LEVÍTICO 15 - Dios Rimashca Shimicunami

Quiya shina yacu cachariricuj c'aricunata mandashcami

¹ Mandaj Diosca Moisestapish, Aarontapish mandashpaca:

² “Israelcunamanca cashna huillaichij: Maijan c'ari cashpapish, quiya shina yacu cachariricuj cashpaca mapami canga.

³ Chai quiya shina yacu cachariricujca cashna cashpami mapa canga: Paipaj charishca aichamanta quiya shina yacu cachariricuj cashpa, mana cashpaca quiya shina yacu cachariricushca ña pararishca cashpapish paica mapami canga.

⁴ Quiya shina yacu cachariricuj runa siririshca camaca maipi cashpapish mapami canga. Chai runa tucui imapi tiyarishcapish mapami canga.

⁵ Maijanpish chai runapaj camapi tuparijca paipaj churanata tajshachun, paillatajpish yacuhuan armachun. Tutayangacama mapami saquiringa.

⁶ Maijanpish quiya shina yacu cachariricuj runa tiyarishcapi tiyarishca cashpaca paipaj churanacunata tajshachun, paillatajpish yacuhuan armachun. Paica tutayangacama mapami saquiringa.

⁷ Maijanpish quiya shina yacu cachariricujpaj cuerpopi tuparishpaca, paipaj churanacunata tajshachun, paillatajpish yacuhuan armachun. Paica tutayangacama mapami saquiringa.

⁸ Quiya shina yacu cachariricuj runa, shujtaj limpio runapi ch'ucajpica, chaica paipaj churanacunata tajshachun, paipish yacuhuan armachun. Chai q'uipaca tutayangacama mapami saquiringa.

⁹ Quiya shina yacu cachariricuj runa montashca tucui monturacunaca mapami canga.

¹⁰ Quiya shina yacu cachariricuj runa imapi tiyarishcacunapi maijanpish tuparijca, tutayangacama mapami saquiringa. Shinallataj chai runa tiyarishcacunata maijanpish apajca paipaj churanacunata tajshachun, paipish yacuhuan armachun. Chai q'uipaca tutayangacama mapami saquiringa.

¹¹ Quiya shina yacu cachariricuj runa paipaj maquita manaraj maillashpa maijanpi tuparijpica, paipaj churanacunata tajshachun, paillatajpish yacuhuan armachun. Paica tutayangacama mapami saquiringa.

¹² Quiya shina yacu cachariricuj runa, allpamanta rurashca imapi tuparijpica chaitaca p'aquichun. Caspimanta rurashca ima charinacunapi tuparijpica, chaicunataca yacuhuan maillachun.

¹³ Quiya shina yacu cachariricuj runa alliyashpaca, chai alliyashca punllamanta canchis punllata yupashpa paipaj churanacunata tajshashpa, paipaj cuerpotapish callpacuj yacuhuan armashpa ima mapa illaj saquirichun.

¹⁴ Pusaj punllapica, ishqui urpita cashpa, ishqui palomata cashpa japishpa, Mandaj Diospaj ñaupajman shamushpa Mandaj Dioshuan tupana carpa huasi pungupi curaman cuchun.

¹⁵ Chaicunataca curami shujtaca juchamanta cuna cashcata, caishujtaca tucuita cushpa tucui rupachinata Mandaj Diosman cunga. Chashnami curaca quiya shina yacu cachariricuj runataca Mandaj Diospaj ñaupajpi ima mapa illajta ruranga.

¹⁶ Maijan c'aripajpish yuraj yacu yangallamanta llujshijpica tucui paipaj cuerpota yacuhuan armachun. Paica tutayangacama mapami saquiringa.

¹⁷ Maijanpaj yuraj yacu yangallamanta llujshicushca churanacunapi cashpa, carapi cashpa urmajpica chaicunataca yacupi tajshachun. Chaicunapish tutayangacama mapami saquiringa.

¹⁸ Yuraj yacu llujshicuj c'ari, shuj huarmihuan chayarinacushpaca, ishquindijtaj yacuhuan armachun. Paicunaca tutayangacama mapami saquiringacuna.

¹⁹ Quillapi uriyana yahuar maijan huarmipi uriyacujpica, chai huarmica canchis punllacamami pailla canga. Maijanpish chai huarmipi tuparijca, tutayangacama mapami saquiringa.

²⁰ Chai huarmi pailla ch'ican cai punllacunapi tucui imapi siririshcacunapish mapami canga. Chai huarmi tucui imallapi tiyarishcacunapish mapami canga.

²¹ Yahuar uriyacuj huarmipaj camapi maijanpish tuparijca, paipaj churanata tajshachun, paipish yacuhuan armachun. Chai q'uipapish tutayangacama mapami saquiringa.

²² Shinallataj chai huarmi ima tiyarinapi cashpapish tiyarishcapi maijanpish tuparijca paipaj churanata tajshachun, paillatajpish yacuhuan armachun. Paica tutayangacama mapami saquiringa.

²³ Yahuar uriyacuj huarmipaj cama jahuapi cashpa, pai tiyarishca tiyana jahuapi cashpa ima siricunpi maijanpish tuparijca tutayangacama mapami saquiringa.

²⁴ Yahuar uriyacuj huarmihuan maijanpish dormishpa chai yahuarpi tuparijca, canchis punllacamami mapa saquiringa. Paicuna dormishca camapish mapami canga.

²⁵ Shinallataj maijan huarmica quilla ungüi mashna punllata uriyana cashcallata mana uriyashpa achca punllacunata yahuar cachariricujllapica, tucui chai yahuar cachariricui punllacunami quilla ungüi shamucui punllacunapi shinallataj mapa saquiringa.

²⁶ Yahuar cachariricui punllacunapi dormishca camaca, quilla ungüi shamucui punllacuna dormishca cama shinallataj mapami canga. Pai tiyarishca tiyanapish quilla ungüi shamucui punllacunapi tiyarijpi shinallatajmi mapa canga.

²⁷ Chaicunapi maijanpish tuparijca mapami canga. Chaimanta paipaj churanatapish tajshachun, paipish yacuhuan armachun. Paica tutayangacama mapami saquiringa.

²⁸ Chai huarmipaj yahuar cachariricushca ña pararijpica, chai punllamanta canchis punllata yupachun. Chai q'uipami mapa illajlla saquiringa.

²⁹ Pusaj punllapica ishqui urpita cashpa, ishqui palomata cashpa, Mandaj Dioshuan tupana carpa huasi punguman apamushpa curaman cuchun.

³⁰ Chaicunataca curaca shujtaca juchamanta Diosman cuchun, caishujtaca tucuita cushpa tucui rupachichun. Cura chashna rurashpami yahuar cachariricushcamanta alliyashca huarmitaca Mandaj Diospaj ñaupajpi ima mapa illajllata ruranga.

³¹ Israelpaj huahua huahuacunataca mapamanta chuyayachirashpa charinguichij. Paicunapaj chaupipi caj ñuca carpa huasita paicunapaj mapahuan mapayachishcamanta ama huañuchunmi chashna chuyata charina canguichij” nircami.

³² Tucui cai mandashcacunaca quiya shina yacu cachariricujcuna, yuraj yacu yangallamanta llujshijpi mapa tucujcuna imallata ruranata mandashcami.

³³ Shinallataj quillanta yahuar shamucuj huarmicunapish, quiya shina yacu cacharirishpa unguj c'aricunapish, huarmicunapish, mapa huarmihuan dormij c'aricunapish ima shinalla rurachun mandashcami.