LEVÍTICO 12 - Dios Rimashca Shimicunami

Huachashca q'uipa mapa illaj tucuchun huarmicunata mandashcami

¹ Mandaj Diosca Moisesta mandashpaca:

² “Israelcunataca cashna nishpa mandai: Maijan huarmi c'ari huahuata huachashpaca, quillanta shamuna yahuar shamujpi shinallatajmi canchis punllacama mapa canga.

³ Chai huahuataca huacharishcamanta pusaj punllapica circuncisionta rurashca cachun.

⁴ Ashtahuanpish mamaca mapa illajlla tucungapaj maillarinataca, quimsa chunga quimsa punllacunatami ruranga. Mapa illajlla tucuna punllacuna pajtangacamaca Diospajlla ch'icanchishcacunapipish ama tuparichun, Diospaj carpa huasimanpish ama shamuchun.

⁵ Huarmi huahuata huachashpaca, quillanta shamuna yahuar shamucujpi shinallatajmi ishqui semanacama mapa canga. Huachajpi yahuar shamucushcamantaca, mapa illajlla tucungapaj maillarinataca sujta chunga sujta punllacunacama rurachun.

⁶ C'ari huahuata cashpa huarmi huahuata cashpa huachashcamanta chuyayana punllacunata ña tucuchishpaca, Diosman tucuita cushpa tucui rupachinapajca shuj huatayuj ovejata, juchamanta cungapajca shuj palomata, mana cashpaca shuj urpita Dioshuan tupana carpa huasi punguman apamushpa curaman cuchun.

⁷ Chaicunataca Mandaj Dios chai huarmipaj juchata perdonachun curami Diosman cunga. Chashna rurajpimi chai huarmica yahuar cachariricushcamanta mapa illajlla saquiringa. Chai mandashcacunaca c'ari huahuata cashpa, huarmi huahuata cashpa huachaj huarmi imallata rurachun mandashcami.

⁸ Chai huarmica, ovejapaj mana charishpaca ishqui urpita, mana cashpaca ishqui palomata cashpa apamuchun. Chaicunamanta shujtaca tucui cushpa tucui rupachingapaj, caishujtaca juchamanta cungapaj apamuchun. Chaicunataca chai huarmipaj juchamanta Diosman cura cujpimi, paica ima mapa illajlla saquiringa” nircami.