LEVÍTICO 11 - Dios Rimashca Shimicunami

Micuna animalcunamantapish mana micuna animalcunamantapish

¹ Mandaj Diosca Moisestapish, Aarontapish cashna nishpami mandarca:

² “Israelcunataca cashna nishpa mandai: Cai pachapi tiyaj tucui animalcunamantaca, cai animalcunallatami micuna canguichij:

³ Tucui animalcunamantaca pallca sillucunata charij, tigrachishpa cashtujcuna cajllapi micunguichij.

⁴ Tigrachishpa cashtuj cajpipish, pallca sillucunata charij cajpipish, caicunataca mana micunachu canguichij. Camelloca tigrachishpa cashtuj cashpapish mana pallca silluta charinchu. Chaimanta mapa animal cashcata yuyanguichij.

⁵ Shinallataj cunupish tigrachishpa cashtuj cashpapish mana pallca silluta charinchu. Chaimanta mapa animal cashcata yuyanguichij.

⁶ Shinallataj liebre animalca tigrachishpa cashtuj cashpapish, mana pallca silluta charinchu. Chaimanta mapa animal cashcata yuyanguichij.

⁷ C'uchica pallca sillucunayuj cashpapish, mana tigrachishpa cashtunchu. Chaimanta mapa animal cashcata yuyanguichij.

⁸ Chashna animalcunapaj aichataca amataj micunguichijchu. Huañushcapipish amataj tuparinguichijchu. Chaicunataca mapa cashcata yuyanguichij.

⁹ Yacupi causaj tucui animalcunamantaca caicunata micunguichij: Mama cuchapi cajta cashpapish, jatun yacupi cajta cashpapish alasyuj, escamayuj cajcunallatami micui tucunguichij.

¹⁰ Mana alasyuj, mana escamayuj tucui animalcunataca mama cuchapi causaj cajpipish, jatun yacupi causaj cajpipish, uchillacuna cachun, jatuncuna cachunpish tucui chai shina animalcunataca millanana animalcuna cashcata yuyanguichij.

¹¹ Chai animalcunaca cancunapajca millananami canga. Chai animalpaj aichataca ama micunguichijchu. Chai animalcuna huañushca aichataca millanguichij.

¹² Yacupi causaj animalcunataca mana alasyuj, mana escamayujcunataca tucuita millanana cashcata yuyanguichij.

¹³ Alasyuj animalcunapuramantaca cai animalcunatami millanana animalcuna cashcata yuyashpa millanana cashcamanta mana micuna canguichij. Chai animalcunaca caicunami: Aguila, quebrantahuesos, azor,

¹⁴ gallinazo, milano, chai shina angacunataca ama micunguichijchu.

¹⁵ Tucui laya cuervocunata,

¹⁶ avestruzta, lechuzata, gaviotata, tucui laya gavilancunatapish ama micunguichijchu.

¹⁷ Chushij, somormujo, ibis,

¹⁸ calamón, pelícano, buitre,

¹⁹ cigüeña nishca animalcunatapish, tucui laya garzacunatapish, abubilla nishcatapish, murcielagotapish ama micunguichijchu

²⁰ Tucui chuspicunataca alasyuj, chuscu chaquihuan purijcuna cajpica millanana cashcata yuyanguichij.

²¹ Ashtahuanpish alasyuj, chuscu chaquihuan purijcuna cashpapish allpapi saltanapaj suni changacunata charijcunataca micunguichijlla.

²² Chaicunamantaca caicunatami micuna canguichij: Tucui laya langostacunata, langostín, grillo, saltamonte nishcacunataca micunguichijlla.

²³ Cai shina caj shujtaj chuspicunataca alasyuj chuscu chaquicunahuan pambata purij cashpaca, cancunapajca millananami canga.

²⁴ Cai shinacunapi tuparishpaca mapayashcami saquiringuichij: Maijanpish chai shina animalcuna huañushcapi tuparijca tutayangacama mapayashcami saquiringa.

²⁵ Maijanpish chai animalcuna huañushcapi japirijca, paipaj churanacunata tajshachun. Shina cashpapish paica tutayangacama mapami saquiringa.

²⁶ Ima animal cashpapish mana pallca silluyuj, mana tigrachishpa cashtuj cajpica, mapa animal cashcata yuyanguichij. Maijanpish chai shina animalpi tuparijca, mapami saquiringa.

²⁷ Shinallataj chuscu chaquiyuj ima animal cashpapish p'acha chaqui shunguhuan purij tucui animalcunataca mapa cashcata yuyanguichij. Chai huañushca animalpi maijanpish tuparijcunaca tutayangacama mapami saquiringa.

²⁸ Huañushca animalta japirijca, paipaj churanacunata tajshachun. Paica tutayangacamami mapa saquiringa. Chaicunataca mapa cashcatami yuyana canguichij.

²⁹ Huijsahuan llucashpa purij animalcunataca: Comadrejata, ucuchata, tucui laya sapocunata,

³⁰ erizota, cocodrilota, paluta, lagartijata, camaleontapish mapa animalcuna cashcatami yuyana canguichij.

³¹ Huijsahuan llucashpa purij animalcunataca, tucui chai animalcunatami mapa cashcata yuyana canguichij. Maijanpish chai animalcuna huañushcapi tuparijcunaca, tutayangacama mapami saquiringa.

³² Chai animalcuna huañushca ima charinacuna jahuapi urmajpica, tucui chaicunaca mapami saquiringa. Caspimanta rurashca ima charinacuna cajpipish, churanacuna cajpipish, cara cajpipish, costal cajpipish, trabajanapaj ima charinacuna cajpipish chai animal huañushcapi tuparishca cajpica, chaicunataca yacupi satishpa churanguichij. Chaicunaca tutayangacama mapami saquiringa. Chai q'uipami ima mapa illaj saquiringa.

³³ Allpa mangapi chai animal huañushca urmajpica, chai manga ucupi tucui imalla tiyajcunandijmi mapayanga. Chai allpa mangataca p'aquinami canguichij.

³⁴ Chai mangapi tiyaj yacu ima micunapi jicharijpica, chai micunaca tucuimi mapayanga. Chai mangapi ima ubyana tiyashca cashpapish mapallatajmi saquiringa.

³⁵ Chai huañushca animal imapi cashpapish urmajpica chaica mapami saquiringa. Hornopi cashpa, yanuna tullpapi cashpapish urmajpica chaicunataca ñutuchun. Chaicunaca mapacunami canga. Chaimanta mapa cashcatami yuyana canguichij.

³⁶ Shina cajpipish allpamanta llujshicuj yacupi cashpapish, pugyu yacupi cashpapish urmajllapimi mana mapa canga. Ashtahuanpish chai huañushca animalpi imapish tuparijcunaca mapami canga.

³⁷ Maijan chai animalcuna huañushca, tarpunapaj caj muyupi urmajpica chaica mana mapayangachu.

³⁸ Ashtahuanpish chai muyupi yacuta churashca cashcapi chai huañushca animal urmajpica, chai muyuca mapa cashcata yuyanguichij.

³⁹ Micunapaj caj maijan animal huañujpi, chaipi tuparijca tutayangacama mapami saquiringa.

⁴⁰ Huañushca animalpaj aichata micujca paipaj churanacunata tajshachun. Paica tutayangacamami mapa saquiringa. Huañushca animalta llujshichijpish, paipaj churanacunata tajshachun. Paipish tutayangacama mapami saquiringa.

⁴¹ Huijsahuan llucashpa purij tucui animalcunaca millananacunami. Chaicunataca mana micunachu canguichij.

⁴² Huijsahuan llucashpa purij animalcunata, chuscu chaquiyuj animalcunata, mana cashpaca ashtahuan chaquiyuj animalcunataca ama micunguichij. Chaicunaca millanana animalcunami.

⁴³ Cancunaca llucashpa purij maijan animalcunahuan ama mapayaichijchu. Chaicunahuan ama mapayaichijchu. Chaicunamantapish ama mapayaichijchu.

⁴⁴ Ñucaca Mandaj cancunapaj Diosmi cani. Chaimanta cancunapish tucui mapamanta anchurishpa, ñuca jucha illaj caj shinallataj cancunapish, ima jucha illajlla canguichij. Cancunaca huijsahuan llucashpa purij animalcunahuanca ama mapayachinguichijchu.

⁴⁵ Ñucaca Mandaj Diosmi cani. Cancunapaj Dios cangapaj, Egiptomanta cancunata llujshichimujmi cani. Ñuca ima jucha illaj caj shinallataj cancunapish ima jucha illajllami cana canguichij” nircami.

⁴⁶ Tucui cai mandashcacunaca, tucui animalcunamanta, alasyuj animalcunamanta, cuchapi causaj animalcunamanta, huijsahuan llucashpa purij animalcunamanta,

⁴⁷ maijanlla mapa animal cashcata, maijanlla mana mapa animal cashcata, maijanlla animalcunata micuna cashcata, mana micuna cashcata yachachunmi chashna mandarca.