LEVÍTICO 13 - Dios Rimashca Shimicunami

Lepra ungüi japijpi imata rurachun mandashcami

¹ Mandaj Diosca Moisestapish, Aarontapish mandashpaca:

² “Maijanpaj cuerpo carapi p'unguishca ricurijpi, sisucuna llujshijpi, mana cashpaca mirga aicha yurajyashca ricurijpi, mana cashpaca paipaj cuerpopi lepratajlla caracha ricurijpica Aarón curapajman, mana cashpaca maijan paipaj churi curacunapajman apachun.

³ Cuerpopi carachayashca ima ungüi cashcataca curami ricunga. Carachayashcapi millma yurajyashca cajpi, chai carachaca aicha cara ucujta cajpica lepra ungüimi canga. Chai ungüitaca cura alli ricushpami mapa cashcata huillanga.

⁴ Chai ungushcapaj cuerpopi yurajyashca cashpapish, chai caracha mana ucujta cajpica, millmapish mana yurajyashca cashca cajpica, curami chai ungushcataca canchis punllacunata huichcanga.

⁵ Ña canchis punllacuna tucujpica, chai runapaj caracha ima shina tucushcata cura alli ricuchun. Chai caracha mana ashtahuan mirarishpa chai shinallataj cajpica, chai runataca shujtaj canchis punllahuan huichcachun.

⁶ Ña canchis punllacuna tucujpica, curallatajmi cutin alli ricunga. Chai caracha yanayashpa aichapi mana ashtahuan mirarishca cajpica, curami mapa illaj cashcata huillanga. Shujtaj sisucunalla cashcamantaca, chai ungushca runaca paipaj churanacunata tajshashpa, ima mapa illajllami saquiringa.

⁷ Ashtahuanpish mapa illaj tucungapaj curaman ricuchishca q'uipa sisu mirarishca cajpica, cutinllataj curaman ricuchinaman richun.

⁸ Chai ungushcataca curami alli ricunga. Caracha tucui aichata mirarishca cajpica, lepra ungüillatajmi canga. Chai ungushcataca mapa cashcatami huillanga

⁹ Maijanpi lepra ungüi carachayashca cajpica, curapajman apachun.

¹⁰ Chai ungushcata cura alli ricushpaca aicha carapi yuraj chupu tucushcata, chai millmapish yurajyashcata, ucu llullu aichapish ricurishca cajpica,

¹¹ chai runapaj cuerpopica mana alliyaipaj lepra ungüimi canga. Cura chaita ricushpaca ña mapa cashcamanta mana huichcashpapish mapa cashcata huillachun.

¹² Lepra ungüihuan cajtaca umamanta callarishpa chaquicunacama maillata cura ricunallataca tucuita lepra tapashca cajpica,

¹³ chai ungushcataca curaca alli ricuchun. Chai caracha tucui cuerpota tapashca cajpica, chai carachalla runamanca ima mapa illaj cashcata huillachun. Tucui chaicunaca yurajyashcalla cajpica, paica chuyallatajmi canga.

¹⁴ Ashtahuanpish chai carachayashcapica llullu aicha ricurishca cajpica, mapa nishcami saquiringa.

¹⁵ Chai llullu aichata cura alli ricushpa mapa cashcata huillachun. Lepra ungüi cashcamanta llullu aicha ricurishca cashpaca mapami canga.

¹⁶ Shina cashpapish chai llullu aicha yurajyashca cajpica, curapajman richun.

¹⁷ Chaitaca curami alli ricunga. Chai carachayashca yurajyashca cajpica, carachahuan caj runataca curami mapa illajmi cangui ninga. Paica ima mapa illajmi saquiringa.

¹⁸ Maijan paipaj aicha carapi carachayashca ungüita charishca cashpapish ña alliyangachari.

¹⁹ Ashtahuanpish carachayashca cashcapica p'unguishca, mana cashpaca yuraj puca cangachari. Chashna cajpica curaman ricuchinaman richun.

²⁰ Chaipi cura alli ricunapajca aicha cara ucucama llulluyashca cajta, chaipi caj millmacunapish yurajyashca cashcata cura ricushpaca, mapa cashcatami huillanga. Chaica carachamanta lepra ungüi tucushcami canga.

²¹ Chaita cura alli ricunapajca millmapish mana yurajyashca cajpi, aicha carachayashcapish mana ucujta cajpi, ashtahuanpish yanayashpa alli tucushca cajpica, chai curaca ungushcataca canchis punllacama huichcachun.

²² Caracha ungüi ashtahuan mirarishca cajpica, paitaca lepra ungüimi japishca canga. Chaimanta curaca mapa cashcata huillachun.

²³ Ashtahuanpish chai yurajyashca aicha mana ashtahuan mirarishpa chaillapitaj cajpica, caracha alliyashpa chaquirishcallami canga. Chashna cajpica, chai curaca mapa illaj cashcata huillachun.

²⁴ Shinallataj maijanpajca aicha cara ninapi rupashca cashcamanta pucayashca mana cashpaca yurajyashca ricuringachari.

²⁵ Chaitaca cura alli ricuchun. Chai rupashcapi millmapish yurajyashca cajpica, aicha carapish ucujta yaicurishca cajpica, chai rupashcapi lepra ungüi tucushcami canga. Chai carachapi lepra ungüi tucushcamantaca, chai ungushcamanca curaca mapa cashcata huillachun.

²⁶ Chaita cura alli ricunapajca millmapish mana yurajyashca cajpi, aicha carachayashcapish mana ucujta cajpi, ashtahuanpish yanayashpa alli tucushca cajpica, chai curaca ungushcataca canchis punllacama huichcachun.

²⁷ Ña canchis punlla tucujpi, cura cutin ricunapajca chai caracha aicha carapi ashtahuan mirashca cashpaca leprami canga. Chaimanta chai curaca mapami nishpa huillachun.

²⁸ Ashtahuanpish chai caracha mana ashtahuan mirarishpa chaillapitaj cajpica, yanayashca cashpaca rupashca alliyashcallami canga. Chaimanta curaca mana mapa cashcata huillachun. Chaica rupashcamanta alliyashcallami canga.

²⁹ Maijan c'arita cashpa, huarmita cashpapish umapi cashpa, intunpi cashpa, carachayashca ricurijpica,

³⁰ chai carachayashcataca cura alli ricuchun. Chai carachayashca cara ucujta yaicurishca cashpaca, ajchapish quilluyashca ñañuyashca cashpaca, umapi cashpa, intunpi cashpa lepra ungüi japishca carachami canga. Chaimanta chai curaca paimanca mapa cashcata huillachun.

³¹ Ashtahuanpish chai carachayashca ungüita cura alli ricunapajca, aicha cara mana ucujta yaicurishca cajpi, yana ajchapish mana ricurijpica chai caracha ungüihuan cajtaca chai curaca canchis punllacunacama huichcachun.

³² Ña canchis punlla tucujpica, chai carachataca cura alli ricuchun. Chai caracha mana ashtahuan mirashca cajpi, ajchapish mana quilluyashca cajpi, aicha carapish mana ucujta yaicurishca cajpica,

³³ chai carachahuan cajca carachapi ama chayachishpalla ajchata rutuchichun. Chai caracha ungüihuan cajtaca shujtaj canchis punllacunahuan huichcachun.

³⁴ Ña canchis punlla tucujpica, chai carachahuan cajtaca cutinllataj cura alli ricuchun. Chai caracha mana ashtahuan mirarishca cajpi, aicha carapish mana ucucama cajpica ima mapa illaj cashcataca cura huillachun. Chaipica chai ungushcaca, paipaj churanata tajshashpa ima mapa illajlla saquiringallami.

³⁵ Ashtahuanpish mapa illajlla tucushca q'uipa, caracha ashtahuan mirarishca cajpica,

³⁶ chaitaca cura alli ricuchun. Pai ricunapaj chai caracha ashtahuan mirarishca cajpica, mapa cashcamanta quilluyashca ajchataca ama mashcachun.

³⁷ Ashtahuanpish chai caracha mana ashtahuan mirarishca shina ricurijpi, chaipica yana ajcha huiñashca cajpica, chai carachaca ña alliyashcami canga. Chai ungushcaca ima mapa illajmi canga. Chai ungushcamanca ima mapa illaj cashcata chai curaca huillachun.

³⁸ Shinallataj maijan c'aripaj cashpa, huarmipaj cashpapish aicha carapi yurajyashca ricurijpica,

³⁹ chaitaca cura alli ricuchun. Chai aicha cara yurajyashca asha yanayashca cashpaca, paipaj aicha carapi sisucuna llujshishcallami canga. Paica ima mapa illajllami canga.

⁴⁰ Shinallataj maijan c'aripish paipaj ajcha pelarishcallamanta lluchu uma cashpaca limpiollatajmi canga.

⁴¹ Shinallataj frente ajcha pelarishca cashcamanta lluchu frente cashpapish limpiollatajmi canga.

⁴² Ashtahuanpish huashaman cashpa, frente ladoman cashpa ajcha mana tiyanpi yuraj caracha pucayashca cashpaca, ajcha mana tiyanpi lepra sisucuna llujshishcami canga.

⁴³ Chaitaca cura alli ricuchun. Pai ricunapajca huashaman cashpa, frente ladoman cashpa ajcha mana tiyanpi p'unguishca carachayashca pucayashcaca cuerpopi lepra llujshishca shinallataj cashpaca,

⁴⁴ lepra ungüihuanmi canga. Chaica mapami canga. Chaitaca cura alli ricushpa uma carachayashcapi lepra japishca cashcamanta mapa cashcata huillachun.

⁴⁵ Lepra caracha ungüihuan cajca: Lliqui churanacunata churarishpa, umatapish mana ch'ungullishpa, ñahuitapish mana taparishpa, ¡Mapami cani, mapami cani! nishpa caparirichun.

⁴⁶ Caracha ungüihuan cajca caracha ungüihuan cai punllacunapica tucui chai punllacunapimi mapa canga. Mapami canga, sapallami causanga. Carpa huasicunamanta canllamanmi causanga.

⁴⁷ Ima churanapi mapa lepra ungüi ricuringachari. Millma churanapi cashpa, lino churanapi cashpa,

⁴⁸ urdishca puchcapi cashpa, linomanta ahuashcapi cashpa, millmamanta ahuashcapi cashpa, caramanta rurashcapi cashpa, caramanta rurashca ima charinapi cashpapish lepra p'ulasyashca ricuringachari.

⁴⁹ Chashna mapayashcaca churanapi cashpa, carapi cashpa, urdishca puchcapi cashpa, ahuacushca puchcapi cashpa, mana cashpaca caramanta rurashca ima charinapi cashpapish verdeyashca, pucayashca ricurishpaca leprahuan mapayashcami canga. Chaitaca curaman ricuchigrichun.

⁵⁰ Chai mapayashcata cura alli ricushpa, chai mapayashcacunataca canchis punllacama huichcachun.

⁵¹ Ña canchis punlla tucujpi, chai mapayashcataca cura cutin alli ricujpi churanapi cashpa, urdishca puchcapi cashpa, puchcata ahuashcapi cashpa, carapi cashpa, caramanta rurashca ima charinapi cashpapish ashtahuan mirarishca cashpaca chai millai lepra ungüimi canga. Chaimanta chai charinacunaca mapami canga.

⁵² Churanapi cashpa, urdishca puchcapi cashpa, millmata ahuashcapi cashpa, linota ahuashcapi cashpa, mana cashpaca caramanta rurashca ima charinacunapi cashpapish chashna mapayashca cashpaca millai leprami canga. Chaitaca ninapi rupachichun.

⁵³ Ashtahuanpish cura alli ricunapajca chai mapayashcaca churanapi cashpa, urdishca puchcapi cashpa, puchcata ahuashcapi cashpa, caramanta rurashca ima charinacunapi cashpa mana mirarishca cajpica,

⁵⁴ chai curaca maipi mapayashcata tajshachishpa, cutinllataj shujtaj canchis punllahuan huichcachun.

⁵⁵ Chai mapayashcata tajshashca q'uipa chaita cura alli ricunapajca chai mapayashcaca mana mirarishca cashpapish, chashnallataj cajpica, chai charinaca ima cashpapish mapa cashcamanta ninapi rupachichun. Chaicunaca jahua lado cashpa, ucu lado cashpa ucujta ismucuj cashcamantami chashna rupachina.

⁵⁶ Tajshashca q'uipa cura cutin ricunapajca, maipi mapa cashcapica churanamanta cashpa, caramanta cashpa, urdishca puchcamanta cashpa, ahuashcamanta cashpa chai yanayashcataca p'itichun.

⁵⁷ Shinallataj churanapi cashpa, urdishca puchcapi cashpa, ahuacushcapi cashpa, caramanta rurashca ima charinacunapi cashpapish cutinllataj chai mapayashcaca ashtahuan mirarishca cajpica, chai mapayashcataca tucuita ninapi rupachichun.

⁵⁸ Ashtahuanpish ima churana cashpa, urdishca puchca cashpa, ahuashca cashpa, caramanta rurashca ima charinacuna cashpapish tajshashca q'uipa mapayashca chingarijpica, cutinllataj tajshachuncuna. Chai q'uipaca ima mapa illajmi saquiringa” nircami.

⁵⁹ Chai mandashcacunaca millma churanapi cashpa, lino churanapi cashpa, urdishca puchcapi cashpa, ahuashcapi cashpa, caramanta rurashca ima charinacunapi cashpapish mapayashca ricurijpica, lepra mapa ungüi cashcata mana chai cashcata ima shinalla ricunata yachachishcacunami.