchamantapish cushpa ñucahuan alli tucuchun. Juchamanta cushca huagrataca huañuchichun.

¹² Chai q'uipaca Aaronca, Mandaj Diospaj ñaupajpi tiyacuj altarmanta nina brazushuan junda caj inciensota rupachinata japishpa, mishquijllata ashnacuj cutashca inciensotapish ishqui maqui jundata japishpa, ñucapajlla ch'icanchishca ucuta jarcachishca linso huashaman apachun.

¹³ Chaiman yaicushpaca, mishquijllata ashnacuj chai inciensiotaca nina rupacun jahuapi churashpa Mandaj Diospaj ñaupajpi churachun. Aarón ama huañuchunmi mishquijllata ashnacuj chai inciensio cushnica Mandaj Dioshuan shuj yuyailla tucushcata ricuchij quillcata huaquichina arca jahuapi caj propiciatoriota tapanga.

¹⁴ Chai q'uipaca Aaronca, huagrapaj yahuarta paipaj dedohuan japishpa propiciatorio jahuataca inti llujshin ladollata tsirapachun. Propiciatorio ñaupaj ladotapish chai yahuarllahuantaj paipaj dedohuan canchis cutin tsirapachun.

¹⁵ Chai q'uipaca, chivota israelcunapaj juchamanta cushpa huañuchichun. Chai yahuartaca jarcachishca linso huashaman apachun. Yahuarhuanca huagrapaj yahuarhuan ima shina rurashca shinallataj propiciatorio jahuatapish, propiciatorio ñaupaj ladotapish tsirapachun.

¹⁶ Chashnami, israelcuna paicunapaj mapahuan mapayachishcatapish, c'ariyashcahuan paicunapaj tucui juchacunahuan mapayachishcatapish ñucapajlla ch'icanchishca ucutaca ima mapa illajllata ruranga. Paicunapaj mapa chaupipi caj Mandaj Dioshuan tupana carpa huasitapish chashnallatajmi chuyayachinga.

¹⁷ Juchacunata perdonachun Aarón chaicunata ruranaman yaicujpica, Mandaj Dioshuan tupana carpa huasi chaipica pai llujshingacama pi ama chaipi cachun. Aaronca paipaj juchatapish, paipaj huasi ucupuracunapaj juchatapish, tucui israelcunapaj juchatapish perdonachun chaicunata rurashpa llujshishpaca,

¹⁸ juchacunata perdonachun chashnallataj rurangapaj Mandaj Diospaj ñaupajpi caj altarman c'uchuyachun. Chaipica huagrapaj yahuartapish, chivopaj yahuartapish japishpa chai altar muyundij gachucunapi churachun.

¹⁹ Chai altar jahuata chai yahuarhuan paipaj dedohuan canchis cutin tsirapashpami, israelcuna paicunapaj mapahuan mapayachishcataca ima mapa illajllata rurashpa paipajlla ch'icanchinga.

²⁰ Diospajlla ch'icanchishca ucutapish, Mandaj Dioshuan tupana carpa huasitapish, altartapish ima mapa illajllata rurashca q'uipaca caishuj causaj chivotapish apamuchichun.

²¹ Chai causaj chivopaj uma jahuapica Aarón paipaj ishqui maquita churashpa tucui israelcuna millaita rurashcacunata, paicuna c'ariyashcacunata, paicuna juchallishcacunata chai chivopaj jahuapi huillachun. Chai chivopaj uma jahuapi paipaj maquita churashpaca shitashca pambapi chivota cacharigringapaj caj runaman cacharishpa cachanaman cachachun.

²² Chai chivoman tucui israelcuna millaita rurashcacunataca paipaj jahuapi apachishpa chulunlla shitashca pambata richun cachachun.

²³ Chai q'uipaca Aaronca Mandaj Dioshuan tupana carpa huasiman yaicushpa, Diospajlla ucuman yaicunapaj churarishca lino churanata llujshichishpa chaipi churachun.

²⁴ Chai q'uipaca Diospajlla ch'icanchishca ucullapitaj paipaj cuerpota armashpa, paipaj churanata churarishpa pai quiquinmantapish, tucui israelcunamantapish tucuita cushpa tucui rupachinata cunaman llujshichun. Pai quiquinmantapish, tucui israelcunapaj juchacunamantapish cuna cashcata cuchun.

²⁵ Juchamanta cushca animalpaj huirataca altar jahuapi rupachichun.

²⁶ Azazelpaj cachun chivota shitashca pambaman apajca paipaj churanata tajshashpa, paipish yacuhuan armashpa chai q'uipa carpa huasicuna tiyanman yaicugrichun.

²⁷ Shinallataj juchamanta cushpa huañuchishca huagrapaj, chivopaj yahuartaca Diospajlla ch'icanchishca ucupi juchata perdonachun tsirapanapaj apachun. Chai aichacunataca carandij, majadandij carpa huasicunamanta canllaman llujshichishpa rupachichun.

²⁸ Chaicunata rupachijca paipaj churanacunata tajshashpa, paipish yacuhuan armachun. Chai q'uipaca paicuna causacushca carpa huasicunaman tigrachunlla.

²⁹ Tucui cai mandashcacunaca chashna ruracuchunlla mandashcami. Canchis quillapaj chunga punllapica cancunapaj alma llaquilla tucushpa, imata mana rurashpami samarina canguichij. Cancunapish, cancunahuan causacuj mana israelcunapish chai shinallataj rurachun.

³⁰ Chai punllami cancunaca Mandaj Dios cancunapaj juchata perdonajpi, ima mapa illaj saquirishcamanta Mandaj Diospaj ñaupajpica ima mapa illajtaj saquiringuichij.

³¹ Chai punllaca cancunapajca samarina punlla cashcamanta cancunapaj tucui almahuan llaquiringuichij. Cai mandashcacunaca chashnataj ruracuchunlla mandashcami.

³² Juchamanta cuna cashcacunataca paipaj yayapaj randi cura cachun aceitehuan ch'icanchishca curalla cuchun. Chashna rurangapajca, ñucapajta ruranapajlla churarina lino churanata churarichun.

³³ Chaita churarishpaca ñucapajlla ch'icanchishca ucuta, Mandaj Dioshuan tupana carpa huasita ima mapa illajllata rurachun. Shinallataj altarta, curacunata, tandanacushca tucui israelcunatapish ima jucha illajllata rurachun.

³⁴ Tucui israelcunapaj juchacunamanta huatapi shuj cutin chashna ruracuchunlla mandashca cashcamanta chashna ruracuchunlla mandashcami” nircami. Moisesca Mandaj Dios mandashca shinallatajmi rurarca.