LEVÍTICO 14 - Dios Rimashca Shimicunami

Lepra ungüihuan cajcuna ima shina mapa illajlla tucunata yachachishcami

¹ Mandaj Diosca Moisesta mandashpaca:

² Lepra ungüihuan cashpa chuyayangapaj imallata ruranaca caicunami: Leprahuan cajca curaman ricuchigrichun.

³ Chai curami carpa huasicunamanta canllaman tupashpa alli ricunga. Lepra ungüihuan cajpaj caracha ña alliyashcata ricushpaca,

⁴ curami ima mapa illajllata ruranapajca ima mapa illaj ishqui pajarocunata, cedro caspita, shuj puca linsota, hisopo p'angatapish apamuchun mandanga.

⁵ Chaicunata apamujpica chai pajarocunamanta shuj pajarotaca allpa mangapi callpacuj yacuta japishca jahuapi huañuchichun cura mandachun.

⁶ Chai q'uipaca causaj pajarotapish, cedro caspitapish, puca linsotapish, hisopo p'angatapish japishpami, callpacuj yacupi huañuchishca pajaropaj yahuarpi causaj pajarotaca shutujyachinga.

⁷ Lepra ungüimanta alliyashca cajpaj jahuataca chai yahuarhuan canchis cutin tsirapachun. Chai q'uipaca, ña mapa illajlla cashcata huillashpa, causaj pajarotaca cacharishpa cachachunlla.

⁸ Lepra ungüimanta alliyashpa ima mapa illajlla tucujca, paipaj churanata tajshashpa, uma ajchatapish tucuita rutushpa yacuhuan armashpa ima mapa illajlla saquirichun. Chai q'uipaca carpa huasicuna tiyanman yaicushpapish, paipaj carpa huasi ucumanca ama yaicushpa canchis punllacunata canllallaman saquirichun.

⁹ Ña canchis punlla tucujpica paipaj uma ajchatapish, barbatapish, ñahui pata millmatapish, cuerpo millmatapish tucui rutuchun. Paipaj churanatapish tajshashpa, paipish yacupi armashpami ima mapa illajlla saquiringa.

¹⁰ Ña pusaj punlla tucujpica ima mana tucushca ishqui malta ovejata, shuj huatayuj ima mana tucushca huarmi ovejatapish apamuchun. Shinallataj Diosman cuna cashcataca sujta kilo chaupi ashtahuan alli cutata aceitehuan chapushcata, shuj log nishca aceitetapish apamuchun.

¹¹ Mapa illajllata ruracuj curami lepra ungüimanta alliyashcamanta mapa illajlla tucucujtapish, mapa illajllata rurangapaj cunapaj apamushcacunatapish Mandaj Dioshuan tupana carpa huasi pungupi Mandaj Diospaj ñaupajpi churanga.

¹² Chai curami apamushcacunamanta shuj malta ovejata japishpaca shuj log aceitehuan, rurangui nishcata mana rurashca juchamantaca Diosman cunga. Chaicunataca Mandaj Diospaj ñaupajpi huichi ricuchishpa cuyuchishpa paiman cuchun.

¹³ Chai ovejataca juchamanta cushca animaltapish, tucuita cushpa tucui rupachingapaj cushca animaltapish huañuchinallapitaj Diospajlla ch'icanchishcapi huañuchichun. Juchamanta cushca animalpish, manapish rurasha nishcata rurashcamanta cushca animalpish Diospajlla ch'icanchishca cashcamanta chai cura japinapajmi.

¹⁴ Chai q'uipaca rurangui nishcata mana rurashpa juchallishcamanta cushca animalpaj yahuarta cura japishpami, ima mapa illaj tucucuj runapaj alli lado rinrinpi llihuinga. Alli lado maqui mama dedopipish alli lado chaqui mama dedopipish chai yahuarllahuantajmi churanga.

¹⁵ Log aceiteta cura japishpami, paipaj lluqui maqui shungupi churanga.

¹⁶ Paipaj lluqui maquipi charicuj aceitepi paipaj alli lado dedota shutujyachishpa, Mandaj Diospaj ñaupajpi paipaj dedohuan canchis cutin tsirapachun.

¹⁷ Paipaj maquipi charicushca saquirishca aceitehuanca ima mapa illaj tucucuj runapaj alli lado rinrinpimi llihuinga. Alli lado maqui mama dedopipish, alli lado chaqui mama dedopipish rurangui nishcata mana rurashpa juchallishcamanta cushca animalpaj yahuarhuan llihuishca jahuapimi llihuinga.

¹⁸ Paipaj maquipi charicun aceite saquirishcahuanca ima mapa illaj tucucuj runapaj umapi churachun. Chai runapaj juchamantaca Mandaj Diospaj ñaupajpi cura chashna rurachun.

¹⁹ Chai q'uipaca mapayashca runa chuyayashca cachunmi, paipaj juchamanta cura cushpa rupachinga. Chai huashaca tucuita cushpa tucui rupachingapaj cushca animalta huañuchishpami,

²⁰ tucuita cushpa tucui rupachina animaltaca, chaquishca granota Diosman cushcacunandij altar jahuapi churanga. Cura chai runapaj juchamanta cuna cashcata chashna cujpimi chai runaca ima mapa illaj saquiringa.

²¹ Huajcha cashcamanta, tucui caipi nishca shinata cungapaj mana charishpaca, rurangui nishcata mana rurashpa juchallishcamanta Dioshuan alli tucungapaj huichi ricuchishpa cuyuchingapajca, shuj malta ovejata apamuchun. Shinallataj shuj efa ashtahuan alli cutata chungapi chaupishcata aceitehuan chapushcatapish, shuj log aceitetapish Diosman cunapaj apamuchun.

²² Shinallataj ishqui urpita cashpa, ishqui palomata cashpa pai apamui tucushcallata apamuchun. Chai animalcunamanta shujtaca juchamanta cungapaj, caishujtaca tucuita cushpa tucui rupachinapaj apamuchun.

²³ Tucui chaicunataca chuyayacui punllacuna ña pusaj punlla tucujpi, Mandaj Dioshuan tupana carpa huasi punguman apamushpa Mandaj Diospaj ñaupajpi curaman cuchun.

²⁴ Rurangui nishcata mana rurashpa juchallishcamanta cungapaj apamushca malta ovejata, shuj log aceiteta cura japishpaca huichi ricuchishpa cuyuchishpa Mandaj Diosman cuchun.

²⁵ Chai q'uipaca rurangui nishcata mana rurashpa juchallishcamanta cushca ovejataca huañuchichun. Chai huañushca animalpaj yahuarta japishpaca, ima mapa illaj tucucuj runapaj alli lado rinrinpi llihuichun. Alli lado maqui mama dedopipish, alli lado chaqui mama dedopipish chai yahuarllahuantaj churachun.

²⁶ Chai aceiteta japishpa, paipaj lluqui maqui shungupi churashpaca,

²⁷ paipaj lluqui maqui shungupi caj aceiteta paipaj alli lado maqui dedohuan japishpami, Mandaj Diospaj ñaupajpi canchis cutin tsirapanga.

²⁸ Shinallataj curami paipaj maquipi caj aceitehuanca ima mapa illaj tucucuj runapaj alli lado rinrinpi llihuinga. Paipaj alli lado maqui mama dedopipish, alli lado chaqui mama dedopipish chai huañuchishca animalpaj yahuarhuan llihuishca jahuallapitajmi llihuinga.

²⁹ Curami paipaj maquipi charicushca saquirishca aceitetaca ima mapa illaj tucucuj runapaj uma jahuapi churanga. Mandaj Dioshuan alli tucuchunmi chashna ruranga.

³⁰ Chai q'uipaca lepra ungüimanta alliyajca shuj urpita cashpa mana cashpaca, shuj palomata cashpapish pai apamui tucushcallata apamushpami Diosman cunga.

³¹ Chaicunamanta shujtaca juchamanta cuchun, caishujtaca tucuita cushpa tucui rupachinapaj cuchun. Chaquishca granocunahuan cuchun. Mapamanta chuyayacuj runapaj juchamantaca curami Mandaj Diosman chashna cunga.

³² Chai mandashcacunaca caracha lepra ungüimanta alliyashcacuna chuyayangapaj huajchalla cashpaca chaicunallata cuchun mandashcami.

Huasipi p'ulasyashca ricurijpica imata rurachun mandashcami

³³ Mandaj Diosca Moisestapish, Aarontapish mandashpaca:

³⁴ “Cancunaman ñuca cushca Canaanman ña yaicushpaca, cancuna japishca allpapi tiyaj maijan huasicunaman llaquichij leprata ñuca cachajpica,

³⁵ chai huasiyujca curapajman rishpa: Ñuca huasipica ima cashpaca llaquichij mapamari ricurin nishpa huillachun.

³⁶ Chaipimi curaca llaquichij mapata alli ricungapaj manaraj yaicushpa, chai huasipi tucui imalla tiyajcunata chai ungüi ama mapayachichun tucuita chaimanta llujshichichun mandanga. Ña tucuita llujshichishca q'uipami curaca alli ricunaman yaicunga.

³⁷ Chai llaquichij mapata cura alli ricushpaca chai huasi pata quinricunapi verdeyashca, pucayashca cajta, chai pata quinripish utcurishca cajta ricushpaca,

³⁸ curaca chai huasimanta llujshishpa, chai huasitaca canchis punllacama huichcachun.

³⁹ Ña canchis punlla tucujpi, cura cutin tigramushpa alli ricuchun. Pai ricunapaj chai huasi pata quinricunapi llaquichij mapaca ashtahuan mirarishca cajpica,

⁴⁰ chai llaquichij mapa maipi can rumicunataca llujshichichun mandachun. Chaitaca pueblomanta canllaman mapacunata shitanapi shitachuncuna.

⁴¹ Chai q'uipaca chai huasi ucu pata quinricunataca tucuita raspachichun. Raspashca allpataca pueblomanta canllaman mapacunata shitanapi shitachuncuna.

⁴² Chai rumicunata anchuchishcapica, shujtaj rumicunata japishpa churachun. Lodotapish shujtajta japishpa chai huasitaca llambujllata rurachun.

⁴³ Chai huasimanta rumicunata anchuchishpa, raspashpa shujtaj lodohuan jahuata llambuyachishca q'uipa, cutinllataj chai llaquichij mapa ricurijpica,

⁴⁴ curami chaiman yaicushpa alli ricunga. Chai llaquichij mapa chai huasipi ashtahuan mirarishca cajpica, chai huasipica millai lepra ungüimi canga. Chaica mapami canga.

⁴⁵ Chaimanta chai huasitaca urmachishpa, chai urmachishca rumicunatapish, caspicunatapish, tucui allpatapish tucuita pueblomanta canllaman mapacunata shitanapi shitanaman llujshichichun.

⁴⁶ Chai huasita cura huichcachishca punllacunapi, maijanpish chai huasiman yaicujca tutayangacama mapami canga.

⁴⁷ Shinallataj maijanpish chai huasipi dormishca cashpa, mana cashpaca chai huasipi micushca cashpaca, paipaj churanacunata tajshachun.

⁴⁸ Chai huasita shujtaj lodohuan llambuyachishca q'uipa cura cutin ricunaman yaicunapajca, chai mapa ungüi chai huasipi mana ashtahuan mirarishpa mana ricurishcamanta curaca chai huasitaca ima mapa illajmi nishpa huillachun.

⁴⁹ Chai huasita ima mapa illajllata rurangapajca ishqui pajarota, cedro caspita, puca linsota, hisopo p'angata japichun.

⁵⁰ Shuj pajarotaca callpacuj yacu allpa mangapi tiyacunpi huañuchichun.

⁵¹ Chai q'uipaca cedro caspitapish, puca linsotapish, hisopo p'angatapish causaj pajarotapish japishpa, callpacuj yacu tiyacunpi huañuchishca pajaropaj yahuarta shutuchishcapi shutujyachishpa chai huasitaca canchis cutin tsirapachun.

⁵² Chai huasitaca pájaro yahuarhuan, callpacuj yacuhuan, causaj pajarohuan, cedro caspihuan, hisopo p'angahuan, puca linsohuanmi ima mapa illajllata ruranga.

⁵³ Chai q'uipaca, causaj pajarotaca pueblomanta canllaman cacharishpa cachachunlla. Chashna chai huasitaca chuyayachichun. Chaimi mapa illajlla saquiringa” nircami.

⁵⁴ Tucui caicunaca tucui laya lepra, caracha ungüimanta,

⁵⁵ churanapi, huasipi japishca lepra ungüimanta imallata ruranata mandashcami.

⁵⁶ Shinallataj p'unguishca ricurijpipish, sisu ricurijpipish, yurajyashca ricurijpipish,

⁵⁷ ima shina mapa cashcata, ima shina mana mapa cashcata ricuchinata yachachingapaj mandashcami. Lepra ungüimanta imallata ruranata mandashcacunaca tucui chaicunami.